India khuasung lampi tungah suntangpi in numei khat kibuan, kuaman thudonlo

India khuasung lampi tungah suntangpi in numei khat kibuan, kuaman thudonlo

India gamsung ah numei kum 43 aphakhin khat khuasung lampi tungah suntangpi in buanthuak (Rape) hi. Zawhthawh thutawh buan athuak laitak in agei ah midang tezong khetawh paipai in, amukha zong mi tampi om himahleh kuamah in hotkhiat sawmlo in thudonlo uh ahih manin lamdang kisa mahmah cih Hindustan Times pan kiza hi.

India, Visakhapatnam khuasung ah abeisa Sunday nitaklam 2:30pm hunpawl in thupiang kici hi. Tua abuanpa pen kum 23 aphakhin Truck Cleaner khat hi a, aminpen Ganji Siva kici hi. Numeinu abuan laitak in zukham cihi.

Abuanpa pen Sunday nitaklam mahin Police te’n mankhiapah uh a, kal 2 sung ki khumcip photding, tuakhitciang thu kisitin thukhenna kineiding kici hi.

Visakhapatnam IV town police sub-inspector K Suresh in agenkhiatna ah buan athuak numeinu pen a innkuanpih tetawh kitawng in abeisa ni 2 hun akipan innpan in ataikhia cihi.

An nekdingzong neilo in atha zawmcip in, khuasung singkungnuai khatah alup laitak in Ganji Siva kicipa in zawhthawh thutawh abuan ahihi.

Buan athuak ciangin numeinu pen an nekloh asawttawh athabei, zawmlua ahih manin midangte tungah huhngending inzong awngzo nawnlo hi.

Tuaban ah ageinai panin anawkkha, amukha te’n hotkhiatding ngaihsunlo in, Mobile Phone tawh Video leh Photo peuh azaihnuam in buaimahmahzaw uh cisawnsawn hi.

Auto Driver RG Srinu akici khatinzong Video zaihin, tua Video tungtawn in Police te’n hih thupiang theikhiapan uhhi. Tua Video sungah pasal khatin numeikhat singkung nuai ah abuan laitak agei ah khetawh mi tampi in nawkkha himahleh kuamah in lunghimawh seselo uhhi.

Video: Onlookers film drunk man raping Vizag woman in broad daylight

Police te’n atheihkhak uhciangin tuaphual ah delhpah uh a, ahi zongin mibuanpa pen Cycle khattawh paikhiakhin cihi. Tuaciang in ageinai ah amukha te Information piakna tungtawn in Police te’n zongkhiapah uhhi.

Related: Kawlgam ah 2017 January khakhatsung bekbek in Rape Case 100 val om

Buan athuak numeinu zong King George Hospital ah Medical Examination bawlding in puakpah uhhi. Kuaman ahot sawmloh banah, Police tezong ahunlap in ki zasaklo ahih manin, palik te’n numei kibuankhat bangmah khuaphawklo in aom khuasung mipite pen mikhualna neilo uhhi ci’n genkhia hi. Sawltak #zomidaily