Hunlehmual ~ Pu Zokhai

Hunlehmual ~ Pu Zokhai

Mipihte, “Hunlehmual” -pen pupa’ kammal zatzaang lak-a “munlehmual”-tawh akidang mahmah, athuukzaw-a kalhkhiatna bang-in hongsuut nuam-ing. Munlehmual cihciang-in amun-amual, akiim-apaam kawk-a genna hi-a, geographical features or circumstance agenna ahihi.

Hunlehmual cihciang-in thu-khat apian laaitak-a akiim-apaam omzia, ahun ani ahihkeileh akhang (age or term), tua hun-a kiimlehpaam’ muhna leh dawntuahna taangpi, cihte khempeuh ahuam kammal hi-a, English te-in context acih-uh kammal ahihi. Hih kammal-tawh kizuui-in “hunlehmualzil-a lungngaihna (contextualization: consideration of something in its context)”-pen thu khatpeuhpeuh kikupna-ah, thugen lasakna-ah, gelhna-ah aphamawh thupi mahmah khat ahihi.

Hih hunlehmual nangawn tangkawktuam (specific) deuh-zong azingzing-in omto laai-hi. Lpd; taangthulamsang hunlehmual (historical context)., kiuknalamsang hunlehmual (political context)., sahkhualamsang hunlehmual (sociological context)., Lai Siangtho lamsang hunlehmual (Biblical context) cbt. Hihte-pen kipilsak, kitheisak cihlam hilo-in, pilna leh thutheihna (wisdom & knowledge) peuhmah azung maan, agui dik-a minam sung-ah vawh theihding haanciamna ahihi.

Kammal lianpite minam sung-ah pulaak kuul-a, thutheihna taangzai mawkmawk hilo-in, lamzing maantak leh diktak-a lungngaih theihna, ngaihtuah theihna, suut theihna leh kamkum theihna naakpi-in kipattah hunlua ahihziak ahihi. Kammal-pen sil, sillaak, zialaak, zialaakzuui, (noun, adjective, verb, adverb) paizia-tawh akikhen sitset lohman-in lailam khantohna omlo-a, mipil ulian pipi-a I-sehte nangawn-in alum alet-in honggelh zeel uhhi.

Hih aneng-atawngte aki-gualhcianloh nungsang kammal lianpipite akitheih, akizat theih nading thu omlo-a, tua thutheihnate lo-in minam lungsimpuak peuhmah gualbaan ngei loding kilangh silsel-hi. Kammalte akizuun loh-in Zopau kammal akitaangzat mal 250-300 kikaal khawngbek a-om hi-a, Pu Pau Cin Hau’ bawlkhiat Zotuallaitua inzong hih aki-taangzat kammalte bulphuh ahihman-in thupi suut taktak ciang-a hong kicing theilo (tu-in hahna zuunna omtaleh tua-hun laai-in kicinglo) ahihi.

Kammal lianpite-pen Leitung alumlet sahkhualam siamsinna guipite hi-a, Zomi genloh Kawlte-inzong Commonwealth Gamliante-tawh aki-el nungsang 1962-a kipan tuciang laibu manpha minthangte angahlo ahihman-in tuabang gualbaan kammal lianpite neilo uhhi. Saanginn-ah sinding gamukte-in khaam cih nungsang koici theih mawkding mataw! Tua hi-a, lahpak ding-in, Socialism leh Democracy-bangpen bil-tawh kimeeltheih mahmah saam, tua kammal lianpite’ thuukzia, ahuamzia, asepsuahzia kithei peuhmah lo-hi. Hihteng I-suutpak zongpen hunlehmual kammal pulaakna ding-a theihhuai contextual clues nengcik asuut I-hihi.

Hunlehmual-tawh thu khatpeuh suutna, kikupna neih theihding naakpi-in thupi-a, apiang thu khatpeuh’ hunlehmual kan theihding naakpi-in thupi-hi. Akigelh laibu thu kikupna-ah gentehna-in, laibu buppi’ muituum theihzawh nading-a sim kuul-a, kammal khat atung-anuai, anung-ama thute telcian kuul-hi. Zomite’ laisim sunsun ataangpi (kician-a simzong om ngaplo himahleh) Lai Siangtho hihtuak ahihman-in themcik enpak lehang: Kumpi Solomon-pen Israel Kumpi hi-a, Pasian-tawh akiho, Pasian’ lamlahna azuui (zehphi khasaam naven) biakna-zil mahmah Kumpi Lian khat ahihi.

Ama’ laphuak sung-ah, “Hong uk kumpite’ thu nana mang un,….., Kumpipa-in Topa’ lamlahna-tawh vaaihawm,….. Topa’ Thukhaam zuui-hi.,” ci-hi. Hih-pen laphuak Kumpipa’ hunlehmual I-theihloh man-in “tungsiahte’ thuthu akawi amaam-a zuihding” kisa lawmlawm-hi. Tua thutheihlohna ziak-in Peter, John leh Nungzuuite-in tungsiahte’ thupiak “…… gen nawnkei un” acihpen manglo, zuuilo kisa-in ZEISU’ thu gen teeiteei-a aluang-uh’n atuah thu nangawn amanphatna kisuut ngeilo-hi.

Gentehna-in, “ui”-pen Israel te-in “agilo, akawicip, akihhuai, misia” agen ciang-in “ui”-tawh teh-hi. Ahizong-in Irish, Scottish, Polish tebang-in “muanhuaina lamsang-ah Tuunnu’ zom-a amuanhuai, ui’ zom-ah Ngaihno” ci-in apiibawl mahmah ganhing thupi khat ahihi. Israel te’ ading-in “Tuu (sheep)”-pen dikna, siangthona, thumaanna, mawhbaanlohna lamsang-ah athupipen ganhing hi-a, China-a nampi khat bang-in amuh-in mudah, kih, lipkhap uhhi. Hihte-pen cultural context-a thusuut nading tawsawnpite ahihi.

Gentehna tomno khatlaai-ah, Paul-in Timothy’ kiang-ah,”.. leenggahzu tawmtawm zangh in” acihpen hunlehmual akitheihloh man-in zudawn theih nading lampi-in kizangh kha-hi. Hunlehmual banghiam cihleh Timothy-in gilpi-natna vei-a, Pasian it ahihman-in zu tang-hi. Tua hun-a zu-pen gilpiza hoihmahmah ahihi. Paul-in Timothy agilpi akisiat loh nading-in “tawmtawm zangh in” aci hi-a, natna-tawh kisai ahihi.

Sanggamte khat vaakthaapden ahihman-in anu-in, “Abang vaakvaak lawmlawm nahia? huanbeek, huangbeek hahve” acihleh “Kalaisai, nu, LST sung-ah note vaak kawikawi unla’ acive” cise-hi. Hih-pen ciamnuihna-tawh akisut hang-in tuhun-a Zomi thugen lasa khempeuhte’ reference laakzia hihbangpian hive hi-a, hunlehmual kilungngai vetlo-hi.

Gentehna nunung ding-in, khuapihte nih Keizaang-ah innsing puading paikhawm uh-a, khat-in suunsiah pua-in akhatzaw-in pualo-hi. Singtawh hongciah uh-a, Muizawl khua-nawl atun-uh ciang-in suunsiah puapa-in, “gilkial peuhmah, suunsiah nedih ning-e” ci-hi. Suunsiah pualopa-in, “Nang’ tung-ah hong kibawlding na’ deih bangkeek-in midang’ tung-ah bawl-in cive-aw” acihleh, suunsiahneipa-in, “LST sung-ah mi’ neihsa na’ duhgawh kei in acive” ci-in asuunsiah hawm tuanlo-hi.

Ei mimal’ phattuam nading peuh-a laak ziauziau kisiam mahmah-hi. Thuciam Masa laai-in Sehsuah angen Pasian hi-a, Thuciam Thak sung-ah nungta akisapipi kawmkawm-in pastol teng-in sehsuah piakding haanthawn ngangngang uhhi. Hihte-pen I-sim sunsun LST mahni’ ading-a zatna hi-a, ahunlehmual-tawh kisai kilkello, ahunlehmual theilo ahihkeileh kitheihmawhbawlna ahihi.

Khual ka’ zinding sim-in ka’ lungsimpuak hongtel mahmah ka’ Pa-in hong vaaikhaakden thu khat-pen: Thumaan na’ deih-a, na-haangsan mahmah-hi, ahizong-in tungsiahte’ kampau dawn giapgiap-pen kidawm mahmah in, na’ maan mahmah zong-in thuak keeikaai kisin in” hongci den-hi. Bang hunlehmual-tawh honggen-hiam cihleh thudangte ka-zawh mahmahlam ka’ Pa-in thei-a, thumaan akizat theih taktaklohna Kawlgam-a khangkhia ka-hihna uhtawh bih-a lam honglak ahihi.

Hih lamlahna ahihkeileh vaaikhaakna-pen thumaan deih tiilteel khollo, mi’ cihpeuhpeuh amang zaugawp mi khat’ ading-in mannei lo-a, akizat nading omlo, thamlo-in tua-mi’ tung-ah apply (tukha) lo-hi. Kei’ ading-in ahihleh hong tukha lua kisa tuni dongmah ka’ Pa’ vaaikhaakna dimtak-a azuui zo naailo ka-hihi. Thumaan gen theihna gam tung sawnsawn kahihman-in zuihding ka-haanciam nawnkei laai-hi. Banghanghiam cihleh ka’ Pa’ lamlahna hunlehmual tel kahihman ahihi. Zomite hunlehmual ngaihtuah theikim ding-in Pasian-in hongsiam tahen! Zokhai (60 Narr-Maen Drive, Croydon Hills Melbourne)