I khuaciat i kepbit ding kisam ~ Sia Do Khup

I khuaciat i kepbit ding kisam ~ Sia Do Khup

Gamdang a omte bek huhna i ngak ding hisam lo hi. Khua khatah a cithei zawdeuh om ciat hi. Ei khua ciat adingin thasanin piakkhiat kipat hun ta hi. Lockdown ding vai ahi zongin oxygen vai ahi zongin i khua sungah fund zong masa ciat ni. Hih natna khua kim phial ah hong kizel hita mawk ahih manin kipawlna, khat leh nih ii sep zawh ding hi nawn lo hi.

I KIKHASIAT LAWH DING NAI MAHMAH TA HI

Tulaitak a kiphal tak a, a piakhia sanggamte pen khua tuamtuam pan ahi hi. Cikha bek ahih lai-in vaihawm baih lam mahmah hi. Tuin Covid 19 tunna khua tam lua ta ahih manin i sum i van neihte in hong cin nawnlo ding hita hi. “Ko khua hong kiphawk lo” cih hong om loh phamawh ta hi. Tua bang hong om loh nadingin i khua ciat adingin khua ngak pawl zong i hanciam ding kithawi kholh ding ahi hi.

A LUNGKHAM HUAI KHUAHUN PAI ZIA

Kawlpi ah Covid nasia mahmah ta a, nisimin misi tampipi om den ta hi. Ko veng sung bekbekah zong i it mahmah mi thum bangin tuni in hong nusia hi. Sai pawlkhat kikhak ta a, zatui deih bangbang kingah zo nawnlo hi. Kim Taihte thukhualin kong hong kiukiau lai uh ahih manin zatui lei ding mi kigual zihziah hi. Phone ka setset hangin len man lo uh ahih manin a phual ah ka pai a, amai lam dim lua ahih manin innpang lam zato kilahna lam pan Syamate kiang huhna ka ngen mai hi.

ZATUI SAI TEN ZONG DEIH ZAHZAH NGAH NAWN LO

“Zatui zuakte kiangah ‘Hehpihna tawh phone na len un, Sia Do Khup in ci’ hong cihsak ve” ka ci hi. Amau inn pan mahin phone tawh ka kiho liang uh hi. “Sia aw hih a phual a ngak tam lua hi, zatui a lom a lei ding hong guansak man kei nung” hong ci uh hi. “Kham lam a ka puak ding hi, hehpihna tawh” ka ci teitei mawk hi. Ka zatui deih teng kingah zo nawn lo hi. “Sia aw ko zong nidang bangin deih zahzah lei khuan ngah nawnlo, Kawlgam bupah zatui haksa ahih manin zatui sai khat in tua zah lei thei ding, cih tawh hong hawmsak ta hi” ci mawk hi.

Khua, pawlpi, veng, mimalin a kisam van leh na thu leh la vaihawm kholh hun mahmah ta hi.

TUNI ZOGAM SUNG DIN MUN A NUAI A BANG HI.

• Cikha ah mi 96 kisit a, mi 21 positive hi. Cikha pan 239 a kimuhna hita hi.
• Tonzang ah 24 kisit a, mi 6 positive hi. Tonzang ah 205 a kimuhna hita hi.
• Tedim ah 174 kisit a, mi 63 positive hi. Tedim ah 105 a kimuhna hi ta hi.

Kisit kim zo hileh Zomite sungah a tulsawm a sim om ding hita hi. Hong damsak thei, pulnatna a vengsak thei, Topa kiangah thungen ciat ni.

More: Banghang in pulnatna tunghiam ~ Sia Do Khup

Tonzang Siavuanpa Dr. Khai (JK Thang Sian Khai) hong puakna a nuai a bang ahi hi. Dr. Khai in i nasepna a lawhcin theih nadingin nakpi takin hong huh ahih manin ama tungah lungdamna lianpi i ko hi. Sia Do Khup