India, Uttar Pradesh State sungah meileng tuahsia, mi 63 sikhin

India, Uttar Pradesh State sungah meileng tuahsia, mi 63 sikhin

India gamsung ah tuni Sunday ni in meileng khat Accident piang ahih manin mi 63 sikhin cih AFP pan kizasawn hi. Police te genkhiatna ah hih meileng pen meileng lampi sikzawn panin apei talkhia ci uh a, atuahsiat laitak in Passenger atamzaw pen a ihmut laitak uh cihi.

Northern India, Uttar Pradesh State sungah atuahsia hi a, Sunday ni zingsangtuung lamin Patna – Indore Express meileng lampi tungah atailaitak apei atalkhia ahihi.

Police Director khatin Reporters te tungah agenna ah atuahsia meileng sungpan in misi luang 63 bang ki hemkhiathei cihi. Adangzong Passenger mi 150 valbang liamgawp uh cihi.

Local Police, Doctors, National Disaster Response Force cihte akipan Rescue Teams tampi takin aphual ah vadelhtheipah uh a, abuaipih mahmah laitak uh ahihi.

Local Hospital khempeuh zong kizasak ahih manin, misi leh aliam te apuading in Ambulance 30 bang hongkuan khiathei ci uhhi.

Banghang in hihbang in meileng tuahsia theihiam cih aki theihcian nailoh hangin India’s Railways Minister asemlaitak Suresh Prabhu in Tweeter tungtawn in agenna ah ahang hoihtak ki kancianding cihi. Tuahsiatna apiangsak akitheihleh nasiatak in Action kilading cihi.

2014 kum inzong Uttar Pradesh ah Express Train khatin Stationary Freight Train khat phukha ahih manin mi 26 si ngeikhin hi. ZD Sawltak #zomidaily

Asi kibehlap:
Police Director General Daljit Singh Chawdhary in agenbehna ah asipen mi 96 phata ci’n Reporters te tungah genkhia hi. Aliam pen mi 150 mah hilai hi.