India ah azi in apasal sum zongzo salo ahih manin, thautawh kaplum cimawk

India ah azi in apasal sum zongzo salo ahih manin, thautawh kaplum cimawk

India gamsung aom Mohali City ah nupi khatin apasal thautawh kaplum in aluanghawm pen Suitcase sungah guangphitphet cihthupen Social Media tungah kithehthang in minthang mahmah hi.

Kaplup athuak papipa minpen Ekam Singh Dhillon kici a, akaplum azi minpen Seerat Kaur Dhillon ahihi. Azi in Local Court ah agenkhiatna ah alawmpa pen Saturday (Mar 18) zanin ka kaplup mahhi ci’n genkhia hi. Ka pasal tawh kaki tawngden uh a, tamveipi hongbeng in lungkham simkham in hongkoihden ci’n azi in genkhia hi.

Ahi zongin aomna innneipa Manoj Kumar kicipa ii genna ah hihte nupa pne akitotlam kamu ngeikei ci’n genkhia hi. Apasal pen zingsang 10am hunpawl in nasemding in kuankhiazel a, nitak 6pm khitpawl in hong ciahkikzel hi. Mihoih khat hiding in kamu hi. Atate zong sanginn ah khatangtang hi ci’n innneipa in genkhia hi.

Hihte nupa in ta nihnei uh a, aki teenzawh uh kum 12 bang phakhin kici hi.

Azi in apasal akaplup khitciangin aluanghawm simpaihnuam in, amahguak in likzolo hi. A sanggam pasal khat leh alawmte kiangah huhna ngenin, Pi 6 leh letmat 3 asang apasal luanghawmpen Suitcase khatsungah hencip in, luisung khatah apaihsawm ahihi.

India Today te genkhiatna ah hihpa kithahna vai ah azi ii anu leh ameltheih adang mi 2 zong kihelding uh cihi. Tuaban ah tua aluanghawm akikoihna Suitcase pen mawtaw tungah akoihding ciangin Rickshaw Driver khatinzong doppih kici hi.

Ekam Singh Dhillon pen azi in akaplup madeuh inzong apa tawh kimu uh a, apa in agenna ah aomzia pen a ngeina tawh kibanglo in tuamdiak cihi. Ahi zongin azi lawmlawm in akaplum dingin ka lamenkha hetkei hi. Nungsungteng bel lungkham mahmahna neileh kilawm hi ci’n apa in genkhia hi.

Atapa kiangah banghangin hihzah in lungkham nahiam cih adot ciangin atapa in anzong kanekloh ninih phakhin. Kazi leh kasungnu in hong bawlsiatsawm ci’n genkhia a, apa in adotbeh sawmma in atapa kapin taikhiaziau cihi.

Tuabang tengtawh azingciang zingsangin atapa sihlam zakha ahih manin bangmah vaihawmpih mannawnlo hi. Atate nihin apa vai bangmah theikhalo uh a, akidot ciangin kanu in napa uh nasemding in kuankhia hongci ci’n dawngkik uhhi.

Malaysian Digest leh News dangdang pawlkhat ah aki suahsakna ah Ekam Singh Dhillon pen nasep hoihmello in sumlut kician neilo ahih manin, asungnu in huhden cihi.

More: India gamah pasal khatin naupang kum 7 khat thatin asa ne

Tuahangin azi in gina salo, sum zongzo salo ahih manin akaplum cimawk hi. Manglai in “‘Not Rich Enough’ Wife Shot Husband With His Own Gun, Stuffed Him In A Suitcase” cimawk hi. Sum in innkuansung toksia mahmah mawk hi. ZD Sawltak #zomidaily