Ka muhpak US Gamthu pawlkhat – 33

Ka muhpak US Gamthu pawlkhat – 33

Khangto Semsem Leng Numeite Hampha Semsem
Ka neu lai aa Mandalay ah sang ka kah lai in ka phawkkhak mahmah thu in, Zo numeite Zogam ah a hamsiat dan leh Kawlgam ah atun ciangin a hamphat dan van leh lei in kikhai hi. Kawlgam tun ciangin a papite uh galkapte manlah lua kisa in a luang kham in gal a sim banah batalion ah hong tunkik uh ciangin a zi a tate in bangmah sep ding om lo aa, a man luat mahmah uh bang lo in, amau ahih leh inn na lengah omman ngei lo uhhi. Tua ka cih ciangin thadah ci a numeite ka mawhsakna hi lo hi. Asep ding uh zong om peuhmah lo hi. Khangluite pau leh a taw tutphah in (su tutphah kici zaw lai) thamaang takin om tha paii uhhi.

Ei Zogam dan tawh kibang lo in innlak vak leh a ta ngeek ahi zongin lam pai thei nai lo a tate khat peuh ahi zongin, a nu’n tawi lo in a pate in tawi zaw uhhi. Akhangto gamah numeite leh pasalte liangko kikim ding vive a vaihawm lailai genloh, innkuan sung vai ah mun kilim piak mahmah hi. Mawtaw tuang leh tuak leh aki-mipi sak aki-Mangkang sak phadiak a pasal te’n akongkhak hon sak hi. Naupang bang mahin ngeek bawl hi. Mun khat peuhah pai in kongkhak hon ding om leh, a pasalten a kongkhak honsak tangtang uhhi. A zite in puantungsilh a silh leh a pasalte in silh sak in a suah khiat ding ciangin zong pasalte mah in suah khiat sak lai mawk uhhi.

Tua hi a, khangto semsem leng numeite a hampha semsem dan ahihi. Kuang sil kuang sawp cih khawngte pen pasalte vaiipuak hi zaw sop hi. Zomite ngeina leh zia leh tong tawh kilehbulh mahmah cih ding ahihi. A taktak mikang khempeuh in zong a zite tua bang dan a a ngeek bawl ngawingawi hi khin sam lo uhhi. A tua bang dan zong Zomi numei kiteisak nuam pawl khatte in diksa lua ahih manin akiciinh (adapt)ding aki zuih ding’ ngaklah lua khin mahmah ta leuleu uhhi.

Nidang in pasalte kithupisak kisa in mihing khempeuh tangin kammal ih zat leh MAN kizang hi. Gentehna in Man Matters Most, Chairman cih khawng kizang tangtang a, tuhun ciangin numei leh pasal a nih tuak a zat kawikawi theih dingin Chairperson cih zat ding kideihta hi. ‘Man’ akici ding munah ‘human or person’ zangta uhhi.

Tua bangin numeite dinmun domto mahmah bek domlo in, deih loh pen in innkuan sungah nupa in kitawng kina in a pasal in a zi bang vel kha zenzen leh athu liansak mahmah a, numei pen atha zawngkhal zaw (the weaker sex) ci’n a upadi in gumh mahmah hi. Tua bang ngeiingeii in ih tate zong kei ta kei tu hi ci in na vuak khak leh 911 na ko leh a papite mah hong ki-ngawh ding a hong man ding ahihi. Naupangnote bang pianpih suahtakna (human rights) tawh kisai tua bang thu vive a sangah na hilh tangtang sawnsawn uhhi.

(azom omlai hi…)

Agelh: Awn Za Pau