Banghang in pulnatna tunghiam ~ Sia Do Khup

Banghang in pulnatna tunghiam ~ Sia Do Khup

2 SAMUEL NIHNA 24:1-25 Mihingte kipilsak, kihatsakin lawhcinna gualzawhna a omte mihing thahatna a sak khak uh ciangin mihingte tungah Pasian heh hi.

A KISEH HUN A CIN MATENG

15;Tua ahih ciangin Topa in zingsang a kipan a kiseh hun dongin Israel-te tungah natna tungsak hi. Dan panin Beersheba dongin mihing tul sawmsagih (70,000) a si hi.

A KISEH HUN A CIN BAIH NADINGIN

17;“En in, ka mawh hi; a khial pa pen kei ka hi hi. Hih mite in bang khialhna nei ahi uh hiam? Kong thum hi; kei le ka innkuante bek gim hong pia in,” a ci hi.

Vantung thu, leitung thu-ah mi’ mawhna bekbek a zongzong Zomite in David bangin “Kei mawhna hi” i cih theih ciangin Pasian maipha zong i mu ding a, i minam sung vaihawmna ah zong gual khan i khup thei pan ding hi.

LUNGSIM TAKPI TAWH PASIAN BIA NI

Lungsim takpi tawh kisikkikna lah nadingin i neihsate phal ding hihang. 24;Ahih hangin kumpipa in Araunah kiangah, “Hilo hi; nangma tung panin hihte a man tawh kituakin kong lei ding hi. Topa ka Pasian’ tungah kei’ sum bei loin meihal biaknate ka pia kei ding hi,” a ci hi.

MAKAITE A KIPANIN MIPI DONGIN

25;Tua ciangin David in Topa a’ ding biakna tau khat tua lai-ah lam a, meihal biaknate le thunuama biaknate a pia hi. Tua ahih ciangin tua gam adingin thumna Topa in ngai a, Israel-te’ tung panin gimna a veng hi.

Hih pen tualthahna, guktakna, angkawmna hang a mawhna daan hiloin lungsim kiphatsakna, kiliatsakna hang a daan piakna ahi hi.
Tua ahih manin biakna makai, minam makai ten “Kei mawh keng, ka mawhna bang hiam?” ci gemgam den lo zaw-in, Pasian deih lungsim ka pua hiam? Pasian deih bangin mipi ka makaih hiam? cih kisit phat ciat ding ahi hi. Tua ciangin i minam sungah thupha hong tung ding hi.

KHATVEI NONG ET HINNA KHUAVAK HI ZO

16;Vantung mi in Jerusalem khua a susia dingin kithawi-in a khut a zan ciangin tua tatsiatna panin Topa kisik a, mite lakah suksiatna na a sem vantungmi kiangah, “Phazo hi; tu-in khawl ta in,” a ci hi. Hih Pasian kammal hong gin mateng leitung panin pulnatna veng nawn lo ding hi. Sia Do Khup