Jesu mitsuan in tai in ~ Job Thawngno

Jesu mitsuan in tai in ~ Job Thawngno

Kidemna khempeuh ah kungmui (goal) om ciatin pahtawina thaman zong omkim ciat hi. Khristiante tai kidemna kungmui in i Topa Jesu hi a, amah i bat donga tai ding leh nuntak tawp donga taidingte i hi hi. I kungmui pen mihing hilo, i pastorte hilo, i pawlpi upate hilo hi. Mihing himawk leh i phak a hoih i kisak zawk hun, hat i kisak zawk hun om thei ding hi. Ahi zongin i kungmui pen mihing hi loin ah paubanna omlo a kicing Jesu bek ahi hi.

Kol.3:10 ah, “Ngeina thak tawh kituakin gamta un, eite a hong piangsak Pasian a kicing takin i theih semsem nadingin amah a sun dingin a hong thakbawl tawntung ahi hi” ci hi. Khris a sun semsem ding i hi hi. Pasian in leitung mite a bawl ciilin ama’mel sun dingin bawl hi (Pian.1:26). Dawimangpa khemna hangin Pasian’ meel mansuah in dawimangpa i sun a, Jesu Khris i up i saan manin Pasian’ ta suakin Pasian’ meel a sun to semsem ding i hi hi (1Joh.3:2; Kol.3:4).

I tate meel in a nu a pa hong sun henla, a gamtat a kampau in zong hong sun lailai leh kilungdam in kilungkim mahmah hi. Bang hang hiam cih leh, ei’aa taktak ahihna kilang hi. Ahi zongin i tate’n i veengpa sun keeimawk leh kilungkim loin innkuan buaina piang ding hi. Ta meel hoih mahmah a kideih hangin midang khat a sun lua liang kideih tuan het lo hi. Nu khat ta i hih mah bangin Pa khat ta bek kideih a, pa tampi kigawm ta kideih lo hi. Tua ahih manin Khristian nuntakna i cih pen Khris a sun nuntakna, Khris meelpua leh Khris tawh kibat dong kalsuanna ahi hi. Khris tawh i kibat dong Khristian nuntakna tawlnga, khawl cih a om theilo ahi hi. A sun to semsem dingte i hi hi.

Topa Jesu a kimat khit ciangin a gei a mei a awi Judah mite in Peter kiangah, “Nang Jesu nungzui hiteh” a cih ciangin Peter in, “Ken tua Jesu thei kha keng” citaleh amaute in, “Na kampau panin kong thei uh hi” ci uh hi. Tu hun Khristian tampite in ‘Jesu nungzui ka hi, ka piangthak, gupna ka ngah’ ci-in teci pangpang napi hangin midangte in ‘Jesu nungzui hikei teh, piangthak kei teh, na gamtat leh na kampau kituak kei’ hong cikik zaw uh hi. Peter pen Jesu nungzui ahihna midangte’n teci pang in aman nial zaw a, eite i hih leh nungzui i hihna eite mah in teci pangin midangte in hong nial zaw uh hi. Pasian’ ta taktak Jesu anei taktak i hih leh a meel sunto semsem ding i hi hi.

Tua ahih manin Khristian nuntakna pen tai kidem tawh kibang a, kiginkholhna tawh a tangzang thei penpenin Jesu mitsuan a tai dingte i hi hi. (Job Thawngno’ gelh kitom lak hi)