Jesu’ thawhkikna mipilte’ muhzia ~ GS Pau

Jesu’ thawhkikna mipilte’ muhzia ~ GS Pau

1. JOHN CAPELAY
A mah pen Mivomte Christian Heritage khat hi a, Cambridge University ah Professor khat zong hi. England Gam bupah thuman a gen khatin kiciam teh hi. Amah in,’Jesu’ thawhkikna pen thangthu kiphuaktawm hi peuhmah lo, a piang takpi thu ahihna a lakkhiat teci tampi om a, kuama’ nial zawh ding hilo hi ci-in gen hi.

2. THOMAS ARNOLD (1975-1842)

Amah pen England Educator leh Historian khat hi. 1828-1841 sung Rugby School ah Siapi seem hi. History of the later Roman Commonwealth cih laibu gelh hi. Tua lo Roman Thangthu tampi gelh hi.Amah in, “Kum tampi sung leitung thangthu ka kan a, ka muhkhiat thute lakah Jesu sihna pan thokik takpi ahihna thu in teci kician pen leh a muanhuai pen thu ahi hi,” ci-in gen hi.

3. LORD DARLING (1849-1936)

Amah pen England lawyer, Politician leh thukhen manglian khat hi. Amah in, “Thungaihsut theihna kicing a nei thukhenmang peuhmah in Jesu’thawhkikna thu in thuman thutak hi, ci-in thukhen ding pen lunghian nading bang mah om lo hi,”ci-in gen hi.

4. SIMON GREENLEAF (1783-1853)

Amah pen American lawyer leh Upadi siam (Jurist) khat hi. Laibu tuamtuam tampi mah gelh hi. Jesu’ thawhkikna thu a nial nading pan’san a zon’zon’ na pan hong piangthak zawsop hi. Amah in,”Jesu sihna pan thokik takpi ahihna leitung thangthute in kho takin lak hi.England gam leh America gam sung-a thukhen zum khempeuh ah Jesu sihna pan thokik takpi hi, ci-in kiciamna tuisia ka dawn ngam ding hi,” ci-in gen hi.

5. GEORGE LYTTELTON (1817-1876)

Amah pen British Milian nam (Aristocrat) leh Conservative Politician khat hi. Oxford University ah Professor khat zong hi. Amah in sawltak Paul kikhelna thu a nial nadingin thu a kankanna pan kum khat sungin hong piangthak a, Jesu sihna pan thokik takpi ahihna hong mukhia hi.

6. GILBERT WEST (1703-1756)

Amah pen English Poet, Translator leh Christian Apologist khat hi. Oxford University ah Professor khat zong hi. Amah in Jesu sihna pan thokik hi, cih thu pen phuahtuam thu hi, cih a lah theih nadingin thu a kankanna pan kum khat sungin hong piangthak hi. Amah in, “Jesu sihna pan thokik takpi hi, cih thu na kan ma-in nial thei kha mah ni teh,” ci-in gen hi.

7. FRANK MORRISON (1820-1894)

Amah pen Mivom American Artist khat hi. Jesu sihna pan athawhkikna thu nialna ding laibu khat gelh ding kipan a, a thu akankan leh pianthak lawh hi. A pianthak ciangin a laibu gelh ding min pen “Who Moved The Stone” (Kua in han sung pan suangtum liikkhia hiam) cih tawh laihkik hi. Tua laibu sungah Jesu sihnapan thokik takpi ahihna teci tampi mah gelh hi.

8. LEW WALLACE (1827-1905)

Amah pen American Lawyer khat hi a, tualgal (Civil War) lai-in Union General hi. Amah in Jesu pen Pasian hi a, sihnapan thokik hi, cih pen zuauthu taktak hi, cih laibu khat gelh ding a kipat leh a tawpna ah “Benhur” kici laibu minthang khat hong suak a, tua laibu in Jesu sihna pan a thawhkikna thu anial genloh huu zaw hi.

9. A UMLO TEITEI MIPIL NIHTE

Dutch Jewish Philosopher khat ahi Benedict de Spinoza (1632_1677) leh Scottish Historian leh Philosopher khat ahi David Hume (1711-1776) te in Jesu sihna pan thokik takpi ahihna teci kho tampi a kilah hangin um nuam tuanlo ve ve hi.

Bang hang hiam cih leh amau geel in Pasian om kei, vantung gam leh Hell cih zong om kei, na lamdang cih bang zong om kei,ci-in a upsa uh kheel nuam lo teltal uh hi. GS Pau