Itna bucing (Margarete Gawtier) Part 1

Itna bucing (Margarete Gawtier) Part 1

(Hihnu tangthu pen ka sim khit teh sim kikkik in tudong mah tua laibu kem in hileng ka simsim nuam lai hi. Hih tangthu in ka lungsim hong sukha lua ahih manin ulenaute hong hawmsawn nuam ka hihi. Hih tangthu sunga mi minte kician takin thei nawn lo kahih manin min khat pepeuh hong guan lel ding hi’ng)

Hih nungaknu Margarrete Gawtier pen piantit nungak melhoih leh lungsim hoih anei khat hiin, amah pen nulepa kicinlahna hangin numei kizuakte lakah a nuntak hunsung teng beisak a, khansih lai hi.

Piantit numei kizuakte lakah amah zaha melhoih kuamah om lo banah amah zaha itna man (True Love) a nei om lo hi. A nuntakna khempeuh tawh a it leh a kingakna pa Arman Duval pen it in ngai mahmah taleh amailam hun ding a khualsakna leh a innkuanpihte a khualsak manin it pipi ngai pipi mahin khen ngam a, sih lawh liang hi.

Leitung mawhna tawh kidim in, a nuntak hun sungteng dawimangpa sila suak mah taleh asih ding ciangin piangthak hi. Mawhsuutna nei in, Siangtho pumpi sanga, phungzipa in sathau siangtho anilh khit ciangin lungnuam takin gentheihna mun hih leitung nusia in tawntung nopsakna a pa Pasian angah a kha tawlnga hi.

Kipan ta ni

Zingsang khat thobaih pian ka hihmanin ka zin tunna Hotel panin ka vak khiat leh Paris khaw laizang ka tun teh innhoih mahmah maiah mihon na kikaikhawm uh hi. Lamdangsa ka hih manin ka vanaih phei a.A thu ka kan leh tuani zingsang nai 8 hunpawlin Margarrete i vante mit leingamna zah tawh kizuak ding hi cih thu na hi a, a vannei nupen Margarrete Gawtier asih zawh ni 5 pha ta hi.

Leiba tampi nei ahih manin tuate lohna dingin a van omlaite mipi’n a ngapna zah utawh leisak dinga, tuapan a cianlai a om leh a sanggamte pe ding hi. Hihnu tawh kimeltheihna kician ka neih loh hangin khuasung avakteh ka muthei zela, amin zong ka zaknawh mahmah khat hibilbel hi. Keizong mipi lakah ka va dinga, ka lungsim sungah hibang thu peuh ka ngaihsun hi.

Hibang numei kizuakten pen sihhun nih (2) nei uh a, a khatveina pen avun uh hong kolpian a, a kum uh hong tampian takteh pasalte iplahna amautung pan bei ta a, tua huna kipan a khangno laivua angah zah uh i alang zong ngah zo nawn lo uh hi. A nihna pen pumpi sihna hi. Amauten pen pumpi sihna sangin tekding guai ding kihta zaw uh hi. Kum 15 pan 25 kikal pen kikhawng mahmah uh hi. Ahizong sum tampi ngah mah tale uh sumkhawl thei ngiat lo uh a, atek uciangin cimawh thei mahmah uh hi.

Margarrete bel ahamphatna khatah a tekdong nungta lo in, a hoihpen laitakin sise hi. Amah alei ngeiten milakah hopih ding maizum mah taleh Margarrete i hokhak hih pen a kuama ciatin ut mahmah simsim veve uh hi. Vangnei kisa tuam mahmah uh hi. Bang hang? Amel hoih lua mawk hiven! Numei kizuak ahihang mikim khoih theih leh leitheih hi lo a, Paris khuasunga mihau penpente bekin leingam bek uh hi. Mi nautangte’n bel khoih kha ding cithadah a galmuh bek uhzong a hampha mahmah uh hizaw hi.

Margarrete tawh a kikhawl kha khempeuh in zong ngah gai lo lai uh hi. Numei kizuakdangte banga ut ut a khoih theih leh nopneh theihte hi peuhmah lo hi. A kikholhpihten zong sawtvei a kemzo om lo uh hi. Banghang hiam cileh amah tawh ahih nak uleh kuamah in bangmah it thei lo in,ngen taleh ngen takei leh aneih khempeuh uh piapia mawk uh a, a zawnlawh mihau tampi om uh hi. Ama khen kullo in amau leh amau kihemkheh lel uh hi. Tuabang himawk hi i nungaknu pen!

Tuabang peuh ka ngaisut laitakin vanzuak pa”n ” Hilaiah Margarrete i diary leh tangthubu khat om lai hi.A leinuam i om leh bangzah tawh leingam ding hong zasak un” cin na awng awng hi.

• Papi khatin “Ken pek 5 tawh leingam ing”
• Vanzuakpa “Adem ding i om hia?”
• Keimah “Pek 10”
• Papipa “Pek 20”
• keimah “Pek 35”
• Papipa “Pek 50”

Tuabanga ka kidemdem laitak un upmawh lohpi in ka kampan awkhat hong gingkhia velval a “Pek 100″ a ci kana hi gige mawk hi. Hong dempa’n zong hong en gega kawmin ” Lawm aw keisang i lawmnu tawh na kinaih zaw ngei hi ni uteh maw..Hong dem nawn kei ning ei. Nang tang o” hong ci hiat a, keizong ka sumbawm pan a cingzah ding ka lak khit teh vanzuakpa pia in, a laibu kawmtuam tungah mi hong suhsak ding alau bangkek in ka min ka gelhsuk pah hi…. (To be continued) Francis Lamthang