Internet ah hun bangzah beisak ~ Hau Za Cin

Internet ah hun bangzah beisak ~ Hau Za Cin

Leitung zong Zomi te mah bangin khantoh sawm in diang thapai a, tu man vetlo in dindeelsa in pai kheu-kheu hi. A hun tamzaw ah aktai den a, tutkhawl cih peuhmah nei ngei nawnlo hi. Nawhtai lua leh khangluite ‘ciahkuan bal em’ a cih bang dinga, ziakai lua leh lah delhphalo ding hi. Tua manin a sep ding sem man, ahih hang ziakailo, khawllo, dinglo in pai den hi. Tua manin leitung pen ‘kinawhlua’ a ci pawl om a; pawlkhat in ‘manlang lua’ a ci om a, pawlkhat in ‘nawhtai deuh leh’ aci pawl om hi. Zomi te mah bangin leitung mite in zong ngaihsutna tuamtuam na nei tek uh a, amau zong na kinial zel, na kingit zel, na kinawk kha zel uh hi.

Kuamah a tuam omlo, a kibang vive ihihna hong langsak hi.

Zomi te mah bangin leitung mite in zong internet na buaipih mahmah uh a, amau zong a ngaihsutna neuno khat peuh, a khuak sungvua kipeipei thute mah internet ah na luikhia in mite sim theih dingin na gelh gawp zel sam uh a, Zomi te mah bangin na lawp keei sam uh hi. A gelhsa uh thute hangin mi tampi in a phattuampih mah bangin ngaihsutna kibanglo hangin ngaihsutna tuamtuam, ngaihsutzia tuamtuamte na sungkhawm thei zel uh a, Zomi te mah bangin amau zong ‘amau hun nawkkhak’ teng mah na su lingling uh hi!

Zomi te mah bangin amau zong a thu theih masaksak uh a na luikhia ahih manin thukizakna na manlang mahmah a, a milip tamzaw gam khempeuh ah thukizakna na manlang se hi (numei tamzaw pah hiven… he he he…). A khangto minam leh a khangto gam hih ut in leitung in a piak theih khempeuh – sum, nek leh dawn, silh leh teen, vaksuk vaktohna tuamtuam, neih leh lam, vanzat tuamtuam, etc cihte Zomi te mah bangin na deih lei peuh uh hi.

Tuate a ngah kim theihna ding un sun leh zan mah amau zong sithu nam liang, khua-ul sakai luang liang mahin na zong uh a, na hanciam uh hi. Zomi bek in tua bang nuntakna a lunggulh i sak leh na hi tuan deksuailo hi. Leitung minam khempeuh in zong amau phakkhop ciat ah nuntak nuam na lunggulh ciat uh hi.

Thu leh la kizaktuahna a manlang mahmah bek hilo, thu tuamtuam – ciamnuih, thutak, pilna, theihna, thu leh la, etc cihte maitang kimulo a kipuak ziauziau theihna internet zong amau na buaipih mahmah uh a, Zomi te mah bangin hun tampi mah na beisak uh hi. Pilna tampi a ngah a om mah bangin a thupilo a hun tampi a beisak zong tampi mah na om veve uh hi. Mite laigelh tuamtuam – a ginalo leh manphalote simin hun tampi beisak uh a, games tuamtuam kimawl in a sun a zan na buai uh hi. A tamzaw ah Zomi te mah bangin khangham sangin khangno leh naupangte in internet ah games leh kimawlna tuamtuam tawh hun manpha tampi na beisak uh hi.

Internet pen sila banga zat dingin a hoih hi a, sia banga khoi dingin a sup-huai hi.

Banghang hiam cih leh zang thei leng sum mah bangin manpha a, zangthei kei leng hun tampi a bei ban ah mit khamsak bek hilo in ngaihsutna nawngkaisak in a omlo in ki-om theilo hi. Internet enlo in nikhat na om theih nawn kei leh na kidek mahmahta kul cihna hi. Nasep mah banga tawlngak hun na neih ding a kisam mahmah khat ahi hi. Na mit bek in thuaklo dinga, na kawng leh na khutme, na khuak ngaihna ciim mahmah zong tawmawl thei ding hi.

Ahang pen mihing bangin hopih theih, thukuppih theih hilo a, ei lam pan a lut bekbek hi in internet in hong dawngkik theilo, hong hopih kik theilo, i khuak hong lok khollo hi. Mihing leh mihing mah kiho in thu kikum leng ngaihsutna tuamtuam a om ciang i khuak a thasaanna dingin hong lawk kiaukiau thei a, tua pen cidamna dingin hoih mahmah hi.

Maitang kimulo a kizop theih pen a hoih mahmahna a om mah bangin a siatna zong tampi om hi. Tangval khat in, “hua nungak in hong ngai in um veng aw” ci a amah leh amah lamet akipiak den tawh kibang thei hi. A taktak in tua nungak in na ngai ngaungau khollo thei hi. Kizopna omlo a, ahi zongin nasepna dinga zat dingin bel tangzang mahmah hi. Khutme tawh sawk ziauziau in leitung kiuli ah thu leh la kipuak ziauziau thei a, nopna dahna i theihpih pahpah hi.

Leitaw lam gam New Zealand ah thupiang hita leh leilu lam gam Norway ah Zomi te Khuado thu hita leh, nisuahna lam Japan a Zomi te lawhcinna leh nitumna lam gam USA ah Zomi te Zomi Khoppi ding thute i tutna dawhdan tung pan khutme mek ziau in i thei thei a, i lungdampihna leh i phawkna zong i khak ziau thei hi. A metna sim ding hileng a sum tawh kileizolo zah dongin manpha hi. Kuala Lumpur khualaizangah ka teng zongin google map zangin Hollywood khuapi Los Angeles khuapi sungah lamdung hoihnono tawn in ka lungsim leh ka mit tawh ka vak hialhial thei hi.

Gamlapi ah omte kizopna dingin a hoih mah hangin a kinainote adingin kigamlatna suak thei hi. Mihing pen mi leh mi mah kiho tangtang leng, maituah in kimu in kikhawl leng kingaihna khang diak hi. Internet om zawh tua banga kihona tawm deuhdeuh hi kici hi. Handphone om zawh diakdiak bang kimu a kiholim na nak kiam mahmah a, kam tawh kiholo, maitang kimulo in thu kikhak ziau, phone tawh kihopih ziau in kimuh kiho cihte kitawmzat hiaihiai hi. Tua pen Zomi te bek hilo in leitung mi khempeuh in na uangzat mahmah uh ahih manin leitungah mihing khat leh khat kizop siamna (social skills) kiam mahmah hi kici hi.

Kikhop kul seselo in internet pan biakinn sungah thugen teng inn ah kingai thei hi. Tutsa a ngai hileh phadawm, lupna, dinsa nangawn in kingai thei a, pawlkhat te bangin khualak peuh pan na ngai thei uh hi. A hoihna a om hangin a hoihlohna tampi om hi. Zomi te bek i sak leh midangte zong tua bangin internet tungtawn in na kikhawm keei uh hi. Amau zong kizopna diam ding cihna hi. Kizopna kiam leh kingaihna tawm a, kingaihna tawm leh kideihsakna tawm a, kideihsakna om kei leh omkhop a kulna om nawnlo hi. Omkhawm kei leng eima thu ciat, eima ngaihsutna ciat, eima hoihsak dan ciat in kinungta dinga, ‘angsung theihna’ hong lian mahmah ding hi. Kei

Biakinn ah pawlkhat in Lai Siangtho tawi nawnlo in iPhone pan iPad pan sim ziauziau uh hi. A siatna omlo hi. Ahih hangin a Lai Siangtho simloh kal in internet sungah na lut kha pahpah uh ahih manin a lungsim uh palangsak hi. Games peuh na kimawl uh hi. Thu peuh na kikhak uh hi. Maan peuh na en uh hi. Lawmte tawh na kihosim thei uh hi. A lungsim a biakna sungah omlo in a pualam tawhna kizom gige hi.

Tua manin internet zat pen a siatna om kei. A vallua in i zat leh a siatna om hibek a, zang siam leng phattuamna tampi hong pia vanzat ahi hi. Zangsiam kei leng lah hun manpha leh sum tampi a beina suak ahih manin nisim, khasim, kumsim in internet ah hun bangzah na zang hiam, na tate in hun bangzah a zang hiam, na lawm na gual tawh na kizopna a hoihsak hiam, a dausak hiam cih na sittel hamtang in. Nu leh pa leh tate kizopna a siasak thei ahihna ki uanggen mahmah hi. Zomi te bek hisamlo ding napi midangte zong Zomi te mah in kikholhsiam, kideihsak, ki it, kingai in, kiho diamdiam leh tomcik sung bek i luah ding i tenna leitung hong nuam mahmah tuam ding hi. Hau Za Cin