Khuado thupuak from ZIUSA (October 01, 2018)
Zomite’ ngeina tawh kisai pawi i neihte lak ah a thupi pen leh akilimbawl pen KHUADO hun ah anuai-a bangin ZIUSA in KHUADO THUPUAKNA kong nei uh hi.
Khuado i cih ciang in, “khuavak” tawh akigen ahi Pasian tungah lungdam kohna leh thupha ngetna ahih ban ah, “Khuazing” tawh akigen ahi dawite hawlkhiatna, do na cihna in i pu i pa te in na zang uh hi.
I pu i pa te in Khuado pawi bawlhun a ni ciangtan khat na nei lo uh hi. Tuuk anlaak khit a kibawl ahih hangin khua khat leh khat anlaak hun kibang lianlo ban ah khuasung mipi te khuasung a om kimdeuh hun ding uh kibang lianlo ahihna zui in Khuado pawi bawlhun a ni ciangtan kineilo hi ci-in kigen hi.
September, ahih kei leh October kha sungin kibawl kici hi. ZIUSA in ahih leh pawlhuam Zomi innkuante in October kha nipi nihna Saturday ni in bawlkim ciat ding in kithukimna tawh kipsakna akineihna tungah kumsim in ni khat akibang in Khuado akibawl khawmkhawm zo ta kisuak hi.
“K – Khuado pawi kum khen pawi” ci-a Zolai sinbu sungah akisin mah bangin Khuado pen i ngeina zui-in Kumkhen Pawi zong ahihi. “Kum kikhen e sawlkha dang e, ziin in a vang khua zong hen aw, ziin in a vang khua zong hen aw, Sian sung tui bang siang heh aw.
Tukawl tawi kum khua i khen a, ningzu khum lai aisa aw e, ningzu khem lai aisa aw e, khan kum sawt ciam lai leng e” ci-in i pu i pa ten la in na awi uh hi. Kumkhen pawi ban ah, khuailak pawi, meidet pawi, anlak pawi, siansuah pawi cih bangin minvawh in akibawl thei Khuado pawi zong ahihi.
Khuado hun sung ah, i pu i pa te in a it a ngaih a sisa te sasin, salung, sakal te puak in daihawhna in zong zang ki ci a, “Do na lingling, do na lingling e, gual in kumkhua do na ling ling e, gual in kumkhua do na lingling e, do han ah nau bang va kap tang e” ci in lungleng khua ngaih la na awi uh hi. “Sim kum pha hen na cih leh sim ah kai in, Zo kum pha hen na cih leh zo ah kai in, khai gui kha gah kong ngetna hi, Zo kum kong ngetna hi.
Sim kum kong ngetna uh hi. Tang bem kong ngetna uh hi. Min bem kong ngetna uh hi. Cidam ludam, kong ngetna uh hi. Tusawn tasawn kong ngetna uh hi. Khai pha, tau bulh pha kong ngetna uh hi. Gal manglu, sa manglu kong ngetna uh hi” ci-in phuisam in deih ngetna aneih hun uh zong ki ci hi.
Tu hun in ahih leh khanglui hun i pu i pa te` zatdan banglian in Khuado pawi aki zang theilo ki suak hi. I pu i pa te` Khuado pawi bawlna deihnate lungngai kawm in, minam picing khat i hihna tawh i ngeina kepcingna a hih ban ah i biakna upna tawh kizui-in Pasian tungah lungdam kohna hun, deih ngetna hun in aki zang Khuado pawi hong hi ta hi.
USA gam a om Zomite in i hih leh USA gam a suak, a khang i tu i ta te i ngeina lahna, hilhna ding hunhoih khat zong a hihi. Tua ban ah USA Zomite in i minam kipawlna ahi ZIUSA min tawh khut khat tawi, khe khat khai bangin kipumkhat in i minam, i gam i lei a ding i mapang khopna a hong kilang sak, mipi te hong kaikhawm i ngeina KHUADO pawi zong ahihi.
USA Zomi akuama peuh in KHUADO pawi nuamtak zang thei in, Pasian kiangpan hong pai kilemna, cidamna, kipumkhatna thupha Zomi innkuan khempeuh tungah hong tungta hen! Zomi Innkuan USA, Inc.
Comment piaknop aomleh...