Job: Zia-etna a thuakna leh Pasian’ muanhuaina ~ Rev. Zam Khat Kham

Job: Zia-etna a thuakna leh Pasian’ muanhuaina ~ Rev. Zam Khat Kham

Thupatna: Sawltakpi Peter in, “Tu laitak hun tomcik sung zia-etna namkim thuakin na lungkham uh zongin hih thu ah nakpitakin na lungnuam uh hi. Mei-a a kihalsiang khit ciang nangawna a kisia thei kham sangin note upna a manphazaw ahihna, a maana a kiciat theih nadingin hihte hong piang hi; tuate in Jesu Christ hong kilaak ciangin phatna minthanna leh pahtawina a suah theih nading uh ahihi” ci-in hong hilh hi (I Peter 1:6-7, ZIV). Pasian in A mite’ upna hong zia-et hi.

Tua bang zia-etnate tungtawnin Pasian’ deihna a tangtun takpi nak leh tuate in eite’ sung ah thuakzawhna leh cihtakna khangsaka i upna mahmah khauhsak semsem hi. Tua banga Pasian’ tunga kingak zawhna tawh lungduai citak taka i gualzawh ciangin, eite kicing semsemin James in a gen bangin kisap i nei kei hi (James 1:3-4). Tua bang zia-etna i cihte a baih om lo-a a haksat den hangin eite’ sup zawk nading peuhmah hi ngei lo a, eite’ hamphat nading leh met nading vive ahi hi.

Gentehna-in, Pasian in Abraham na zia-et a, a tapa khat bek neihsun, kamciam tawh a neih a tapa tawh a biak nadingin na sawl ngiaumawk hi (Piancilna 22:1). Abraham bel Pasian’ tung ah na kinga zo mahmah a, a tapa Isaac in a biakpiak nading uh a gan ding koi ah om hiam, ci-in a pa a dot ciangin “Ka ta aw, Pasian in amah a kibiak nadingin tuuno khatpeuh amah leh amah kisik lelngawn in teh,” na ci hi (Piancilna 22:8). A taktakin ci lehang, a kisap zenzen leh Pasian in Isaac mahmah zong a sisa hingkiksak thei lua ding hi, ci-in Abraham in um hi (Hebrews 11:19).

Tua bang zia-etna a thuakna in Abraham’ upna khauhsak zawtham takpi a Pasian mahmah in zong Abraham in Amah it taktak hi, cih thei-a lungkim mahmah hi (Piancilna 22:12). “Nang thupha kong pia pelmawh dinga, na suan leh na khakte van-a aksi zah leh tuipi gei a sehnel zah ka phasak ding hi. Ka thu hong mang na hih manin na suan leh na khakte in a galte uh khuapite tang ding uh a, nang’ gui tungtawnin leitunga minam khempeuh thupha kipia ding hi,” na ci hi (Piancilna 22:17-18).

Joseph mahmah zong tua bang mah ahi hi. Pasian’ kammal—a innkuanpihte ama’ mai ah kun ding uh hi, ci-a Pasian in a manga a lahsa—om khin napi-in kum sawm nih sung bang sila leh thongkia peuhin om mawk hi (Piancilna 39:19-41:14; Late 105:19). Pasian’ hun leh Pasian’ zia lungduai citak taka ngak hiithiat ding Joseph in a nuntakna ngiat tawh sin hi. David zong tua mah ahi hi.

Pasian in Israel kumpi dingin sathau nilh khinin Pasian’ kha in Saul a nusiat hangin tua Pasian’ kha mah David tung ah hong tung hi (I Samuel 16:12-13) Pasian in a nolhsa kumpi ginalo Saul in thah dingin zonga gam lak ah kum tampi sung galtai-in na om niloh hi. David in zong Pasian’ zia leh Pasian’ hun lungduai citak takin na ngak hi. Hih mite Pasian in ama’ seh hun a tun ciangin a sangpen mun ah na lamto hi.

Laisiangtho sunga Job tangthu in zong hih thu mah hong hilh hi: Pasian in A mite Ama’ tung ah a kingak ding hong deih a, na khempeuh thu khempeuh ah Amah bek i muan ding hong deih ahih manin i upna hong zia-et hi. A taktakin ci lehang, hih Job bu Laisiangtho sung ah a omna thu ngiat mahmah zong i upna hong kizia-et-in hong kithakhauhsak hun cianga i etteh dinga (pattern) hong kipia ahi hi.

Zia-etna leh haksatna i cihte i tuah loh a phamawh ahi hi—dam lohna, innsung ah sihna manna, supna baina tuamtuam, thu haksa tuamtuam leh ei mahmah nangawn ni khat ni teh i sih hun ding hong tung mai ding cih thute kuamah in pelh thei lo ding hi. Tua bang hun ciangin Job leh a tunga i gen upna tawh a nungta mite bangin upna tawh nungta ding maw? Ahih kei leh upna tawh hi lo a muhna tawh a kalsuan sehnel gam-a mi tampi a si Israel mite leh tuhun khang mi tampite banga nungta ding maw? Job in bel upna tawh i nuntak zia ding hong hilh hi.

1. Job: Pasian A Upna leh A Daupaina

Hih Job bu sung ah Job in Pasian a upna leh a kihtakna kigen beka amah kua minam hi a, kua beh kua phung hiam cih peuhmah kigen lo hi. Job in Pasian a upna leh Pasian thu a zuihna ah thu li ki limgen hi. A masa pen bel “a kawkbaan lohna” ahi hi. Biakpiak nadinga kipaipih gantanote siampite in vel dikdekin sittel uh a a satonna peuh, a poi a hemna peuh a om loh ciangin biakpiak nadingin cingtaakin “kawkbaang lo” cih kammal a zat theih den pen mah uh na kizang hi. Job nuntakzia mawhsak nading om lo a thutang tawh a nungta mi khat ahihna hong lak hi. Mihing tate bel kuamah peuhmah mawhna nei lo ki-om lo mah-a ahi zongin Job bel mawhna a nei lo hi lo-in a “kawkbaang lo” mi khat bel na hi hi.

A nihna ah, “thutang” cih kammal na kizang leuleu hi. A tang, a maamte genna kammal hi. Kawi lo, kihuiheek lo, cihna hi. Pasian’ pianzia bangmah sunin thutang den-a lungsim kawi leh lungsim thep nei lo, cihna hi. Etteh huai ngel khe sam mataw!

A thumna ah, “Pasian a kihta mi” cih kammal kimu leuleu hi. Hih in zong thu tampi gen hi. “Pasian kihtakna” ahih kei leh “Topa kihtakna” cih kammal pen Laisiangtho Thuciam Lui sung ah tamveipi a kizang kammal hi a, Laisiangtho siamte in (a diakdiakin tuma kum tampi lai-in Scofield Study Bible sung ah ka muh masakna) Topa Pasian zahtak mahmahna tawh muanna (reverential trust of God) hi, ci uh hi.

Pasian’ hihna leh Pasian’ pianzia i theih i telna in i ngaihsutna, i nuntak gamtatzia leh i lungsim sunga i feelingte nangawn hong uk a, Pasian’ thukimna leh Pasian’ pahtak ding utna tawh nuntakna leh Ama’ thupi luatna zahtakna leh Ama’ thukhenna leh sektatna mahmah zong kihtak theihna ahi hi. A tomin ci lehang, Laisiangtho sung ah, “Pasian/Topa kihtakna” cih kammal a kizatna khempeuh i et ciangin a Paian-mi (godly) mahmah-a a biakna-mi (religious) mahmah mite kigenna hi den mai hi.

A lina ah, “thusia a pel mi” ahih kei leh, “thusia a kiheiisan mi” cih kammal kimu leuleu hi. Ngaihsutna, kampauna leh gamtat luheekna ah thusia kici khempeuh panin kiheiisanin a pel mi ahi hi. Mawh liang kei peuh leh ci-in mawh theihna khialh theihna tawh a kinai peuh ah a omom mi hi lo hi. Tua sangsikin, mawhna khialhna leh siatna kici thusia khempeuh pel ngiat hi. Late 1 sunga Pasian’ mipa i lungsim sung ah hong suak pahlian hi. En huai mahmah a, etteh huai mahmah hi.

Hih thu lite banah, a tate zong biakna ah limtaka a pantah pa hoih mahmah khat hi lai hi. Amaute’ tang bangin biakpiakna bang piaksaksak mai hi. Job in Pasian a upna leh Pasian’ thu a zuihna pen a kilawmsakna peuh a a hi milmial a thuzuihna hi lo hi. Pasian nangawn in, “Leitung ah amah tawh kibang kuamah a om kei hi; amah thutangin paubang lo a, Pasian a kihta gamtatsia a pel mi khat ahi hi” ci-in teci pansak tangial hi (Job 1:8).

Tua banga Pasian a up ngeungau manin Pasian in zong Job thupha tampi na pia hi. Nisuahna lam ah a haupen mi hi a, a zi a ta tawh a innkuan uh zong noptuak mahmah hi. Lawm leh gual zong hau mahmah hi. Mimal ahi a gam khat minam khatpeuh ahi zongin Pasian’ deihna tawh kituakin nungta-a mawhna leh thusia pel-a thutanga nungtate peuhmah leitung thupha hauhna liatna i cihte in zui denkeii zawmai hi. Tua hang mahin “Topa pen Pasian-a a nei minam thupha ngah ahi hi” ci-in Late 33:12 ah hong kigen hi. Pasian’ deihna mah zong tangtangin Ama’ lungsim i tuah ding bangzahin thupi!

Tuhun ciang bangin nidang Pasian um mi a tam mahmahna Nitumna gamte ah Pasian om lo cih atheism upna a nei mi peuh tampi om ta mawka, leitung thu bek ultunsakna secularism a kipan Pasian peuhmah ngaihsut-a a kinei vet lo mihing bek a kithupisak socialism leh communism cih bangte kithupisak ahih manin nidang ciangin bang ciang hong suak ding uh hiam cih pen a lunghihmawhhuai leh a lungkhamhuai tham thu ahi hi. Pasian bek in a lapsang nopte lamsanga a niamkhiat nopte niamkhiat thei hi. Tua Pasian a thei leh a nei mite sanga hampha zaw kuamah a om thei ding hi lo hi!

Laisiangtho sunga Job thu leh Laisiangtho tangthu buppi in Pasian umte in hih leitung i nuntak sung leh hong tung ding tawntung hun dong ah nuntakna leh thupha ngah uh a, Pasian a um lote tawlkhat sung a nuamsa tawh a kibat uh hangin a tawpna ah Pasian’ hamsia leh sihna bek a lawhtak uh hi, ci-in teltakin hong hilh hi (Late 73 limtak sim lehang kitel mahmah hi).

2. Job: A Thuak Zia-etnate

Job 1:8 ah Pasian, “Ka nasempa Job na ngaihsun kha ngei hiam?” ci-in Satan na dong hi. Satan in zong, “Job in a mawkna-in Pasian kihta ahi hiam?” ci-in Pasian in hauhna leh daupaina a piak man-a Pasian a kihta bangin na gen hi (Job 1:9). Pasian in Job’ kiim ah dai kai-in kemin hu a thupha pia ahih manin Job in Pasian kihta-in Satan in zong zia-et dinga a ngaihsun kha ngei lo bangin gen hi. “Ahi hangin na khut zanin a neihsa khempeuh suksak lecin na maitangah hong hamsiat taktak ding hi” ci-in Pasian na to hi (Job 1:11, ZIV).

Pasian in a nasempa thupha a piakna thu bel Satan in thei takpi mah a, ahi zongin tua thuphate hang beka Job in Pasian a it leh a kihta ahih lohna bel na thei het lo hi. Pasian in a dai kaihteng hemkhia-in Satan in Job’ neihsa khempeuh a ut banga a bawl theih nadingin phalna pia hi. Ahi zongin tua phalna pen a kiciangtan phialna hi.

I tha lak theih nading thu tampi om hi. Pasian’ tate in zia-etna i thuak kha thei ding hiam? Kithuak kha thei lua hi. I patauh ding leh i lau ding thu ahi hiam? Hi het lo hi. Banghang hiam cih leh Pasian’ ciangtanna khengin Satan in zong bangmah sem thei lo a, Pasian’ deihna (God’s perfect will) ahih kei phial leh zong Pasian’ phalna (God’s permissive will) lo-in Satan in zong bangmah sem thei ngei lo hi, cih Laisiangtho, a diakdiakin hih Job bu sung panin kitel mahmah hi. Tua ban ah I Corinthians 10:13 ah, “Note in mihingte tuah ngei zia-etna longal na tuak kei uh hi. Pasian a muanhuai hi; na thuak zawh loh ding zah val zia-etna hong tungsak kei ding hi. Ahi hangin note hong kizia-et ciangin na thuakzawh nadingun suahtakna lampi hong bawlsak ding hi” ci-in teltakin hong hilh hi.

Pasian’ phalna tawh Satan in Job zia-et thei ta hi. Pasian’ phalna ciangciang leh Pasian’ ciangtanna a kheng lo ciang bekin nasem thei hi. Pasian mah thuneipipa (sovereign) hi den hi. Satan in Job’ neihsa leh a tate su thei ta hi. Suksak takpi hi. Ni khat thu-in tua khempeuh zut khat kisuah-in beimangsak hi. Job bel su thei lo hi. Ama’ pum lang ahi a zi zong su thei lo hi. Pasian’ ciangtanna ciang bek suahtakna leh vangliatna nei hi. I nuntakna leh i hun i vaite Pasian’ khut sungah muanhuai mahmah hi. Pasian in hong kem ahih manin leitung ah i kihtak ding khat beek om lo hi. Pasian’ kepna sung ah lungmuanhuai lua mahmah hi.

A. A Tate leh a Neih A Lam

Satan in bel na a sep ciangin kuamah dawm het lo hi. Pasian’ phalna tawh Job a bawlsiat lai-in zong damdamin sem lo hi. Thakhat thu-in, ni khat thu-in a tate khempeuh leh a neih a lam khempeuh hawkkhiatsak hi. A kihehnep zawh nading, a lungsim a a ngak theihna leh a kikhuangkhoh theihna khatpeuh a om nadingin a lungsim a khin a daih theih nading hun nangawn pia vet lo hi. A nat dan ding bel gen zawh hi lo hi. Gel theih vet ding hi lo hi. A supna lian lua hi. A tate khempeuh leh a neih a lam khempeuh! Ngaihsut zawh ding hi vet lo hi!

Ahih hangin, Job in Laisiangtho sunga upna tawh kam kipau khempeuh lakah a lamdang pen kammal tawh a upna na pulak hi: “Ka nu sung panin guaktangin ka suaka, guaktang mahin ka ciah kik ding hi. TOPA in hong pia a, TOPA mah in lakhia hi; TOPA min kiphat hen” (Job 1:21, ZIV). Job pen a piang khempeuh ei cih theih om kei ci-a a pum thuak fatalist hi lo a, dahna haksatnate kha-pet a thuak keiikaii zo pong stoic khatpeuh zong hi lo hi. Haksa sa khol lo a thuak zo ngiat lel pong zong hi lo hi. A dahna lian mahmah a, a puanpi balkekin a lu mettol hi. Dah mahmah hi. Ahih hangin Pasian mawhsakin phunsan, nungngatsan dek lo hi. “Tua ciangin leituak ah boksukin (Pasian) bia hi,” ci zawsop hi (Job 1:20).

A neihsa khempeuh a pia pa Pasian ahihna thei gige hi. Thupha a san khempeuh a “nak” (source) Pasian ahihna mangngilh lo hi. Leitung ah naungekin a suah lai-in bangmah keng lo-a suak hi a, hih leitung a nusiat ciangin zong bangmah keng lo-a pai ding ahihna tel gige hi. Hih leitung ah a hin sunga a neih bangbang Pasian’ thupha ahih lam thei mahmah hi. A dahna na mahmah-in kha ngeungau dinga a supna lian mahmah hi ta leh tua banga a thuak hun tektek mahin Pasian bia ngiatzen hi. Pasian a biakna in Pasian a muanna leh Pasian tunga a kingakna hong lak hi.

B. Satan in Ama Pumpi Mahmah Bawlsia

Job in zia-etna dawl masa zo hi. A zi in zong zo leh kilawm hi. Pasian’ hoihna a phawk gigena tungtawnin zia-etna na zo uh hi. Tu-in zia-etna nihna hong pai ta hi. Ama’ pumpi mahmah kibawlsia ta hi. Satan in, “Vun tangin vun! Mi khat in a nuntakna tangin a neih khempeuh pia mah ding hi. Ahi zongin na khut zan in a sa le a guhte suksak lecin na maitang ah hong hamsiat taktak ding hi” ci-in Pasian na to hi (Job 2:4, ZIV). Satan in Job’ pumpi mahmah a bawlsiat theih nadingin Pasian in phalna pia hi, ciangtanna tawh hi leuleu a, Satan in a mi bel thah theih nading phalna ngah lo hi.

Tua a kiciangtanna i cih zenzente Job in lah thei kha lo, a zi leh a lawmte in zong thei kha lo uh a, a sawt lo-a Job a si dingin ngaihsun uh hi. Zia-etna masa a paltan zo a zi mahmah in zong a pasal’ thuak haksatnate a muh ciangin gentheisa lua zong hi ding hi ve’n, a upna zong kiam duaiduai vat hi mawk ahi hiam, Pasian nusia a a haksatnate panin a suahtak nadingin a sih suk mai ding bang na gen khia mai ta hi (Job 2:9).

Job in bel suangmanpha tawh a kibang kammal manpha mahmah khat tawh na thukkika, “Numei hai khat bangin lah na pau a, Pasian tung panin a hoih sang hi lo i hi hiam? Gimna zong i san ding mah hi lo hiam?” ci-in na dawng hi (Job 2:10, ZIV). “Hihte khempeuh ah a kam paunate panin Job a mawh kei hi” ci-in Laisiangtho in hong gen hi (Job 2:10).

Job’ upna bel khuapha-a ni peuh a tan silsel ciang beka Pasian a muang thei mi pawlkhatte’ upna bang hi lo hi. Nop hun leh dah hun-a Pasian tunga a kinga den upna ahi hi. A tawp donga a thuak keiikaii a manpha mahmah upna ahi hi. A lungsim bek hi lo-in a kam nangawnin mawh lo khial lo hi. A tawpna ah amah a hehnem dingin a lawmte hong pai uh hi. A tupna uh bel a lawmpa uh hehnem ding, a lawmpa uh thapia ding, cih hih tuak sam hi. Ahi zongin tuate mah zong Satan in zangin Job adingin hehnepna suak lo uh a a thuakna leh a lungsim gihna kibehlapna suak zawsop uh a, Job adingin Pasian tawh kinaina sangin Pasian tawh kigamlatna tun zawsop hi.

3. Job: Ama’ Ading A Tel Hak Mahmah Thuhaksa

Haksatna sawtpi i thuak ciangin i pumpi leh a lungsim mahmah hong sukha-in hong zawngkhalsak hi. A pumpi tung ah a na ngaungau-in thuaka cik ciangin si ding cih kithei lo a a om laitakin Job zong Pasian a muanna leh a muanlah dekdekna kikal ah kilumlet (oscillating) niloh hi. Job bek hi het lo-in natna satna sawtpi a thuak mi tampi i muh i theih om-a, tua bang mite zong Job bangmahin upna leh uplahna, Pasian muanna leh muanlah dekdekna kikal ah a lungsim uh kibuanbuan niloh-a om i theih tampi om hi.

Khatvei leh Pasian muang mahmah, muang hanhan keii, a den mah ciangin muang zo lo dinga kithawi zel, cih bangin ki-om thei lua mahmah hi. Tua banga i om ciangin i mimal pianzia personality nangawn hong sukha thei hi. Job bu a lian thum sunga Job leh a lian khat leh nih sunga Job kibang pha het lo a, a mi tuam tuak hi phial leh kilawm hi. A kibatna zong bel om tham-a ahi zongin a kilamdang ding tawh a kibatna zong tampi mah om hi. A upna a khahsuah ahih loh hangin a lungsim leh a pumpi gim lua a khatveivei uplahna leh muanlahna, lunghianna leh lungheiineihna hong kilang thei zel hi.

A lawmte khempeuh in tua banga Job in a tuah thute pen Pasian in a mawhna hanga thu a khenna hi, cih vive tawh Job na mawhsak sawnsawn uh hi. Mi khat in ama’ dikna hangin daupaina leh thupha a san mahbangin a mawh a khialhnate hangin Pasian’ thukhenna thuak den hi, ci-in Job na mawhsak den uh hi. Tua pen Job adingin a tel hakpen thu hong suak hi.

Amah leh amah lah a mawh a khialh loh lam kitel mahmah hi napi-in a thuak haksatnate lah thuakhak mahmah ahih manin Job adingin baih het lo ding hi. Amah leh amah a kicing khin keii mi ahih loh lam zong kithei mah hi (Job 13:26), ahi zongin tua bang haksatnate a thuak dingin mawhna a bawl het loh lam zong kitel mahmah hi. Amah a hehnem dinga hong pai a lawmteng in amah a hehnep sangsikun mawhnei ahih mana tua banga thuak hi, ci-in mawhsak niloh lai uh hi.

A masa penin, Eliphaz in Job in mi thanemte thuhilh-a tha a piak theih denna na phawkkiksakin (Job 4:3-5), Pasian a kihtakna leh a lungsim thutanna a gen khit ciangin (4:6), a gen nop bulpi na genin a kap nopna mun a target na kap hi—na vawh banga at hi teh—“Tu-in ngaihsun in: Mawhpeng kimlai kua sia ngei ahi hiam? A thutang kimlai kua kisusia ngei hiam? Gitlohna lo-a khote leh buaina a vawhte in tuate mah a at lam ka thei hi. Pasian’ husan-in amaute kisia uh hi. A hehna mutin a mangthang uh hi” (Job 4:7-8).

Mihing kici peuhmah mawhnei ahihna na gen-a, “Amah a piangsak Pa’ mai ah kua mawhpeng thei peuhmah ding ahi hiam?” ci-in na mawhsak hi (4:17). Vantungmite nangawn a mawhna bangun thukhen ahih leh tungman leibuk sunga teng mite leltak mawhsak zaw lo ding ahi hiam? ci-in a mawhna na kawk hi (4:17-19). “Thuaksiatna i cih leivuii lak pan-a hong pai hi kei” ci-in na mawhsak hi (5:6). A tomin, na thuaknate a mawk pian cih bang hi lo a, na mawhna hang hi, cih hi mawk hi. “Na mawhna kisik-in, tua hi leh na thuakna Pan suakta ni teh” cih hi den hi.

Ahi zongin Job in lah mawhna a bawl het loh lam kitel mahmah zel hi. A lawmte in a mawhsak bangin Pasian’ tung ah mawh het lo a hih lam kitel mahmah hi. Hih zong Job ading a haksa mahmah thu ahi hi—a mawh lopi a mawh-a kingawh, a mawh lohpi thukhenna a thuak banga kingawh! Job bel amah leh a mah mawhnei mi ahih lam kithei lua mahmah hi (6:3), ahi zongin banghanga Pasian in tua bangteng thuaksak hiam, cih tel zo mahmah lo hi.

A lawmte in lah mawksak semsem, ama’n lah thuaklah semsem-a a nunung lam ciang bangin Pasian’ hawmsiamna (providence) nangawn muanglah leh a kilawm hun hong om hi. Pasian in midik leh mimawhte susia khawm leh kilawmsa mai hi (9:22). Migilote bang khatveivei nuamsa zawsop mai le uh kilawm hi (21:7-34). Pasian in Job a mawh loh lam a theih hangin ama’ tunga a tunsak haksatna pan suaktasak nai lo a (10:7), ama’ tung ah thumaan lopi-in Pasian in bawl taktak hi, ci-in Job in ngaihsun hi (19:6).

Job in bangbang a gen zongin amah leh amah a mawhna a kipholaak niloh hi, ci-in Aliphaz in na mawhsak hi (15:5-6). A thanem mahmah laitakin a lawmte in hehpihna leh hehnepna peuhmah na lak vet lo uh hi (6:14). A lawmte’ muhna ah, mawhna hanga kithuak hi a, Job in hihzah-a thuak ahih manin a mawhna lian mahmah ding hi, cih vive hi ziaulel hi. Amawhna mu thei lo ahih leh ci-in Epliphaz bang in a banban-in na khilsuk ngekngek zawzen zenzen hi (22:5-11). Amau’ laka khangnopen Elihu bangin Job in Pasian’ mai-a a mawhna na behlaplap lai hi (34:7-8). Job in thuakhaksa mahmah a (19:2-3), hehnem siam lo taktakte ahihna uh na gen hi (16:2). Amauteng a sih uh ciangin pilna (wisdom) zong amau tawh si khawm ding maw! ci-in na engko hi.

Job bu sung buppi ah a kibuaipih thu hih ahi hi: thumaan mite nuamsa daupaii uh a mawhnei mite in hatsakna tuak uh hi. Job in hih zahta-a thuak ahih manin mawhna nei hi; Pasian in daan a piakna-a hih zah-a thuak hi, cih ngaihsutna hi. A lawmte in tua bangin ngaihsunin mawhsak uh a, Job in tua bangin ngaihsun kha-a amah lah mawh kisa peuhmah lo ahih manin hingim mahmah-a, a thu a la a cingin Pasian’ thukhen zum ah sung nuam mahmah hi. Pasian’ nasep zia tua bang hi lianlian het lo, Pasian pen “formula” banga ngaihsut ding hi lo, cih i phawk ding hih Job bu in hong hilh hi.

Vantung-a vai kihawm Job a kizia-etna ding vai ah Pasian in Job midik ahihna thu li bang tawh teci na pang ngeungeu a, Job a mawh a khialh man-a daan a kipia hi peuhmah lo hi. A tom-in gen lehang, i tel zawh het loh thu tam mahmah ahih manin a thuneihna tawh Pasian’ hawmsiamna (sovereign providence) muang khial het lo a, na khempeuh ah Pasian mah i muan tinten ding ahi hi. Hauhna liatna khempeuh thupha, hatsatna khempeuh “daan’ (punishment) cih bang lianlian formula pen Pasian “box” sunga guanna ahi hi. Pasian in Ama’ pil luatna leh eite hong it luatna tawh Amah thungeipipen ahihna tawh na khempeuh a vaihawmnate khempeuh upna muanna tawh i pom ding ahi hi.

4. Job: A Upna

Bangbang ahi zongin Job in a upna khah mahmah lo hi. Huihpi’ mut gawpgawp tembaw bangin a ciangciang panin zia-etna a thuak hangin Job in Pasian mah muang ngeungau hi. Ci le sa, Dawimangpa, leitung leh a lawmte’ tung panin zia-etna tatsat lo-in thuak niloh hi. Pasian in Job’ tung/sung ah nasep hoih khat pan khin-a, Khris Jesuh’ ni-a a kicin dongin tangtungsak ding hi (Phil. 1:6). Haksatna a tuah uh ciangin mite in Pasian taisan thei uh hi. Job in bel taisan peuhmah lo hi. Pasian’ thu nial lo, Thahatpa’ kihtakna nial lo ahihna na gen hi (6:10,14).

A sih dongin (Pasian in a that phial zongin) Pasian bek mah a muan veve nading thu na pulaak hi (13:15). Ama’ ading teci a pansak ding vantung ah Pasian a om gigena na khamuang hi (16:19). Zia-etna khempeuh a ven ciangin kham citak banga siangtho ding, cih zong na um hi (23:10). Khatveivei Pasian muanglah dingin kithawi mah taleh, Job in a upna khah peuhmah lo hi. A tel zawh lo thute tua bangmah-in om taleh, ama’ adingin a upna pen gualzawhna (faith is the victory) hi mawk hi!

Job 19 pen Job nuntakna a niampen hun laitak ahi hi. Kihehnep nading peuhmah om lo, a zi in zong hua ta, a sanggamte zong om nawn lo, a nasem ahi ngeite nangawnin zahtak nawn lo, lampi a naupangte in simmawh, a lawmte in mangngilh mang khin uh hi (19:13-19). Pasian nangawn in a nusia khin bangin ngaihsun hi. “Singkung bangin ka lam-etna hong zunglot khin hi” (19:10) na ci ngeungau tangial hi.

Tua bang hun lian mah-in a upna mah tawh Pasian’ lam ah na kiheii a, “Kei adingin, kei hong Tanpa nungta hi” ci-in na pulaak lian hi (19:25). Ni tawp ni cianga leitung ah a dinmun a lak ciangin a vunte a kisuksiat khit hangin a mit mahmah tawh Pasian a muh nading na pulaak hi (19:25-27). Hih leitung ah a mawh het lopi-a thuak ahihna a kilat kei leh zong thawhkik ni ciangin Pasian in ama’ dikna pulaak veve ding, a mit mahmahin mu ding, amah a diksak Pa Pasian mahmah mu ding ahihna na pulaak hi. Job in upna nei hi. Pasian ngiat upna muanna ahi hi. Tua lian mah in amah gualzawhna pia hi.

5. Job: A Pasian

Elihu in huihpi thu a gen khit phet mahin tua huihpi sung panin Pasian hong paukhia hi (Job 38). Pasian in Job thusit dikdek hi. Pasian’ thukhen zum ah a thu a sung nuam den Job in tu-in a thu sung thei ta ding hi! Nate a piansakna thu na dong hi. Nate’ lakah a ut peuhpeuh—tuipi thu maw? khuamial khuavak thu maw? huihnun guahzuk dan maw? vantung aksite’ thu maw? Ganhingte’ thu maw? Pasian tawh kimu thei leh a, Pasian’ mai ah a thu sungin a dikna thu, a mawh lohna thu gen thei hi leh a ut mahmah Job in a gen ding thu om nawn lo hi.

A dot ding lah om kei, a dawn nading lah thei kei! “Kei kilawm zo kei lua ing, bang hong dawngkik mawk ding ka hi hiam?” na ci bek hi (40:2-4). Ama’ mawh lohna a suang mahmah Job in a gen ding om nawn lo hi. Kimuan nading nei nawn lo! Pasian bek muang ta hi! Pasian in dot behbeh lai hi—Behemoth a kici leh Leviathan a kici ganhing golpite tawh kisai bang peuhmah thei ahi hiam, ci-in Job dong hi. Job pau lo hi. Ahi zongin “vut khu vai khu” (dust and ashes) in kisikkik hi.

Banghangin kisikkik zenzen ahi hiam? Mawhna bawl lah hi peuhmah lo a, bang kisikkik nading om ahi hiam? Nate’ thu, ganhingte’ thu, tuipite thu peuh hong kidong leh i theih kei leh zong kisikkik nading thu om zenzen lo hi. Banghangin Job “kisikkik” mawk ahi hiam? Tuate’ thu theih leh theih loh ciang bek hi lo-in, tuate sanga thupizaw khat om hi! Pasian in ciangtan om lo a kicinnate (infinite perfections) Job tung ah na laka, a diakdiakin a pilna leh a vangliatna (infinite wisdom and power) na lakkhia hi.

Huihpi sung panin Pasian in Job na hopih a Job in a leitung mit tawh hi lo-in a hinna kha mit (the eye of soul or the eye of faith) tawh na mu thei hi. “Ka bil-a zakna tawh hong za ngei ing, tu-in bel ka mit in kong mu khin hi” na ci ngeu hi (42:5). Nidangin Job in Pasian’ thu thei mah a, tu-in Pasian ngiat thei ta hi, cih theih hi mai hi. A thuakna leh Pasian tawh a kimuhna tungtawnin nidanga Pasian a theihna pen zakna tawh theihna bang lel a, tu-in bel Pasian taktak a thei ngiat tawh kibang ta hi.

Tua hang tektekin “kisikkikna” a om loh a phamawh ahi hi. Na khempeuh ah Pasian kicinga, a hawm a genna khempeuh ah kicing hi. A pilna zong ciangtan om lo-in kicinga, tua ahih manin Job ading (leh eite’ ading) a a ngimna leh a sepna khempeuh ah khialhna om lo-in kicing hi. Job in Pasian um mahmah den hi napi Pasian a theihna leh a telna kicing lo lua ahih manin a upna neu thei zel-a kiciangtan peuhmah mawk hi. A upna ah na hoi dekdek mawk hi. Tu-in bel Job in Pasian thei ta hi. Pasian’pianzia khempeuh a theih zawh ngei loh ding hangin a piang na khempeuh ah Pasian muang thei ta hi. “Tua ahih manin ka tel lohpi thu ka gen hi. Ka theih zawh loh kei’ ading a lamdang lua mahmah thute ka gen kha hi” ci-in na pulaak hi (42:3).

Pasian in a mah a muang a nasempa’ nuntakna ah a nasep a khin pianpian hi ta hi. Pasian in Job siansuah takpi a a upna khangsak takpi hi. Pasian in Job in amah a theihtelna mahmah zong khangsaka a kizopna uh zong nidang sangin thuk zaw hi. Upna thu tawh kisai-in eite khempeuh ading etteh hong suak hi. Ama’ hun lai-in mite’ ading etteh hi a, khang a khangin upna thu ah ette hi den hi (James 5:11). I nuntak sungin kicinna (perfection) tung zo ngei lo mah ding hi hang, ahi zongin Job bangmahin Pasian i theihna leh i upna ah a kikhang thei lua ahi hi. Pasian’ hihna taktak a tel ciangin “vut khu vai khu-in” Job a kisikkik mahbangin nisim-a Pasian’ kiang i zuat ding ahi hi. Pasian’ tung bek ah Job kinga hi—a lawmte, a innkuanpihte, a beh a phungte, amah mah nangawn muan theih ding om lo -Pasian bek muanhuai hi.

Upna ah i khantoh theih nadingin Job in Pasian a muh banga i muh ding kisam hi. Huihpi piingpeii sung panin Pasian in hong hopih lian loh hangin na dang khempeuh sanga a kician zaw ama’ thu i nei hi (2 Peter 1:19). Pasian in a hu a muap Laisiangtho sim-in Khasiangtho lamlahna tawh Pasian thu i lungngaihna tungtawnin Pasian in i upna hong khangsak hi. Pasian tung ah hong kinga zosak semsem hi. Ama’ thu sung pan mahin ama’ aw za a, a kicinnate i muh semsem ding kisam hi. Haksat hun leh haksat ni hong tun ciangin—zong hong tung pelmawh ding hi a-eite’ mai-a pai khin i etteh ding Job bangin Pasian a muangte i hih ding kisam hi.

Thukhupna

James in: “Zia-etna tuamtuam na tuah uh ciangin, sanggamte aw, lungdamna-in ngaihsun un” ci-in hong hanthawn hi (James 1:2). A tamzaw in bel tuaci ngaihsut khol lo hi hang. Hi thei liai hi leh zia-etna leh haksatna bel pelh theih laiteng mah a kipelh nuam hi zaw mai hi. Ahi zongin upna tawh a nungta taktakte in bel tua bang zia-etnate tungtawn bek mahin Pasian tung ah kinga a Pasian i muan theih nading i kisin theihna hi zaw hi, cih thei sinsen uh hi. Haksatna i tuah ciangin Pasian’ tung ah kiko hanga Pasian in hong za-in hong makaih a, i kisapnate hong pia takpi hi.

Upna tawh i nuntak ciangin i nuntakna ah Pasian hong kilang takpi a, a nungta Pasian (the Living God) ahihna kimu semsem hi bek hi. Ama’ thute nuntakna ahi, a tatnate a kicing den, a sepnate ah a thutang den, Jesuh Khris tungtawn-a hong hotkhiatna bek mah eite’ lam-etna leh i khamuan leh i kisaktheihna ahi i biak Topa Paian mitsuan gige ni! (Berean EBC, RTC, Kalemyo Kum 25 cinna leh biakinn honna ciamtehna laibu sunga suahsak ding aka gelh hi. Russell Fuller, “The Book of Job and Suffering: A Sermon” SBJT 17.4 (2013):50-55 sung pan ngaihsutna tampi ka ngah hi. Rev. Zam Khat Kham)