Discrimination Part-1 ~ Dal Sian Amm

Discrimination Part-1 ~ Dal Sian Amm

Kibat loh na om
Mitampi tak kihelna pawilian mahmah khat sungah na kihel kha ngei hiam? Mitam pitak lak ah na kihel ciang mikhat le adang khat kibang sitset (apeng hilo) na mu kha ngei hiam? Thu um mi om ding aa, thu umlo mi om ding hi. A sang, atom, avom, akang, alian, a new, u lian, Khangno, naupang om ding hi. Puanten teng, bombi tual teng, bombi tom teng, kawlan puan silh, kawlan paa lo aa puan silh cih bangin mikim om ding hi. Pawlkhatte, Pianpih damlohna khat anei mi zong hi thei aa, a ci dam sitset zong hi thei hi. Mitampi takte I vek khempeuh in atawm, atam in kilam dang gai hi hang.

Kibat na zong om

Ahih hangin I kibatna khat ciat zong na om veve hi. Mi khempeuh in ann ki ne tek aa tui zong ki dawn tek hi. Innkuan khat ciat kinei aa, it le ngaih ciat ki nei hi. Huih dik kibang gai mite I hihi.

Amau te, Ei te

Hih atung aa kibatna le kibat lohna te pen mihing khatciat in i neih pel mawh thupawl khat te hi. Mi pawlkhat te ciangin, adang pawlkhat te tawh kizopna nei zong om ding aa atangtat zong ki om ding hi. Pau, ngeina, lai, upna le zatkhop ngeina tukhun te I kibat pih om hi. Tua hangin thu I gen ciangin “amau te” “ei te” cih kammal tawh kibat lohna kammal I zang thei hi. “amau te” “ei te” cih kammal nungah kibanglo hi hang cih lungsim ngiahsut tawmna le lungsim puak ngiahsutna hong kipan khia hi.

Prejudice

Prejudice cih pen mi pawlkhat thu, thu pawlkhat tawh kisai thu taktak te I theih tel taktak lopi-in lungsim ngaihsut tawmna tawh huampi aa sehtawmna ahihi. Brazil te limlim bawhlung siam uhhi cih ngiahsutna, mivom te bel Basketbawl siam zaw hamtang, mikang te bel ei sang pilzaw hamtang, cih bangin huampi aa seh tawmna ahihi. (Hih Prejudice cih pen… Mimal khatciat in I tuahngei thutungtwan in sehtawmna sangin, adang khat tuahkhak in a tuahkhak thute a gen sawnsawnna tungtawnin “mi khatciat in tuak ngeikei ta leng” ahuampi-in I tuah ngei bangin sehtawm ziauziau thei hi hang.)

Sterotype

Hih Prejudice cih sehtawmna hong khauh semsem ciangin Stereotype cih hong kipan khia hi. Stereotype I cih ciangin sehtuamna ahihi. Pink color pen numei te color hi, basketball kimawl pen atun sang te aa ding bek hi, Numei ahih le ann huan ding, puan sawp ding le inn nasem ding hi cih te pawl ahihi. Hih dan ngaihsutna pen I neulai-in I kiim I paam pan kitam sin khak penpen aa, I kiim I paam aa om I Nu I Pa, le I U zaw te in hih bang ngaihsutna nei dingin hong kiguan na hi zaw gige hi. Hih bangin ngaihsut zia tawh naupang te hong khantoh ciangin midangte (ei tawh kibang lo te) ngeina, hihna, upna le pau le ham te tungah tuam ngaihsutna/ muh dahna hong kipan hi. Prejudice a tam luat ciangin Sterotype hong kipan aa hih Sterotype ngaihsutna hong thakhauh semsem le hong kip semsem ciangin Discrimination kici “tuambawlna” hong kipan khia ahihi.

Behlapna

Abaih in genni ci leng, Prejudice pen “Zomi te limlim mangpau siam hi” ci aa Zomi tetawh akithuah kha ngei vet lo mi khatin azak sawn tungtawn in hong muh zia ahihi. Ahang agen ding zong thei khollo ding hi. Banghang hiam cih le azak sawn tungtawnin agen ahih manin ahang(reason) agen ding omlo pi aa “zakngeina tawh sehtawmna” ahihi. Zomi te tawh akithuah ngei mikhat in “ Zomi te laimal zat le Mangkang te Laimal zat kibang ahih manin Maupau siam zaw uhhi” cih “laikibatna” siksan in tuamsehna hong nei hi. Hih pen Lai kibatna cih paulap (reason) tawh “asiam ding mah uh hi” cih seh tuamna ahihi. Hi pen Sterotype kici hi. Ahih zongin, ataktak ciang Zomi khempeuh Manglai le Mangpau kisiam gai peuh mah lo hi cih Ei le Ei kithei pen hi hang.

Conclusion

Tua mah bangin Ei mahmah in zong “khalkha te limlim bel, Kalar te limlim bel, Kawlte limlim bel cih bangin ahuam pi aa I gen te “zawksawna” le “I tuahkhak thu khat paulap(reason)” na tawh asehtawm, aseh tuam ki hi kha thei gige hi. Dal Sian Amm

Part – 2
(Discrimination i cih bang hiam? cih hi ding hi)