Ka Jacob ding kianga laikhak ~ Niangboih

Ka Jacob ding kianga laikhak ~ Niangboih

Ka it ka Jacob ding aw, kua na hi a, koi-ah na om hiam kong thei nai kei hi. Bang na sem a, bang na bawl hiam kong theihpih het kei hi. Ahizong kha lam sa lamah Sian siam Zotang bang na dam ding hong lamenin itna taklam khut hong len ing.

Hi e, khat veivei ciang na hihna kong tel lian loh hang, i Pa in hong tel ahih manin kei ka kha muang hi. Khat veivei ciang lah hong kilang hak lua hong sa zel ing e. Pasian in hun sa nailo hin teh.

Tangpal zatam ten ka paal lo nuamin hong kithawi zel uh hi. Aihang tampi takin pen ka mel etlawmna bek deih uh a, paak bangin ka vul hun ciang itna tawh hong kem hong khoi ding gen loh ninbung ah hong paih nuam lel ding uh ka theih sa ahihmanin amau ading kipia phal keng. Khuai in paakzu a dawn nop ciang tua pak a neh det bangun, a hoihnate uh leh a thusiamnate uh tawh thang bang hong veh den uh a, kei lia zozam in pal bang na nang zo lo dektak zel ing. Nang bek adingin kikoihcing tentan kei leng pawh maw!

I kimuhkhak ma teng, Topa in hong ompihin, hong makaih den hen la, Pasian tawh na kikal kizopna uh a kho semsem theihna dingin na hanciam ding hong deihsak ing. Thumanna bulphuh in, Amah zahtak kawmin na hih ding bangbang Ama minthanna dingin na hih in. Kei zong na hanciam ning. Ama theihpih loh vai bangmah na neih loh ding thupi a, Lai Siangtho pen i nuntakna lam hong lak meivak hi den hen.

I omom na ah lungsim kikem siangtho in, a thanghuai nate tawh kipelh ni. Hun paisa thute mangngilhin, Sawltak Paul bangin mailam enin kung lam zuanin tai ni. Kei zong tua mah na hanciam ing. I Topa’n hong tonpih to zel ding hi.

I nuntakna tangthu pen ei tangthu bek hilo a, Topa’ zong kihel ahihmanin i Topa’ tangthu zong ahi hi. Amah I tangthu gelhpa hi mawk hi. Tua ahih manin, tangthu hoih lo leh a dahhuai laimai te Aman a geelna dungzui-in a hoihzaw leh a etlawmzaw-in hong laih dinga, a tul ngei lo, mi tampite sim dinga a manpha leh a hoih tangthu, Pasian minthanna a lakkhia tangthu hong suak ding cih ka lametna hi.

Ka thungetna ah hong na phawk den ing. Nang kiang kong gen theih nailoh thute tampi Ama kiang na tun zel ing. Amah pen ka lawm hoih pen, hong taisan ngeilo, a muanhuai bek thamlo, hong it mahmah Pa ahih manin ama kiang ka lungsim tawng a om thu teng na sungkhia zel ing. Tua in tawldamna leh lungmuanna hong pia a, ka tha hong dimkik zel hi.

Bangbang hi leh i omna peuh ah muanhuai takin i om dinga, hangsan takin hih ding maban om bangbang lungkia lo-in, Pasian muang kawmin hih to zel phawt ni. I lungsimte khauhsakin, sikdo tak leh thuakzo takin i om ding a, kilungneusak hetlo ding hi hang. I Topa’n pha a sak hun ciang dawn bang kituahin tui bangin i kigawm dinga, tua hun ciang nang tawh samgi bang khen ngei nawnlo dingin nun nuam va bang I lengkhawm ta ding hi.

Tua hun tuang hong tun ma dong, i omom na ah muanhuai ni. Sianin na heina peuhah lumbang hong sungin hambang hong huai den ta hen! Hong it, Lia Zozam Niangboih

“Tua ahih ciangin Jakob in Rachel a ngahna dingin kum sagih sung nasem a, amah a itna hangin tua hunte ni tawmno khat tawh kibang a sa hi” – Piancilna 29:20 (Etkak – An Open Letter to My Future Jacob by Jemimah Ramos)