Ih sumzondan a maan mahhiam? ~ Deih Tung

Ih sumzondan a maan mahhiam? ~ Deih Tung

Sumzon dan namtam pi omding a,a hizong in thuman lo tawh sum zong kha het kei ni. Ih nasep na, ih sum ngah na in a thuman lo tawh sum ngah na ahi lo dingin akua matek kong deih bawl hi. Mi khem peuh in sum ki zong thei a, a hi zong in sum ki zangh thei kimlo hi. Ih sum ngah na a maan leh a maan lo ei leh ei ih ki thei lua hi.

Ka lawm te khat bang pen ka ki muh cil limlim un sum a neih meel pian khat in ka mu hi. Motor cycle tawh a ut ut na ah vak a, nasep nei lo in a ut hun hun in lum in, a ut hun hun in vak khia hi. A om dan ka theih teh ka engmah mah a,ham pha ka sa hi. Mikhut nuai ah lah om lo insum koi ci ngah hi mawk ding a hiam ci in ka thei nuam mah mah hi. Hih ka lawm pa pen zu a dawn thei a duh khem peuh tawh ki thei a, zu zuak in a vakvak khat na hi mawk hi.

Ni khat in summet Rm 100 tung siah ngah den a hih man in sum nop zat a, sum zat ding pa tau lo hi. Kei kiang bang ah sum na kisap a, haksat na na neih leh hong thei sak in hong huh ding hi ing ci in hong gen gun thei lai hi. A mah zong sum zon siam a, a zi zong sumzon siam zaw lai hi. A inn vuah meh theih neng neng, sakan keu tuam tuam bawl uh a, zudawn thei te in lim sa in lei den uh a hih manin sum nak ngah mah mah uhhi. A sum zat dan uh pen ka engmah mah a, a mau dan in sum zong ding ka hiam ci in ka ngaih sun kha zelzel thei hi.

A hi zong in hih ka lawmpa pen a om na a inn veng te in zukham tam thei lua hi cih na tawh palik te kiang ah ko uh a hih man in palik te in hih ka lawmpa te nupa a man ding in nikhat a inn vuah pai uh hi. Ka lawm pa te nupa pen a inn vuah na om lo uh a, palik te in man zo lo uh hi. Palik te in a inntek pa uh tawh ka lawmpa te inn sung lut uh a, ka lawm pa te zu a zuak te uh a et uh leh kumpi phal na a ngah lo zu vive na zuak a hih manin a innteek pa uh sum tul 5(Rm 5000) liau sak uh hi.

A inntek pa in hih ka lawm pa te nupa hang in sum tul 5 a liau lam a ki theih teh a heh suak mahmah a, ka lawm pa te nupa hawl khia hi. Tua dan in a hawl khiat khit teh ka lawm pa te nupa zong a van uh lah tam, inn khaan dang lah mu lo uh ahih man in buai mah mah uhhi. Nidang in a nasep dan uh ka eng mahmah pen tua dan in haksat na hong tuah tak uhteh ka engna teng hong bei hi.Ka cih nop na ah hih ka lawm pa te a gensia nuam ka hi kei a, sum zon na, nuntak zonna pen thu maan thutak tawh ih zon ding ka mipih te kong deih hi.

Adang ka lawm khat leu leu zong pen ka muh cil a ki pat a omdan nop tuak ka sak mah mah khat a hihi. Puan hoih no no silh zo a, a hoih thei pen inki zem zo a hih manin mihau mah mah khat tawh ki banghi. Ansai khawng ah an ka nek khop uh ciang in anhong taih zelzel a, sumzong hau in ki hau sak pian veve sim hi. Khat vei vei ciangin sum tul 10 kim kim bang a ip sung khawng ah pua thei a, lam dang kasa hi. Hih ka lawm pa nasep danzong ka engmah mah a, a ma nung zui leng cih dong ka ngaih sun kha ngei hi.

Ka lawm pa in bangsem hiam cih ka kan kan teh ka lawm pa in Game aki mawl den khat na hi a, sum a ngah vanglak teh tam pi pi a ngah a hih lam ka thei hi. A ngah hun zong tamvei zaw a hih manin anuam sa a hihi. A hi zong in nisim in Game ki mawl a, sum hau nuam sem sem in huai ham to sem sem a,a tawp na ah a neih sateng hong sum siang hi.

Tua dan in hong sup siang teh ka engna teng hong bei a, game ki mawlmawlte a hoih lo a hih lam ka thei khia hi. Leiba tam pi tak zong nei lai a hih man in a sanggam uleh nau teng in a leiba loh sak uh hi. Lohsak kei mawk le uh a leibat na te un Palik te mansak ding uh a hih manin a leiba teng a lohsak uh ahihi.

Ih sum zon dan a maan mah hiam? Ih nasep pen a thu maan mah ahi hiam? Thu maan thu tak tawh sum a zong ih hi hiam? Hih lai nasim lai tak in na na sep na, na nuntak zon na pen a maan sum zon na mah a hi hiam cih nang leh nang na ki thei ding hi. Azenzen in ih sumzon danin a maan lo, Leitung thu tawh a ki tuak lo na ih sem phialzong in Pasian deih sum zon dan leh nuntak zon na a hih ding ka deih hi. Deih Tung