Jessica Cox nuntakna kiukhat pan thalakna

Jessica Cox nuntakna kiukhat pan thalakna

Jessica Cox pen ‘Touching the Sky without Arms’ ci-in min akipia khut tawh loin khebek tawh vanleng hawl numei khat ahi hi.

Amah pen February 2, 1983 in Sierra Vista, Arizona, USA ah khut neilo sa in hong piangkhia hi.

Khut a neihloh hangin amah pen leitungah khut tawh lo khe bek tawh Pilot/vanleng hawl a sem masa pen ahi hi. 2008 kumin Pilot sep kipan hi.

Khut a neihloh hangin kithanemsak het loin pilna hong sina, Bachelor of Science in Philosophy Degree -2006 kumin a ngah hi.

Tua bek tham loin kidalna siamna lam zong sin a, khut kihel lo, khe bek tawh Taekwando Black Belt a ngah masa pen ahi hi. The Black Belt in the American Taekwando Associtation panin 2014 kumin a ngah ahi hi. Lam dan, lasak dan, mipi mai-a thugen dan, computer laigelh dan khawng hong kisin to a, a khe bek tawh minute khat sungin laimal 25 ciang gelh thei hi.

2015 kumin ama tangthu laibu ama gelh “Disarm Your Limits” cih hawmkhia a, ama tangthu mah siksanin “Right Footed” cih documentery film kizaihna ah zong amah mah kihel hi.

Tua banah Guinness World Record: The Only Pilot to Fly With Their Feet; US Inspiration Awards for Women 2012: Most Aspiration cih pahtawina le minphatnate zong ngah hi.

Amah pen motivational speaking; keynote speaker zong hilai hi!
www.jessicacox.com

A dinmun en loin a tupna sang saka hong kalsuan manin leitung mite’n hizo kenteh ci-a i ngaihsut thute tungah gualzawhna hong ngah in, minphatna le nuntak manpha tawh hong nungta thei hi.

Video: Jessica Cox (born 1983 in Arizona) is the world’s first licensed armless pilot, as well as the first armless black-belt in the American Taekwondo Association. She was born without arms due to a rare birth defect.

Thalakna

– Khut neilo hih Cox in leitungah a om ngei nailo laimai thak gelh zo ahih leh nang khut le khe kim mikhat in zong na gelh thei ding hi.

– Haksatna tampi tuakin thuak tase mah leh lungkia loin a kalsuan manin a limci tangthu hong gelhkhia hi. Tua mah bangin haksatna tampi sung pan mahin lungkia loin kalsuan teitei leng a limci tangthu i gelh khia thei ding hi. Dong Mung