Ih lungsim puakzia mahmah kikhel’ masak a kul

Ih lungsim puakzia mahmah kikhel’ masak a kul

Switzerland gam, Davos aa kibawl 2018kum, World Economic Forum ah Sen gam aa mihau penpa ahi Jack Ma thu khat ki dong hi. Dotna pen, neihsa sum le paite pia khia in na hoih sepna (philantrophy) in a kisia dekdek leitung aa dingin bang ciang kikhel sakzo ding hiam, cih ahi hi. Ama dawn kikna ah, nung lam in Japan gam ah zingling in buaina kisiatna lianpi piang hi. Tua hun kimpawl mah in Sen gam ah zong zingling in buaina siatna lianpi piang hi. Tua bangin a haksa a genthei tampi te huhna ding pen amau Alibaba Company in US$ tul 15-20 khawng bek pia uh hi.Tua hangin mitampi in lamdang sa mahmah hi.

Sen gam bek thamlo aa leitung ah Company lianpen te lak ah akihel ahi Alibaba Company lianpi in tua zah bek a piak uh pen haivai leh lamdang ki sa mahmah hi. A Company nei ahi Jack Ma in, “Ko Company in bangzah takin hih bangin sum atampipi ka piak hangun a kisiat nate lianlua mahmah ahih manin bangzah bangzah a kipiak hangin kikhelna lianpi taktak tun zo tuanlo ding hi. Tawmvei sung thupi tak ei hong kici ngeingai dingin tua in kikhelna taktak tun zo lo ding hi. Leitung daihna leh nopna aom theihna dingin a thupi penpen in, ei mi mal kei mimal ii lungtang ngaihsutna a man ka neih ding a thupi hi zaw hi.

Itna, deihsakna, veina tawh ka Company makaih in kei tawh nasem khawm, ka Company aa nasem aneu alian tungah itna bulphuh innkuan pih bangin ngaihsun in na ka sem khawm uh hi. Tua bangin kei a makaipa in ka makaih zawh dending ka hanciam hi.Tua in amau lungtang no suaksak in, a nuntakna uh man nei kisa uh a, tua in na nasempa nuntakna khel in, tua in ama innkuan khel aa, tua bangin kikhelna ki lawh tohtohna bek in a kisia dekdek leitung khel zo bek ding hi” ci in dawng kik hi.

Jack Ma mah in agenna ah “Sum pen $2Million bang na neih leh nang pen mihau na hi hi. $20 Million bang na neih leh tua sum pen nang aa hi taktak nawnlo in na beh nap hung, na kim na pam tawh a ki sai sumte hita hi. $2Billion bang na neih leh pen, tua sum pen nang leh na innkuan pihte tawh kisai nawn vetlo ta hi. No sangin a sem theilo a haksa zaw mi tampi takin muanna tawh hong piak hong zatsak sumte hi ci-in ka ngaihsun hi. Tua sumte hoihtak in pungsak in, zek in, tua sum tungtawn in mitampi in nasep neih sak ding, mi tampi tak ii nuntakna a khelzo sum te ahih theihna dingin, ka zeksiam ding pen kei tavuan hita hi” ci zen hi. Tua bangin itna bulphuh, a lungsim puak zia, a Company bup a makaihzia bel nak etteh tak mahmah hi.

George Washington Carver a cihpa pen mivom mi hi in, 1860kum in suak hi. Tua hun laitak pen USA ah mivom khat aa a khangkhia ahih manin sang kahna nuntakna zonna cih te pen haksa mahmah hi. Tua hun laitak in mivomte pen sila nam in aki ngaihsun hi in, deidanna simmawhna pen khauh mahmah hi. Amah lungkia tuanlo in pilna hanciam in leitung nate’ thute kan khia in, sangkah in hanciam mahmah veve hi. Amah in Mawngphal (Peanut) pan in nek theih tuamtuam nam 300 val bang a ki zangthei ahihna mukhia a bawl khia pa khat hong suak hi Ei theihna ah Mawngphal pen sathau bek aa ki zang kisa kha hi. Amah in sathau bek hilo in, coffee, icecream, moh tuamtuam, saban, inn zutna za etc…cih bangin nam 300 val bangah akizat theihna mukhia hi. Min thang mahmah in mi tampi in thupi sa mahmah hi.Kum zalom 19 sungah mi thupi mahmah khat in kiciam teh hi.

George Washington Carver in College sia sem in, itna leh deihsakna bulphuh in lai hilh ahih manin sang naupang te in ama laihilh zaknop sa in a siapa it mahmah uh hi. Sang naupang te in amah tawh kikhawl nuam uh ahih manin a siapa zingsang a lamsiauh hun 5am in tho in a siapa zui uh a, a siapa in zong leitung nate ii lamdangna, a ithuaina, ahoihna thute ciimtak vetlo in gengen hilhhilh mai hi. A sang naupang te in ama thugenna te ngai in tua in pilna deih theihna, lawpna, hanciam nopna lungsim te guan hi.

Tua hun in mikang te in mivom siate kiangah lai a sin theilo himah ta leh, mikang sang naupang te in a sang Siapi te kiangah ngen ngait-in a mivom siapa George Washington Carver ii laihilhna ah sang kah ngiat uh hi. A siapa in a ma nasep tungah itna veina tawh hanciam in na a sepna hangin akim apam a sang naupang teng khel mangin, Mikang te nangawn in ama kiangah lai sin ta uh hi. George Washington Carver in itna deihsakna taktawh lungduai takin a hanciamna leh a lungsim puakzia hangin, akim apam a khel na hi a, tua in leitung kiu khat pan in kikhelna khangtohna a piangsak toto ahi hi.Hong makai ningin leitung kikhel nangin hanciam ni cih kul lo in, mite in a makai a sia dingin akoih makai hoih mahmah, sia hoih mahmah ahi hi.

John C. Maxwell acih thugen siam leh lai-at siampa in a genna ah, makai ding khat in neih dingin a kilawm tampi om hi. Ama mun ah siamna, muh kholh theihna, khensat siamna, ki dop siamna, a nasep na ah a cihtakna cih bangte tungtawn in, makai khat dingin a kilawm ahihna ki khen thei kha mah ding hi. Ahih hangin makai a siam taktak ding or makai dingin a kilawm taktak pen a lungsim puakzia tawh tehkak ding leh et ding hi zaw hi ci hi. Gentehna in, metna ding aomlo nasepna (volunteer) khat makaih sak leng, telnop baih penpen hi ci hi. Tua Volunteer nasep pen akua maciat in metna ngahna hilo ahih man in ih nasep pih ih nungzui te nawtgawp phutgawp theihlah omlo hi.

Tua mah bangin amau ut bangin semsak in ki koltak in khah theih lah omlo leuleu hi. Tua bang hileh nasep-na bangmah ki tangtun zolo ding hi. Tua ahih manin tua bang bilbial kawmkal ah na makaih ahi Volunteer hong semte tungah nasep kalsuanzia ding musak thei, na ngimna te amau zong ngim sak thei, lawpsak leh nawngkaina omlo in makaih zawhna pen makaih siamna taktak ahi hi. Jack Ma te, Gerge Washington Carver te pen tua bang mite na hi ngei mah uh hi. A man lungsim puakzia (Rigth Attitude) bek mah in nasep tangtung sak in, tua bek in na kim na pam khelzo bek ding hi. Tua na kim na pam na khelna in na omna na kipawlna, na khua, na gam cih bangin damdam in hong khel toto bek ding hi, ci hi.

France te galkap mangpi Napolean in “Leitung ah gualzawhna alianpen a kippen leh kisik kik aom lo penpen in ei pumpi ei lungsim ei le ei ih ki zawhna ahi hi” na ci hi.

Westinghouse Broadcasting Corporation te ii CEO ahi Donal McGannon in, “Makaihna pen sepkhiatna hi. Pan mun neihna hilo hi” na ci hi.

A tunga thute tungtawn in ei Zomite akua mapeuh in ih makaih ahi ih innkuan, ih kipawlna, ih pawlpi, CSOs kipawlna, ih company, ih minam bup ih makaih laitak in bangci bang lungsim puakzia tawh makaih ih hiam cih khat vei alungngai kik dingin hih thului tungtawn in akizawn hi ni.

Lungdam,
Khup Lian Thang