Ka lungsim hong sukha khat

Ka lungsim hong sukha khat

Stage tungah tangvalno samzau zelzual khat in mit hak ngam lo liangin drum na sat a, githa tumte zong mitsisa mahin vanlam na dakto uh hi. Music pen ging ziahziah a, a thei ngeilo pawlkhatte bangin galzak uleh Night Club sung sa liang ding uh hi. Tuazawh asawt lo khit ciangin music thawm hong ngeih nawn lo in, a maia lasanu bang pen khukdin dektak phial liang a, a mainulneu tawh amit leh atal nul kawmkawm in la hong sa hi. Mipite zong khutlam lo khat mahmah muh ding om lo hi. Tuakhit ciangin a gingkhia in mikim in thungetna ong nei ziahziah leuleu uh hi. Tuazah taka thu kinget ziahziahna a dawng Pasian ahihman in mimal khat ciat thungetna tel lel ding cihpen theihsa hi mah taleh kei anawl a dingpa in ka geia thungenpa ngette kammal khat zong ka tel om lo hi. Mihing leh Pasian ih kibat lohna sim zawh loh omte lakah hihpen khat hikha dingin ka ngaihsun pah hi. Thungetna hong man kuan ciangin papi necktie ok khat stage tungah mike tawiin hong kahto a, tuapa in thungetna teng hong hialbawl hi.

Tua necktie okpa pen hun ukpa hileh kilawm hi. Tuapa mahin hunpi paima diakin testimony gen nuamte a dingin hun awng khat ong bawl leuleu hi. Mipi teng ki en duamduam uh a, testimony a gen ding om lo ahi tam aw ka cih simsim lai takin anung gualpen panin papi samsau sim nilnel khat hong dingto a, thu gen dinga a kamkat laitak in necktie okpa in stage tungah kahto dingin sam hi. Amah zong dek khuat nelnel kawmin stage lam zuan phei hi. Mipi in khut betna tawh na muak pah ziahziah uh hi. Stage tungah hong din ciangin mike khat humsak pah uh hi. Amel et in hihpa pen ciamnuih bawlsiamte tawh kibang a hi tam mipite nui pian heuhuau tek mawk uh hi. A kizepdan zong en lehang a sumbawm sungah sum kihen ngei khol kei leh kilawm hi. A puansilhte zong siang mahmah phial taleh a tam mante ahih loh lam kitel mahmah hi. Thugen hong kipat ciangin a pau hong ok pian ta lailai hi. Mipi mai sangin khualnawl a zuzuaknu mai ah maingal zaw cih kitel pah hi. Aha zong nawt khit ahih tei sam hangin sanlai pian sensan hi. Kunza angol zawh nithum sang tamzaw lo cih kitel pah hi. Tawmvei sung hong mitsit cip khit ciangin hibangin thu hong gen hi.

“Kei pen noteng lakah anung gual a tute lobuangin hong tel khol lo ding hi uteh” hong ciphot zawzen hi. Tualai takin ka tutna ka et phat leh anung gual bek hi lo, pusuah ziau theihna kongkhak gei na hi sawnsawn lai hi. ” Amai gual lam leh tutphah hoih tunga tuten bel hong tam muh ngei kei ni uteh, bang hang hiam cileh ken kong muh zel hangin no nong mu ngei kei uh a, kituak leng zong kei hong en nuam kuamah na om kei uh hi. Hong mawhsak keng, kei pen sunlehzan in tangpil hun anei ngei mello pa ka hi a, ka gim namsia in ka kamsung zong thuknam heuhuau den pian hi. Kei tawh kitheih khak ding pen kamsiatna khat hiliang leh kilawm ka sa hi.

“Kum tampi sung ko inn leh biakinn kikal ah kikhopni sial in ka gammang den hi. Naicik khat ahih hangin gamla lua ka sa a, lampi khat bek ahih hangin lamka tam lua hi” acih laitak in anui kuamah om lo hi. Amah zong leilam bek sal gega in pau vet lo hi. Minit nih sung khit ciangin a thugen hong zom leuleu hi. ” Khatvei ka lawmte tawh zusai ah zudawn in ka zanhak uh a, zingsang nai sagih pawlin ka ciah hi. Biakinn ka muh loh zawh sawt lua ta, ka nuntak sunga ka gengen dingin ahuang sung beek va sik dih ning e ciin kamnam takin ka lut phei hi. Dingtang zo lo ka hihman in Biakinn khuam tawh kinang in tawmvei ka ding cip hi. Nidang a biakinn kongkhak a kikalh den hi napi tuani sese in a tawhbu bek na kikhai a, kei zong biakinn kiluh hinteh ciin ka lut phei hi. Tua khit ciangin bang piang hiam thei nawn keng, ka khanlawh ciangin ka khuadak leh keibek mah biakinn sunga tutphah tungah ka na tu lai hi. Ka mit hah ciim in, ka lungsim tei seusau a, zugim a kici peuhmah ka za nawn kei hi. Cikmah huna ka zat ngei loh pen biakinn sunga zahtakna tawh lukun a hihi. Tuani pen biakinn sung pan ka paikhiat ding ciangin ka lu kun in maitai takin innlam ka zuan hi.

“Innsung ka lut phet leh ka tapa tegel sabuai nuaiah na bu pah uh a, ka tanu kongkhak liah ah na kuncip hi. Anbuk panin ka zi khitui luangsa in ling deldel in hong pai phei a tuiminvot haipi dim in hong pia hi. Hibang teng ka muh ciangin ka innkuan sung uh launa, lungkhamna leh kahna tawh a kidim den himawk a maw ciin ka khitui hong luang hi. Ka zi hong tui piakna khut tegel len in ka nam hi. Kongkhak liah a aling kelkel ka tanu pom in, sabuai nuai a ka tapa tegel ka sam hi. Hong pai khia un ka tate aw, hong lau nawn kei un kei pen mithak hi ta ingh, kei pen nidang a na pa uh ka hinawn kei hi ka cihkhit naleng ciangin zong kuamah hong gamtang kheh ngam tuan lo uh hi. Ka zi khut len kawmin sual tungah ka khukdin a, thu ka ngen hi. Tuani a kipan tuni ciang dong ka tun denna zusai leh ka hawh zelzelnate ah ka pai kik nawn kei hi. Pasian thu ka theih bangmah om kei, ahizong in ka nuntakna hong kikhelsak, ka innkuan sungah lungnopna hong omsakpa pen Topa Zeisu ahihlam ka tel hi. Tua bek hi kei theih. Ahizong in hih ka theihpa Zeisu pen cikmah hunin ka khahsuah nawn kei ding hi. Aman cikmah hunin hong khahsuah ngei lo ding cih zong ka tel hi. Tua hi ka gennop, Pasian minthang ta hen. Ka lungdam” a cih khit ciangin atutna ah kilehkik hi.

Khutbeng khat zong om lo a, khitui luang lo khat zong om lo hi. Keizong ka sawm kholh lohpi in ka khukdin kha liang hi. Ka sawm lohpi a hong khukdin sak thei pa pen Zeisu bek mah ahihman in kenzong ka lungsim sungah “Hamsa mah leh Zeisu bek mah ka zuiden ding hi” ciin khensatna ka bawl hi.

Francis Lamthang
…Francis Lamthang ( Zomi Quavadis)….