Itna anei – Charlie Chaplin ~ Zomi Quavadis

Itna anei – Charlie Chaplin ~ Zomi Quavadis

“Smile, even if your heart is aching” – Charlie Chaplin. “Na lungsim tawng kitamzan phial mah taleh, tuate aphawk lo kineih inla maitai sawm veve in” cia mite a hanthawnpa pen Charlie Chaplin ahihi. Amah zah a ciamnuih bawl siam kuamah om lo kha thei ding hi. Ama kihelna movies te en lehang gamtatna vive hiden pianzaw hi. Mangpau them khat zong atheilo te nalengin Charlie Chaplin kizaihna movies en leh anui lo kuamah om lo hi.

Hihpa in pau het lo in leitung bup phial nuisak zo mawk napi amah pen mikamsia khat ahihman in ama nuntakna tangthu kan lehang nuihna ding ahau khollo pawl ahihi. Charlie Chaplin leh Michael Jackson tepawl pen Stage tunga a omdan uleh a sungtawng nuntakna uh kilehbulh litlet hi. Michael Jackson zong hizah a mite lungsim sukha zo khat ahih hangin avunvom akaang tawh hong laih ni akipan zatui zaha tawh asihni dong kikhen thei nawn lo hi. Ahizongin bangzah takin athuakna uh lian mah taleh amau tegel zah a minnei zo kuamah om nai lo hi. ” A maitaina utawh leitung maitaisak zo mawk uh hi”.

Tusung teng Charlie Chaplin kizaihna movies khat khit khat ka ban et tohtoh leh ahoih lo khat zong mu kei mawk ingh. A video kizaihna khempeuh phialah amah pen nasep nei lo, nei sunsun lezong sawtvei asem ngei lo pawl hi a, zawng lua ahihmanin omna ding munkip zong a nei zo lo mi vakthap khat hiden hi.

Ahizongin Itna leh hehpihna tawh akidim mi khat himawk ahihmanin bangmah nei takei leh aneih sunsun pen amah sanga akisam zawte a pia ngampa ahihi. Ama video kizaihna tampi tak lakah hoih kasak phat diak thumte hong gen leng, khat pen “The Circus” anihna ” City Lights” leh a thumna “The Kid” hi. Hih thumte na et khit ciangin na lungsim akikhel zawh kei lai lebel nang pen kumpi Phaaro banga mihing Suanlungtang nei khat hiding in hong lamen ingh.

“The Kid” sungah amah bangmah neilopi khatin mite deih loh zawlta naungek khat hong khantoh dongin pantah hi. A itbawl dan na en dih vevua. ” The Circus” sung leuleu ah pen it mahmah leh ngaih mahmah nungak khat nei hi. Tua nungaknu in atawpna ah zui mawk hi. Amah lah bangmah nei lo mi vakthap khat ahihna tawh it mahmah ngai mahmah phial taleh tenpih ngam lo hi. Ompih ngam lo hi. Ama gentheihna teng tua nungaknu in thuakpih ding cihpen hehpihhuai sa lua ahihman in mihau khat tawh gawm hi. Nasia lua himai! ” City Lights” en leuleu lehang hidan hong hi leuleu hi.

Nungak melhoih khat a mittaw citciat ahihman in paak zuakna tawh nek zong hi. Hihnu gentheihna ava muh ciangin hehpihhuai sa lua a, huh theih huh mawh in huh hi. Amit at leh dam ding cih atheih ciangin sep theih sep mawh semin sum va thalawh hi. A sum ngah khempeuh tawh tua nungaknu inah va hawh a, amit atna dingin va pia hi. Nungaknu inzong amit atsak in khua hong mu thei ta hi.

Tua nungaknu in Charlie Chaplin mu leh athei diam, thei leh angai diam!? Charlie Chaplin in bangmah aneih loh hangin Itna nei ahihman in aneih khempeuh tawh tua nungaknu ahuh ahihi. Tenpih ding lametna tawh ahuh hi zenzen lo hi…. Hun naneih ciangin na en dih ve lawm. Nabanka leh bawlungpuaite sangin et huaizaw kha mai thei hiveh aw!! Francis Lamthang (Zomi Quavadis)