Itna bucing (Margarete Gawtier) Part 2

Itna bucing (Margarete Gawtier) Part 2

Tua ka laibu leitegel pen saidangah lei leng pek 7 zong man lo ding hi. Banghangin ken hizaha leingam mawk ka hi tam ciin kei leh keizong lamdang ka kisa hi. Hih nungaknu tawh a kiho ngei, a kithuah ngei cihkhat lah hi lo, a lamdang himah hi.

Inn ka tunkik ciangin ka laibu leite vanzuakpa in ka innkongkhak geiah na koih khin hi. Innsungah ka lutpih khit teh Coffee dawn kawmin lupna tungpan a tangthubu pen ka et leh abumin ah “Lenon Mescow ” na kici a, ka sim suksuk leh lawm kingai nih sehnel gamah tai uh a gilkial dangtak leh gentheih haksatna namkim a thuakna thu uh na hiin, a tawpna ah a lawmnu’n thuak zo nawn lo in a lawmpa angsungah lungnuam takin si hi. Hih laibu pen Arman Duval a kici tangval khatin Margarrete khiangah kiphawkdenna dinga apiak a nahih gige lam pen a laidal nawnung penah nakigelh a, ka phawk kheh pan hi.

Tualai takin ka kongkhak ong ki kiu a, ka va hon leh tangval khualzin tungphet melpua khat ka kongkhak maiah na ding gige a, kongkhak ka honphet in hong lutsuk pah hi. Lupna tunga ka laibu koih leh nungaknu diary amuh phetin lapah a, pawmcip in kap a, naupang khem zawh loh bangin kei maiah hong kapkheh beba mawk hi. Ka theih ngei loh tangval khat ka maiah hizah a hong kap mawk cihpen lamdang ka sa mahmah hi. Tangvalpa a kap hong khawl khitciangin ” Lawmaw hih laibu tegel nana leipen lungdam mahmah ingh. Kei ka minpen Arman Duval hi.

Margarrete pen ka it mahmah ka lawmnu hia, acinat ka theih ciangin ka zinna London pan zanhala tung dinga hong ciah vingveng ka hih leh lamkalah ka tembawpi uh hong nawngkai ahih manin ni thum ka zekai uh hi. Ka it ka lawmnu mel mu man lo ka hih manin na ka sa mahmah hi.

Paris kong tung phet in ka lawmnu vante a kizuak khiat lam hong kigen a, van leite min leh leihsa kigelhna laibusung ka et kawikawi leh na omna hong thei ka hi hi. Nang hih laibu tegel na lei na hih teh na leina zah thum in hong leisawn sak lecin cia hong thum nuam ka hi hi. Kei adingin hih laibute zaha manpha leitungah bangmah om lo hi.” ciin hong ngen negeungau hi.

“Lawm aw i ki meltheih suakna dingin hih laibute hong leisawn keizaw inla, a khong in hong pe ningh. ” ka cihteh lungdam hong ko phapha hi.

Tangvalpa ” lawm aw kei pen ka tunna ding mun zong tung nai lopiin nang khiang hong bangsuak pah ka hi hi. Kipuah siang nailo pia hibanga kong hawh pen hong maisak in maw.” a cih khitteh hong kap kheh leuleu mawk hi. A kap mite khiangah ka omciangin nuam ka sa kei a, khem zong ka sawm kei hi. Bang hanghiam cileh a kapte pen khemkhem leng a velvel tawh kibanga kapsemsem zaw uh hi. Khem keiin thudang kikuppih lenglah heh thei mawk uh hi. Tua ahihmanin a kapte khiangah ka omteh kamkhat zong ka pau kei vet hi.

Tangvalpa pen kap kawmkawm in hong tamlo a ” Tazen aw ei Margarrete, kuama it loh kuama ngaih loh bangin don loh khoi loh in lah na si tazen a maw. Kei om in hileng hici liang lo mah ding hive cin…kamsia liang siang e maw ..ka angsung beekah a si hile cin mete …” kah hong khawl leuleu in, a khituite hong nulsiang khit teh keilam nga in hong en a, “Lawm aw Margarete tawh ka ki itna uh avekin kim takin hong gen ning in, na man khat teh laibu in hong bawl dih ve. Ken abeiteng khempeuh si ning. Gelh takpi in maw.” hong cih khit teh “Aizong tuletu in bel bangmah gen thei nai keng. Nidang ciang ci ni.

Ka lawmnu kiguina khanah ka pai hun ta. Office ah ka lawmnu khan hon theihna ding a ngen hiveng. A mel ka muh kik mateng ka lungnuam thei ken teh, kei hanga si ahih teh cikmah hun in hih ka khelhna pen keilekei kimaisak zo ngei lo ding hing” hong cih khit teh kithawi in lungdam hong koh khit teh dingto in kongkhak lam a zawt kawm in, ” Lawm aw laibu in bawl takpi ding i hi maw. ” hong cileuleu a, “Awle” ciin lukun in ka thukim pah hi. (To be continued) Francis Famthang