I tate’ mailam pilna makaih ziading ~ Go Lian Kap

I tate’ mailam pilna makaih ziading ~ Go Lian Kap

“Train a child the way he/she should go…” Porverbs 22:6 Parents Academy for Students Achievement (PASA) training pan a ka ngahkhiat pilna lam ah tate’ makaihziading pawlkhat Zomi nu leh pa te’ theiding thupi sa ka hihman in pawlkhat kong hawmsawn nuam hi. Ka om na uh Kent city, Washington State ah naupangte’ mailam pilna lam ah gualzawhna a sangzaw a ngah theih nading deihsakna tawh Kent School District panin kum khat in 2 vei ta PASA training nu leh pa te ongpia uh hi. Hih training sung kasin thu tampi lak ah, I tate sangkahna ah a thupi nam 3 I kikum ding hi:

• 1. khangno te’n a golteh bang suaknuam ( educational and professional dream/career),
• 2. Naupang te’n inn leh sang inn ah lai bangci sim ( homeworks, class activities), leh
• 3. Inn ah nu leh pa te’n I tate’ laisim hunding bangci geel sak? (time management).

1. khangno te’n a golteh bang suaknuam (Educational and professional dream/career)

I tate’n bang lamsang sin uh leh nuamsa? A gol uhteh bangsuak nuam? Cih a ngimna uh leh a sunmang (dreams) te uh I telsiam ding thupi mahmah hi. A mau ii uukna leh lung-gulhna tawh kizui in a thalawp semsem nadingun pat-tah siamding thupi mahmah hi. Galkap buu a suaknuam naupangkhat I pat-tah nop leh a ma ii laisim dingpen gaalkap lim a tam theithei leh gaalkap tawh kisai a sim nop tata simsak dending leh musak dending thupi mahmah hi.

Tham lo in, hun awng I neih teh gaalkap office leh gaalkap khatpeuh kiang vapai in va kimusak ding; galkap a suah theihnadingin bangteng kalsuan ding cihte vaki hosakleng a lungsim uh ah lawpna khang semsem in, ei va sawlsawl kul-lo in a suahnopna hangin lasim hanciamsak mahmah hi. Ka PASA training lai in ka class siamah nu’ ii papen kum 27 sungbang vanlenghawl hi.

Ka tapa,Khai no, pen vanlenghawl suaknuam a hihlam ka genteh a patawh appointment bawlin ko omna pan in minute 45 mawtaw kihawlna ah vaipai pih in apa leh ka tapa Tg. Khai no (kum 13,taan8) tawh vaki holimsak hi. Apa’n zong hoihtakin lam nahilh a hihmanin ka tapa bang a lawpna khanglua kisa in tua khit a kipan a grade teng a vekin A leh A+ bekbek ong ngah hi. Kacihnopna ah naupangte’ suahnopna lampi nu leh pate’n na telpihin tua lampi ah phaltakin na paisakleng a mau a dingin gualzawhna in ngak a hihlam mipil te’n lim gen mahmah hi.

Ei Zomi nu leh pa te’n “ nau pang bangmah theilo” ci-in I tate’ lung-gulhna I nawlkhin (ignore) san lel hi; hihbang ngaihsutnapen khialhna lianpi a hilam mipil te’n lim gen mahmah hi. A kum tawm lai a kipanin a mau ii lampiding ah I pat-tah dingpen nu leh pa te’ mawhpuak a hilam theih huai mahmah hi. A golciangun, a suahnop na khat peuhpeuh a matut zawh nadingun nu leh pa te’n thapiakna leh lam lah na i neiding a thupipen a hihi.

Zomi Nu leh pa pawlkhat in bel naupangte’ uukna leh suahnopna thulaak sak lo in, a mau ii suahsak nopkhat hahsawl in naupangte’ uuklo pikhat utlo pipi in zuisak uh hi. Hihbang ngaihsutna pen gamkhangto leh mipil te’n nazanglo uh hi. Thamloin, hihbang kimakaihna tawh naupangte’n a sangkahna mabanuh ah thadah leh cimtak in lawpna neilo uh a hihman un a tup uh tung zolo in dinkhawl thei uh hi.Tua a hih man in I tate’n a golciangun bangsuaknuam hiam cih nu leh pa te’n I theih ding thupi mahmah hi.

2. Naupang te’n inn leh sang inn ah lai bangci sim (Homeworks, class activities)

Zomi nu leh pa te diakdiak in I tate USA ah sang a kah naak uhleh pilna namkim a ngah kim leldingin ki tuat a, I tate’ sangkahna ah sangsung leh inn ah a mau adingin bang kisam pipenhiam cih don in ki neilo hi. Naupangte’ mailam pilna lam gualzawhna dingpen sangsia te’ mawh puakin ki ngaihsun khamawk a hihmanin i tate’ sangvai ah thuphamawh in ki ngaihsunlo hi. Zingsang sangkuan in nitaak ongciah naak uhleh a hun a tunteh pilna a ngah leldingin ki tuat hi. Hihbang ngaihsutna pen khialhna lianpi a hihi.

Naupangte’ mailam pilna lampi (educational journey) pen sangsia te’ tungah 50% ki-nga a, nu leh pa te’ tung ah 50% ki-nga hi. USA gamsung pilna lam ki makaihzia (learning system) pen active learning system kici a, ei kawlgam dan a, laivuanpi teh ong leh kia cihbang hilo hi. A thupidiak ah, naupang te sang inn pan ongciah uh teh homework a nei hiam? Due date cik ni hiam? online homework a neihiam? Cihte I theikimding thupi mahmah in, nisim homework a bawlna uh te leh a dang tuamtuam kigawm a kumkhat sangkahna mat kipia a hihmanin na khempeuh a thupi mahmah a hihi.

Nisim a sin uh laite inn ah khatvei enphasak kikleng hoih penpen hi. Nisim in a homework te uh sit denin bawlpihden ding thupi mahmah lai hi. Adiak in elementary lamtebang writing and reading practice ong ki puasak dending hi. Banghanghiam cih leh naupang te a mau laitaan tawh kizui in English bangtanciang simtheiding cih education department in ngimna leh geelna koihden uh hi. A mau ii zawhlohding a haksalua kipialo a hihmanin nu leh pa te’n nisim naupangte’ homework pelh lo bawlsak hamtang le hang pilna lam ah zekai cih om ngeilo hi.

Naupang te’n laisim a hanciam theih nadingun reading lamsang pat-tah mahmah ding leh laisim a uuk theih nadingun lamlahding thupi mahmah hi. Tua a hihmanin, i tate’ ading hun la tangtang in I omom na city library te ah paipih den in a mau mintektawh library card te bawlsakin laibu kawmsak tangtang ding thupi mahmah hi. Hih USA tualsauk mikang te’n a tate uh tan-lang (K-g) a hihnak uh leh library card a mau mintektawh bawl in laibu a mau kumtawh kituakin kawmsak tangtang uh hi.

Hihbangin a neu uha kipan pantahleng laisim ong zongsang toto ding uh a, a mailam uh pilna lampi kihon na lam lianpi khat asuak hi. Tua a hih manin, naupang te’n sang inn ah tuni bang sin uh a,bang homework a nei uh hiam cih nisim sit-tel ding thupi mahmah hi. Thamloin, sang inn a, a sinsa tenguh bek tung kingalo in, inn ah zong nu leh pate’n nakpitak in laisim leh homework bawlsak dendingzong thupi mahmah hi.

3. Inn ah nu leh pa te’n I tate’ laisim hunding bangci geel sak? (time management).

Zomi nu leh pa te’n bel naupangte’ pilna lam ngimna sangin sum leh paai ki kinbawlzaw a hihman un tate maikaih tanghtang ki tawm mahmah hi. I tate sang inn pan ongtun phet un computer leh TV enpah uh a, an nekawm nangawnin en lailai sak uh hi. Naupang pawlkhat leuleu computer ah game bekbek kimawkmawl lualiangin zankimdong lumlo liang uh a,a hizongin Zomi nu leh pate’n almawh peuhmah lo uh hi. Thamlo in, hihbang naupangte’ computer game leh TV a et-et uhpen kipaakna khat bangkeek in la laisop uh hi.

A tuadingmah deihna in Zomi nu leh pate’n TV LCD a tam man tata tawh kidembawl lai in sun leh zan leh khawlhunphial omlo in TV leh computer game tawh kinitumsak hi. Ka tate’n a sang inn pan bang homework nei hiam cih ki ngaihsun lo. Ka tate’n lai zomaw zolo cihte leh sang inn ah gamtat hoihmaw hoihlo cihte kin in kinei vetlo hi. Zomi te inn pawlkhatbang vahawh leng a ta te uh game leh TV tawh buai in ging ziazua uh a, nu leh pa te’ kiho ki za zolo phialin om mah taleh nu leh pa te’n phamawh sapeuhmahlo uh hi.

Pawlkhat bangin iphone,ipad, smartphone, game leh TV te pen naupang khemna bangin zang uh a, a deihdeih un hunciangtan neiloin kimawlsak uh hi. Thunget ka vak lai in leh ka khualzin n ate ah, nu leh pa te’n tate thungending samlo in, ko thungetna gei ah TV game kimawlin ging ziazua uh a, nu leh pa te’n a tate uh Pasian theisak nuamlo hinteh maw cimai ing;hihbang nu leh pa pen Zomi a tamzaw kihiphial hi. Tulaitak USA a Zomi nu leh pa te’n I tate makaihzia pen mipil te lamlahna tawh a kibang khatzong omlo hi.

English 101 ka laklai a, ka siamahnu in a tate a khualna in a inn ah TV koihlo ci hi. A tate himhim a phone tawh game a hi a bangmah kimawlsak ngeilo ci hi. PASA ka sangkahna ahzong, mikang nu leh pa a tamzaw te’n naupangte’ mailam a khualna in inn ah TV koihlo ci uh hi. Thamlo in, a kisamloin naupangte computer khoihsak vet lo cilai uh hi.

Naupang tepen ukcipding leh thongkia bang a,suahtaak hun omlo liang a gakcipding hituanlo a hihi. A mau a dingin hun geelsiamding thupi mahmah a,na khat peupeuh ah a khengvaal a i omsak lohding thupi mahmah hi. Athupi pen ah, sang inn pan ong ciahciang un homework bawlsak masakding thupi penpen hi. Laisim hunsung zong nai ciangtan leh hun-awng minute 15 bang piak zelding thupi mahmah hi. Gentehna in, nitak laisim hunsung pen nai 2:00 sawtding bang a hih leh nimute 30 ciangin minute 10 bang break lasak zelding cihdan hun geelsiamding thupi mahmah hi.

Laisim hunsung in inn sung ah TV leh phone te a kipan zatlohding thupi mahmah hi;ahangin, alungsim vuah lai a omlaitakin nadangkhat lut leh a lunglutna uh beimang(distract) thei hi. Laisim hunsungin sabuaikhat zangin nu leh pa a man zawzaw in ompih hamtangding leh bang lai sim uh hiam cihte theisakding thupi mahmah hi. Inn dei kiciangzaw deuh a neite’n laisim khan nei hamtang dingin, tuakhan sung inn pang ah lim a hi a bangmah suangloding thupi mahmah hi.

Naupangte lai pumsimsak zong a mau a dingin lawpna khanglo a hihmanin ei neihdan kizui in alaisim uh leh a homework uh a manzawh leh sum a hilo a dang nakhat tawh letsong piakbawl leng amau thalawp tuam mahmah uh hi. Mipil te’n a tate’ mailam hoihnadingin nisim hun schedule bawl den uh hi. Laisim hun,hun awg lakhun, an nek hun, leh luphun cihte naitawh kician takin kalsuan tangtang uh hi.

I tate’ ading i deihsak leh a mau ii deihna leh suahnopna I ngaihsiamding thupi mahmah a, tua lampi ah i totsiam sakding leh i lamlah siam mahmahding thupimahmah hi. Naupang te’ mailamdingpen pilna mah a thupipen a hihmanin sang inn leh inn ah lai a hahkatding uh thupi mahmah hi. Thamloin, sang inn a, a sintengbek uh siksan lo in inn ahzong I hihzawhzahzah tawh nu leh pate’n i pat-tah tohtoh laiding kisam mahmah hi.

I tate’ mailam i khual nop leh a kisamloteng hemkhia in, a thupi leh a kisam ngaih sut na, ki pat-tah na, leh kalsuanna te i zatding a thupi pen a hihi. Thamloin, Zomi nu leh pate’n mipil tetung leh mikhangto te tung kipat-tahna hoih te et-teh in i zuihpahding thupi mahmah hi. I tate pen i pat-tah tangtangding a thupi pen a hihi. Mi te tawh kihoziading, leng la do ziading, inn ah phone ong lut leh mite’ a hopihziading uh cite a kipan i pat-tah mahmah ding kisam hi. Pa Go Lian Kap (Student of law at Highline College, Seattle, WA)