IS te’n Egypt panin Isreal Rocket 3 tawh kap

IS te’n Egypt panin Isreal Rocket 3 tawh kap

Feb. 10, 2017: Egypt gam-a om Sinai Peninsula (leitang/gam tuipi in a um kualh) panin zan in Israel gam-a khualzinmite hawh nopna mun (resort) Eilat khua rocket thum tawh kikap hi. IS ten ko kap hi hi ci-in pulak uh hi.

Israel galkap ten a si leh a liam kuamah om lo a, thosi thovai zong si beek lo in, Iron Dome air in tua rocket hong kikapte na ma theih khol in na buaisak/lengkawisak (intercept) hi ci uh hi. Tua khit naikal sawt lo khit nungin Sinai ah Palestine mi nih kithat hi. Hih sihna tuakte pen Israel galkap ten vanleng tawh a kaplup uh hi ci-in Gaza a uk Islamist Hamas movement ten a cih hangun Israel in Sinai kikap lo hi ci-in nial hi.

Egypt pen Arab gamte lak-a Israel tawh kilemna suaikai gam nih bekte lak-a khat ahi hi. IS ten Sinai Peninsula pansan in Egypt galkapte suam mun mahmah uh a, tampi that ta uh a, ahih hangin Israel suam sawm mengmeng lo uh hi. Source: Associated Free Press

Russia te’n Syria ah Turkey galkapte thum kaplum

Feb. 10, 2017: Russiate vanleng in Syria ah kamsiatna tawh (accidentally) Turkey galkapte thum kaplum in, 11 kapliam kha uh hi ci-in Turkey galkap ten pulak uh hi.

Russian President Putin in Turkey President Erdogan hih thu hangin phone tawh hopih pah a, a dahpihna thu gen hi.

Russia ten Turkey galkapte a kaplupna uh pen Syria gam-a Turkey galkap ten ISte’ khut sung panin a lak sawmna uh al-Bab khua hi a, IS ten Turkey galkap nga a thahte uh dahpihna a nei lai takun a kap khak uh ahi hi.

Turkey in hih thupiang hangin Turkey leh Russia kipawl in thukanna kinei hi ci hi. Turkey in November 2015 in Russiate vanleng Su-24 a kap khiatsak khit nung uh a kitanauna uh nakpi takin sia a, kitanauna bawl phat ding a hanciam laitak uh ahi hi. Source: Associated Press and Fox News/ Thang Khan Lian