Jesuh mitsuan upna

Jesuh mitsuan upna

Itna tawh upna kingah hi lo zawin, upna tawh itna kingah kinei hi zaw hi. Tatkhiatna ngah theihna ding vanzat khat bek om a, tua pen upna tungtawn ahi hi. Upna ih cih teh hua lai-a vokgawl khuam tungah thankik a ngawng san liklek manun la, ih vokpi nesak lecin uh ih vokpi khang hanhan pah ding cih dan upnate pawl a gen ih hi kei hi.

Hua lai-a na huang sung vua singbul, gua bul kawm tengah dawi omin, sisan takna na neih kei vua leh hoih ken teh. Vok tuk thum khat maw? Bawng no khat maw? go unla, kei hong sam unla, inn thunget na lak kei uh leh na inn sung vuah natna, sihna, kamsiatna le daipau theih lohna omom ding hi cih thusuak ka ngah hi cih dan upnate pawl a gen ih hi kei hi.

Hong kibum ahih manin hua lai-a Kawl phonggyi pa thoihsak inla bum lehkik sak in cih upnate pawl a gen ih hi het kei hi. Pasian min paulamin mi inn ah thunget sak ih pai ciangh inntekte in sum tul khat tul nih hong piak uh kul hi. Inntekte mahmah in zong thu hong ngetsakte sum tul khat tul nih piak loh phamawh hi cih upnate pawl a kigen hi lo hi. Peter in bum le aitawi, mitphial a siam Simon a kici mi pa tungah, “Pasian’ piakkhong naa pen sum tawh lei theih dingin ngaihsun na hih manin na sumteng tawh si khawm in.

Pasian in na lungsim maan ong sa lo ahih manin kote’ nasepna ah nang nong kihel thei kei ding hi” ci hi. Upna ih cih pen “Thankik aw lusu lusu, mimtang tangtang na duh leh khatvei sim lam nga, khatvei zo lam nga” cih dan upnate pawl hi lo hi. Dahpa khuang upna le pheisam siam upnate pawl upna ih ci vet kei hi. Upna ih genteh ut bangbang aa gamtat kampau theihna dingin baih lam dikzul nopna tawh a gen ih hi kei hi. Ei’ upna gen pen LST sunga kigen Jesuh Khrih ong sepsaksa ahi khatvei sep a tawntung aa kimang thupiangte tungah a kinga upna, Jesuh sungah upna hi a, tua pen Jesuh mitsuan upna, Jesuh mitsuan itna ahi hi. Jesuh mahmah upna pen upna hi.

Evan. Suang Dal