Ngaih Anglai Zal Dingin – 9 ~ Hau Za Cin

Ngaih Anglai Zal Dingin – 9

…. ava et uh leh mawtaw sungah galkap khuan ciah khat na tu velval a, Niangno leh a lawmte zong ‘bak vatkhiat’ agen mahmah uh bangin a tucip nolh uh hi. Suanno te huankhang pa a galkap sepna pan kha khat a khuan ciah dinga hong pai ana hi leltak a, Niangno lamet u Suan na hipeuhmahlo hi.

Zan kim dongin a ngaihsutna ah a U Suanno hong ciah ding mahin a deihbawl a, ahi zongin a ciah in a ciah kei zong zingciang Kaptel khualu a Lennupa lamah a lawmte tawh a pai sawm ta hi.

Ihmu mel, ihmulo mel tawh zingsang khua hong vak in a lawmte tawh a kiciam mah bang un Zolengthe Naipi gei ah a kituah uh hi.

“Na ihmu thei uh hiam lawm Niang?”
“Ihmu thei khollo. Aka ihmu bang ing. Nang e leh lawm Kim?”
“Kei bel ihmu thei gawp ing. Ka mangah maw, vangngaih u Mungpi mu ing. A galkap puan tawh hong kizem lenlan in, ka innkong vuah hong pai phei e, ken na dawn, lah kikawi ngam lian lo… ka taktak hileh ut lua ing. Khangtheilo leng ka zalmang bek na hi sese…”
“Nang hampha ciai. Ei kuamah mu se khang. U Suan zong mu beeklo. Mu man dinga zong ihmu siplo e maw… koi ah i lawm Nemno e?”
“Hua ah hong pai veh. A ngeina hi, amah a sam laang neunau… a van zong a guang khit nai loh pi… nu vaw… i lawmnu mahmah bel…”
“A hiaci a, khuapih tangvalte in zong a ciamnuih bek ve vua… Hong tungta maw lawm Nem”
“He, no na tung khin maw? A paiding dang a om hia?? A om kei leh pai pah leng hilo dia… ei teng bek ihih leh bel tangvalte in hong zui nuam ngel lo dia mate…. ha ha ha….. ”
“Dihdih u ciai…. ciamnuih gen man hi kei ei, paipah ni ei. Khuazing ma in tung nuam hang ei”

(zop lai ding)

Hau Za Cin
Phuitong Liim