Jesu tawh kimu-in, amah mun i piak nak leh

JESU TAWH KIMU-IN, AMAH MUN I PIAK NAK LEH

I mawhnate kiphawkkik in, i kiksikkik thei ta ding hi.

Midangte’ tungah itna leh hehpihna i nei thei ta ding hi.

Duh hopna leh huaihamna khempeuh hong bei ding hi.

Hazatna teng bei-in, deihsakna i nei thei ta ding hi.

Muhdahna teng bei-in, itna lungsim i nei thei ta ding hi.

I zi/pal te ithuai sa-in, ngaih baang i sa tawntung ding hi.

Midangte simmawh bawlsia loin, i hehpih thei ta ding hi.

Thu dangdang, vai dangdangte te sangin, Pasian leh ama thute mah thupi i sa zaw ta ding hi.

Ei tunga hong khial khat peuh a sia lamin thukkik loin, ahoih lam bek tawh i thukkik nuam ta ding hi.

Mi dangte gensiasia nawn loin, i phat thei ta ding hi.

Midangte niam koihkoih nawn loin, i laamto nuam ta ding hi

Midangte a puksak hi loin, a puk mite i phongto ta ding hi.

Thusia mudah in i nial dinga, thu hoih deih in i pom ta ding hi.

Mawhna mudah in siatna i peel dinga, dikna deih in na hoih i sem nuam ta ding hi.

Nisim nai simin, Pasian’ tungah lungdam ko in, ama min i phat den nuam ta ding hi.

I hih theihna bangbang tawh Pasian’ min leh gam ading leh midangte’ phattuamna dingin ma i pang den nuam ta ding hi.

Jekhe in Jesu lunggulh in, mu nuam mahmah ahih manin, haksa pipi-in zonga, Jesu tawh hong kimu bek tham loin, a inn ah zantaam dingin sam hi. Jesu tawh lim takin kimu-in, i inn sungah mun a piak tak ciangin, a mawhna khempeuh kiphawkkik in mawh maina ngen a, a nuntak ziate leh a pianziate hong kilaih pah lian hi. Ni dangin mi hehpihna nei loin aduhhop a huaihampa hi-a, tu-in hehpihna lungsim leh itna lungsim hong nei thei ta hi.

Ni dangin a lapa hi mah ta leh, tu-in a piakhiapa hong hi ta hi. Ni dangin a ngahpa hi mah ta leh tu-in a hawmkhiapa hong hi ta hi. Tua ni-a kipanin Jekhe inn sung pen, Pasian kiang pana hong pai nopsakna tawh hong kidim hi.

Tua mah bangin, i nuntakna sungah Jesu lunggulh ngeungau in, i lungsim kongkhakte hon a, ama kiang naii-in amah mun i piak nak leh i sung panin, a hoih lam bekbek mah luang khiakhia lel dinga, midangte’ adingin thupha i suak ding hi. I minam sung, i Pawlpi sung, i innkuan sung leh i mimal nuntakna sung mahmah ah Jesu mun pia-in, ki uksak ni. Jesu sungah na khempeuh kicing a, Pa Pasian’ kiang pana hong pai nopsakna tawh zong kidim hi. Lai sim mimal kim tungah Topa’n tupha hong pia ta hen. Amen.

Khazih sungah,

David Tuang