Indonesia gamsung aom innkhat ii atungbek ah guahzu in lamdang kisa mahmah

Indonesia gamsung aom innkhat ii atungbek ah guahzu in lamdang kisa mahmah

Indonesia gamsung aom innkhat ii atungbek ah guah zuziahziah in amundang ah zuvetlo ahih manin, lamdang kisamahmah cih Bernama News pan kizasawn hi. Tua innpen South Jakarta, Tebet vengsung aom ahihi. (Atung a Photo pen guah azukna inn ahihi)

Abeisa Saturday ni in thupiang hi a, hihbangdan nalamdang pen ombel omthei kici a, ahi zongin leitungah alamdang leh aom pakpaklo thulamdangpi “natural phenomenon” khat ahihi.

Indonesia Meteorology, Climatology and Geophysics Agency (BMKG) panin thunei khatinzong hihthu tawh kisai in genkhiatna nei cihi. BMKG Information Center panin makaipi ahi Mulyono Prabowo in hihbang thupiang, nalamdang pen piangpakpaklo, om pakpak hetlo hi ci’n genkhia hi.

Ahi zongin South Jakarta, Jalan Tebet Barat Dalam 1 aom 5×5 Meter azai innkhat ii atungah nai 6 sungbang guahzuziahziah ahih manin, lamdang kisamahmah cihi.

Indonesia gamsung ah khuahun samahmah in, gam akeu mahmah laitak “hot & dry weather” hi a, hih thupiang pen lamdang kisa in, Social Media tungahzong ki thehzakpah zihziah cihi.

Video: Rainfall over one house only in Jakarta neighbourhood, a rare phenomenon

BMKG Information Center pan thunei te genna ah hihthu apianlaitak khuahun aki etciang in mei “Cloud” pen 700 meter leh 1 kilometer kikalbang asanna “height” omding in ki ummawh, Study kibawlna tungtawn in ki mukhia cihi.

Innneipa ahihleh hih a inntungah guah azuk ziahziahhun laitak in avengpa tawh innsung ah Chess akimawl uh cihi. Guahzuk kipatpen nitaklam 6:30pm hunpawl panin zankim “midnight” dong azusuak cihi.

Guahzuk akipatcillam in innteekpa’n ama inntungbek ah azuklam theiseselo a, innsung ah avengpa tawh Chess kimawl in omhithiat uh cihi. Avengsung teng khempeuh ah guahzu hilelding in angei mahbangin tuatlel a, ahi zongin akhuanung ah ama inntungbek ah guahzu ahihlam theipan cihi.

Related: Indonesia gamsung ah guaktang in avak numei khat kiman

Hih thupiang pen na upkeileh hong pumnialgawp pahpah sawmkei unla, Manglai tawh akigelh “Rainfall over one house only in Jakarta neighbourhood, a rare phenomenon” cih thulu khawngzong nasim kawikawi phot un. Thulamdang khatpeuh akigelh ciangin lamdanglualeh pawlkhat in umlo pongmawk in, pumnial gawpthei uhhi. Ih pumnialma in tawmkhat kancianbawl masa leng, ih hailuatlam kilanglo zawdeuh hi 🙂 Thulamdang pen “Weird News” kici a, uphuailo dekdekphial mahhi. Sawltak #zomidaily