Jews minamte’ ong lak Zomite’ mailam kalsuan zia ding ~ Khup Lian Thang

Jews minamte’ ong lak Zomite’ mailam kalsuan zia ding ~ Khup Lian Thang

Leitungah minam tampi te, leitang leh mun leh mual anei hi napi in hun paizia kikhelna hangin apianna aleitangh te nusia in minam dangte lak kitheh thang uh hi. Hih bangin munkhat pan mun khat ah lal kawikawina ahang tampi om ding himah leh , ahangpi nam 2 in kiciamteh zaw hi. Khatna ah gal leh sa tam, gal leh sa lelhna hang hi. A nihna ah mun hoih lei hoihna leh nuntakna anuam zaw dingmun lam zuan in lalna ahi hi. Rev. Dr. Jm Paupu’ at “Zomi in Diaspora” acih na ah Zomite zong a gam alei bulpi panin lal khia uh aa tu in ahih leh leitung gam 34 bangah ki zel ta ahihna na gen khia hi.

“Zomi in Diaspora” sungah Zomite apianna Zogam pan mun tuamtuam a lalna ahang nampi 5 in na gen hi. 1) Zawn luatna 2) Biakna upna leh suakta takin thugen thei lo 3) Gam vai leh sum zonna paaizon na ah lungmuanna omlo 4) A nuam zaw, a hoih zaw lam-etna leh 5) Pasian’ gelna hang hi, ci-in ahang nampi nga in na gen hi. Tua ahih leh hih bangin hih bangin apianna Zogam leitang pan zin khiakhia in or minam tamzaw leh tu laitak ukna nei minampi te khut sungah a neihsa uh Zogam leitangh leh aminam a mangthang dinga lauhuai dingmun hita mawk lo hiam? Zomite tawh pianzia a ki bang minam tampi lak pan in khat ahi Jews mite thu tawm kikum dih ni.

Jews akici Israel/Hebrew minam te

BC kum 1900 pawlin Abraham in Canaan gam ah na tenga, ama ta Issac, Issac’ ta Jacob hi in, Jocob in amin Israel in khel aa ama neih ta 12 te zong Israel minam pi 12 te hipah hi. Hih minam lianpi te hun saupi sung kumpi cih dan neilo in kamsang te, galhang te in a minam leh gam makaih hi. BC kum 1030 pan in kumpi ukna tawh kalsuan a, BC 1010kum ciangin a thahat leh a vanglian mahmah kumpi Judah minam David in Israel gam na makaih hi. Tuni ciang dong mah Jews mite in aki pakpih a angtangpih pen kumpi ahi hi. Galhang in thahat a, pil eh ciim mahmah in vangnei mahmah hi. A tapa kumpi Solomon hun ciangin vanglian semsem aa, Israel zong leitung ah gamhau leh gam thupi mahmah khat ong suak hi. Kumpi Solomon pen pil mahmah ahih manin leitung kiuli pan in kumpi tuamtuam te in thudong ding, a thugen ngai ding in pai uh hi. Gam leh lei, minam nuntakna khangto mahmah hi.

Solomon tapa’ Rehoboam hun ciangin Israel gam zong khennih in kisuah a, Judah-Benjamin-Levi minam teng kigawm in Judah gam (Leitaw lam) phut uh hi. A dang minam 9 teng kigawm in Israel gam (Leilu lam) ci in Israel gam phelnih kisuah uh hi. Tua akikhen khit hun aa kipan in a gam leh minam ii min leh vang, hauhna leh thuneihna ah lam ah apu a pa te banzo nawn ngiatlo uh hi. BC 700kum pawl ciangin Israel kumpi gam (Leilu lam) pen gamdang minam dangte huzap in beimang ta hi. Tua zawh kum 100 khit pawlteh Judah kumpi gam (Leitawh lam) zong na bei leuleu hi. Tua khit pen kipan minam dang gamdang kumpi liante huzap nuai ah om in kumpi gam kician neizo nawnlo uh hi. AD kum 70 ciangin Roman kumpi in Jerusalem a suksiat gawp pan kipan in Jews mite pen leitung kiu li ah a ki thehthang mang uh hi. Kum 1900 val bang leitung mun khempeuh ah aki thehthang na panin 14thMay, 1948kum ni in a neihsa uh Leitangh, apu pi Abraham’ leitang tungah khatvei gam thak khat in kipan kik in, apianna gam leh leitang ah Jews mite ong ciah ngeingai kik uh hi.

Jews mite gamdang ah

Jews minamte pen atuntun na mun leh gamte ah alamdang takin madawk gual tungtuang uh aa, pilna ciimna siamna, hauhna lam ah mite’ tung, mite sangin na madawk zaw ngiat uh hi. Leitung biakna thupi leh mi tampen ahi Christian biakna ong piankhiatna bulpi hita leh aki zelh nangin ahanciam nungzuipite khempeuh zong Jews minam te vive ahi uh hi. Jews te biakna ahi Judaism pen leitung ah biakna lianpi khat in aki ciamteh mah ahi hi. Gam ki ukna vai ah amin thang mahmah ahi Marxism (Socialist leh Communist pianna bulpi) a mukhia zong Karl Marx akici German Jew te khat ahi hi. Leitung pianzawh Scienctist minthang pen ding aa aki ciamteh khat ahi Albert Einstein zong Jews minam mah hi in, leitung kum 100 sung(AD1900-2000) sungin hih zahin akhangtohna hangpen ama hang hi ci in kiciamteh phial hi hi.

Tu laitak amin thang penpen, ahoih lam in ki zang thei leh lah ahoih mahmah, asia lam aa hileh lah alau huai mahmah ahi Nuclear bawlna ding lampi amukhia zong Albert Einstein mah ahi hi. Leitung ah gam vanglian pen thunei pen ahi USA gamvai ah thunei mahmah in, Jews mipil vive tengtawh akalsuan uh na hi gige hi. Federal Reserve aki ci a Central Bank leh Bank khempeuh a uk, USA aa sum khempeuh a zek , tu laitak a Chairman pen Ms Janet Yellen hi in, ama hunma Chariman nihte zong Jews temah hi in tukum tawh kum 30 sung aki zom in makai suak mawk uh hi. Thu neilua mahmah ahih manin amau kampau ziauna hangin Stock Exchange bang kah ziahziah or kia ziahziah in kikhel ziahziah zo mawk hi.

Jews te in a gam leh lei lakik

Amun mun ah mite sangin pilzaw hauzaw in aom hangin amimal in minam dangte sangin tawmzaw limlim uh ahih manin gawtna sim mawhna na thuak uh hi. A diakin Germany gam makai Hitler in gam makai asep ciangin amau Gemerny minam aa ci-in Germany minam itna khauhvallua ahih man in , amau sangin ahau apil zaw Jews te mudah in mimal 6,000,000 bang cikziat huai takin that gai mawk hi. Hih vai hangin leitung gam makai khempeuh in zong Jews mite lai nat mahmah uh hi.

Jews minam makaite khempeuh in nakpi takin hanciam in a gam a leitang ahi Canaan gam pen British kum khut sungpan in angah nangin lam tuamtuam tawh hanciam uh hi. Chaim Weizmann acih mipil Jews Scientist pa’ makaihna tawh galpi khatna lai-in galvan aa kizang thei a thupi mahmah khat mukhia a, galpi khatna ah British te’ gualzawh nangin athupi mahmah muhkhiatna in kiciam teh hi. Tua amuhkhiatna hangin British kumpi te nuam mahmah ahih manin lungdam akoh kikna in Middle East ah Jews gamkhat phuh khiat nangin huhtheihna pan huh in panpih dingin kamciam pia uh hi.

A leitang aphual ah David Ben-Gurion (Prime Minister maka pen) makai in amun leh a mualte thautawi in panmun na lakhol uh hi. Leitung bupa om amipih khempeuh tungah tangko in thu zasak in agama lei ah ciahin aneihsa uh leitang alakik dingin hanthawn hi. Jews mite tampi tak Palestine gamah ciah in Israel Gam phuh nangin hanthawn hi. Lampi tuamtuam in Jews mite alomlom in Palestine gam lutpih hi. Lampi tuamtuam zongin thauvui thangtang khawm hi. Palestine gam ah a ciah theilo ten amau septheih sum leh pai tawh huh in akisam thauvui thautang zatui zaha lei uh hi. Mangkang kumpi te panpihna hangin buaina kido kikapna lianpi omlo in gam lianpi leitangh lianpi khat ong ngah kik uh hi. A pu a pa gam na lakik zo uh hi. 1948kum 14th May in suahtakna tangko uh hi.

Israel gam kipsuak

Gam aphut khit pan kipan in tuni dong gal kidona, sisan naisan luanna beizo nailo hi. Tua hun laitak in a inntek leh agam alei anei Palestine minamte leh a Muslim mipihte in thangpai in nasa mahmah uh hi. Kum 1900 sung bang innteek dinmun panin zan khat thu in gam leh lei neilo suak ziau uh hi. Tua hangin hehlua uh ahih manin sun leh zan in nawtnawt uh hi.

A Muslim gamveng te ahi leitawh lamah Egypt, nisuahna lam ah Jordan, Syria leh leilu lamah Lebanon gamte in Palestine mite gumzaw ciat ahih manin lauhuai mahmah dinmun ahi hi. Tua ahih manin suahtakna ngahkhit aa kipan in kido kikapna om den in alauhuai mahmah gal maitang ongsuak mawk hi. Suahtakna ngahkhit phet 1948kum in in Arab gamte (Arab Alliance) tawh kido na lianpi om pah hi. Amin thang diak kido nate in 1956kum in Suez gal, 1967kum in Six-Day War, 1973kum in Yom Kippur War cihte minthang mahmah hi. Arab gamte khempeuh (Gam 12 bang) kipawl in Israel gammi khempeuh Mediterranean Tuipi sungah nawkkhia ding cih a ngimna na bulpi ahi hi. A hih hangin, atawntung in Israel te in na zo zaw in amau neihsa gam nangawn suplawh zaw uh hi.

Tuni dongin Israel te in galmai lianpi thum ( nisuah, leilu leh leitaw lam) bang koi ci danin nawk khat in thal nawk zo mawk hiam cih pen aki gengen leh lamdang akisa mahmah ahi hi. A tunga gal kidona te ah lelh cihtak in lel uh aa, Israel te aki nawkzawhloh ding lam telta uh ahih manin Israel te tawh mah bangin ko Palestine te zong gamkhat ong pia un cih lam ah hanciam zaw ta uh hi. Tu laitak in hih bangin gal leh sa tampi kawmkal ah Israel gam pen gam haupen, gam thahat pen pen in dingzo suak uh hi. Muslim gam kici tengin aki kot, gal leh sa alauhuai khempeuh in akim kot hangin tuni dongin Israel gam pen puk tuanlo in thakhauh semsem zaw lai hi.

Tu laitak Jews minamte’ dinmun

Gam sung gampua pan in a sep abawlna, amapan khopna hangin gal lianpipi te tungah na gualzo uh hi. Gam leh leitang anei minam hita ahih manin leitung in a zahtak leh a zahtak huai minam pikhat dinmun lakik zota uh hi. Tua bek thamlo atuntun na gamte ah ni danglai mah bangin tuni dongin amadawk, aki leh apam akhel, leitung a khelzo minamte na hitoto lai uh hi. USA te’ Federal Reserve aki ci a Central Bank leh Bank khempeuh a uk, USA aa sum khempeuh a zek , tu laitak a Chairman pen Ms Janet Yellen hi in, ama hunma Chariman nihte zong Jews temah hi in tukum tawh kum 30 sung aki zom in makai suak mawk uh hi. Thu neilua mahmah ahih manin amau kampau ziauna hangin Stock Exchange bang kah ziahziah or kia ziahziah in kikhel ziahziah zo mawk hi.

USA te Gamvai ah zong 1973kum in Secretary of State a sem leh President te’ advisor saupi asem Henry Kissinger bangpen minthang mahmah in China tawh kizopna akilem na dingin avai hawmpi amah ahi hi. Tua hangin leitung sumbawlna tampi khangto in gal leh sa hihna panin nasem khawm thei dinmun ah tunzo hi. Gal leh sa in kinei henla , sum bawlna ah kizom kei uh leh leitung in bang dinmun I tung mawk tam ci-in mipil te in Henry Kissinger ii athupitna apilna gen bel in nei uh hi. President Obama hun lai in a Chief of Staff, Secretary of Treasury cih danin panmun thupi te na len uh hi. 2004kum in Democratic te’ President Candidate leh 2013-2017kum kikal in Secretary of State asem John Kerry zong Jews te mah ahihi. Tu laitak in Donald Trump ii makpa leh a Senior Advisor Jared Kushner zong Jews minam mah ahi hi. President dinga Democratic pan Hillary Clinton tawh aki dam ahi Bernie Sanders zong Jews minam mah ahi hi.

Leitung aa Media minthang tuamtuam te khempeuh zong amau khutsung ah om in, a diak in Hollywood sung khempeuh zong amau khutsungah om hi kici hi. Paunak khat bang nei uh aa “Hollywood ah amun sang na tunnop leh “P” zang kei in” ci liang uh hi.”P” pen “Palestine” acihna hi in Jews te tawh leitangh akituh pihte ahi hi. Leitung ah a popular pen ahi Facebook, Whatapps, Viber, leh Google cihte khempeuh Jews khangno mipilte patkhiat muh khiat hi zen hi.

USA aa om University minthang te’ Professor 100 lak ah 20 pen Jews te ahi hi. Leitung aa pahtawina lak ah asangpen Noble Prize angah khempeuh ii 100 ah 22 pen Jews te mah ahi hi. Leitung mihau pen 50 lak 10 pen Jews te hi in, USA te Journal leh laibu hoih, laitawh kisai ah pahtawina a sangpen ahi Pullitzer Award angah 100 and 53 pen Jews te mah ahi hi. Leitung ah bawhlung team amin thang pente ahi Manchester United leh Chealsea Football Club anei zong Jews te mah ahi hi. Tua hih manin hih minam te, leitung mimal ii 0.2% bek ahih hangin banghangin hi zah takin pilin, siam in , gualzawhna ngah mawk uh ahi hiam? Amau tung pan a pianzia aki batpih in Zomite in etteh theih ding thu tampi om ding hi mawk lo ahi hiam?

Zomite’ et teh theih ding

Tu laitak Zomite in ahih leh mundang gamdang ah aki thehthang hangin, pianna gam leh leitangh nei lai uh ahih manin a lungdam huai mahmah ahi hi. Mi masa Pu leh pate hangin leitang kician anei lai uh hi in lungdam huai mahmah hi. Khangthak Zomi te in mangngilh lo in a phawk den ding thupi mahmah hi. Ahih hangin tuhun laitak Kawlmang ukna nuai ah aom laitak hi in minam dangte’ biakna leh ngeina te in a nawmvalh thei ding dinmun, bek thamlo in Zota te mun khempeuh leitung kiu li ah kitheh thang ta ahih manin,minam mangthan theih na ding alauhuai dinmun ahi hi. Ahih hangin a tunga ih gen Jews mite zong Zomite sangin suksia zaw phial dinmun ahih hangin tu in ahih leh leitung bup in a zahtak Israel gam thupi khat a neih ban ah, a tuntunna aomom na munmun ah a gualtung tuanna tungpan in tha lak huai mahmah hi. Mimal tawmna, tu hun dinmun te en in lungkiat loh ding, mimal a tawm gam leh leitang nangawn a neilo Jews minamte pianzia etteh kawm in, Zomite’ mai lam kalsuan zia ding gualzuk dih ni,. Zomite in;

1) A neihsa uh Zogam leitang ii minphatna tel in minam dangte khutsung a tunlohna nangin hoihtak lungngai in a minam vaipuak pikhat in a neih uh hun ta hi. Ngimna leh veina a sang neih ding thupi aa, tua ngimna tungtawn in kalsuan hiathiat ding ahi hi. (Leitang pen manpha lua ahih manin sizan naisan omlo in leitang kingah lo)

2) Zomite mun dang gam dang ah ki thehthang mangkhin uh a, a tuntun na gam leh lei panin apianna Zogam phawk den in, apau a lai leh angei amangthang lohna dingin Nu leh pa te in innkuan amakaih kul dinga, biakna makaite in zong Zomite lim leh meel ahi thuman cihtakna leh itna thute agen den, atuuno te tua bang tuu-an bek tawh an a vaak loh phamawh ta hi. Jews te kum 2000 sung bang mun gamdang ah aom hangin a minam, ngeina, lai leh abiakna mangngilh lo uh hi. A khantohna thusim amangthang lohna thusim ahi hi.

3) Zogam ah inn ngak om Zomi khempeuh in pil sinna siam sinna lam ah nakpi takin hanciam kik kul ta ding hi. Zogam ki ukna gamvai ah makaih zawh kik ding hanciam kul ding hi. Ngimna neih kul ta ding hi. Kumpi zumte ah zum nasem thunei hih zawh ding hanciam kul ding hi. Tua hileh Zogam zolei pen Zomite in amau deihbang in uk in makaih thei uh aa, gamdang minam dang leh biakna dangte deepmang ding pan in dalsa hipah ding hi. Thu neihna thahatna in gam leh lei, minam te kipsak hi. Israel gamte in gam aneih hangin pilna siamna neilo in, a omna Middle East ah gam thahat lo, thuneilo khat hi leh tu in a gam beikhin tham ding hi.

4) Zogam bek hilo in Kawlgam sung gamvai kalsuanna ah inntek sep zawh ding ngimna nei in hanciam ding ahi hi. Kawlgam gamvai ah Zomite’ mi masate leh tu hun laitak makaite tangthu lianpi at khin hi. Tua tawh lungkim lo in hih sangin dinmun thupi zaw, Policy lam a khelzo, Gambup tanu pi, makaipi dinmun te ngah zawhna dingin hanciam kul ding hi. Ngimna neihna in sepzia kalsuan zia ding lampi ong hilh dinga, tua lampi tungtawn in a sep a bawl ciang bekin ngimna deihna tangtung thei ding hi. Ngimna omlo kalsuanna kician omlo in bangmah kisuak lo ding cih a tel dinguh thupi mahmah ding hi.

Kawlgam sungah om University tengah Professor pen Zomi vive hi dingin, Zato minthang khempeuh ah Siavuanpi khempeuh Zomite ahih nangin ngimna neih ding thupi ding hi. Pilna bulphuh in Kawlgam ah inntek sepzawh ding pen ngimna bulpi khatin koih ding thupi ding hi.

5) Mun dang gamdang a tung Zomi Zosuante khempeuh in Jews minamte mah bangin atuntunna gam ah inntek sawm ding thupi mahmah ding hi. Sum bek thupi saklo in a hih theih nakleh Nu leh Pa te in a tate uh pilna siamna hanciam pihin sinsak ding, Engineer, Lawyer, Doctor, Musician, Artist, Historian,etc… cih bangin leitung ah aom pilna thupi teng sinsak ding thupi ding hi. Gamvai ah zong sunglut sawm dingin MP, Minister leh President dongin ngahsawm ngait dingin Zomi nu leh pa te in a tu atate apattah ngiat ding thupi ding hi. Sum le paivzonna ah zong Millionare leh Billionare te ngimna tupna in nei in, lungdeih teng a cin ciangin a pianna Zogam Zolei leh a mipihte a en kik dingin kihilh kholh ki thuhilh den ding zong thupi sawnsawn ding hi.

6) Muhdah thangpaih nate bulphuh lo in, pilna leh thuman thutak bulphuh in Pasian ki makaih sak ding, ki batlohna teng bulphuh lo zaw in kibatna nate bulphuh zawk ding, hoihloh nate tungtawnin hawmthawhna in zanglo in panpih dinpih zawk ding, deihsakna tawh ki thuhilh nate Zogam Zolei leh Myanmar gam ah lengla lo in inntek dinmun lak ding, a neu alian a tam a tawm cih bangin khen neilo in minam khempeuh, biakna khempeuh, mite ngeina khempeuh, zahtaak sak ding thupi ding hi.

7) A tunga lunggulh teng a tangtun nangin tu laitak gamvai makaite, biakna makaite, ki pawlna tuamtuam makaite , Nu leh Pa innkuan lutang makaite dinmun thupi penpen ahi hi. Ngimna mungtup nei in, paizia kalsuan zia ding a vaihawm a gel ding pen tulaitak thu nei minam makai, gam makai, biakna pawlpi makai, ki pawlna tuamtuam a makai, Nu leh Pa innkuan lutang makaite ahi hi. Amau khutsung ah Zomite mailam ding kingah linlen ahih manin khat vei lungngai pha in kalsuan zia te ki en pha in , tua khitteh mailam nawt tohtoh ding pen Zomite mailam kalsuan zia ding ahi hi.

Zomite a tung aa thute khempeuh bulphuh in a kalsuan nak uh le, mimal a tawm hangin Jews minam te mah ban apianna gam leh lei ah thu nei in, akim leh apam aa dingin a zahtak huai gam leh minam ahih banah , leitung mite khempeuh aa ding phattuamna a piakhia zo Minam thupi Minam Lianpi suak pelmawh ding uh hi. Lungdam, Khup Lian Thang