Hudson Taylor tangthu tomkim

Hudson Taylor tangthu tomkim

Kum 1832 in piang a, 1905 kum in si hi. China gam, Ningpo kicihna khua ah Missionary in va om hi. Kum khat tawntung Pasian thu a gen khit ciangin kuamah ngah nailo hi. Lungkia lo hi. Gen veve hi. Chinate pen thusiam thei mahmah napi uh Jesu thu sang thei mahmah lo uh hihtuak hi. Thuthak (news, leitung thu leh la tuamtuam) khawng a gen ciangin, za nuam napi uh, lungdamna thu bel zathei meello uh hi.

Nikhat, lungdamna thu a gen khit ciangin, papi khat khitui luang liangin Pasian tungah ki-ap hi. Tua papipa pen papi mawkmawk hilo hi. Buddhist biakna ah a khauhpai mahmah khat ahi hi. A khuasung uh a mite’ zahtak, tulai pau leh intellectual mahmah khat hi sawnsawn hi. Taylor in lamdang sa mahmah hi. Tua papipa dingto in teci pang hi (testimony gen hi).

“Thuman thutak ka zon sawt ta hi. Ka pu ka pa’ khang uh a kipan ka zon uh hita hi. Ka mu kei uh hi. Confucianism ah ka zong hi. Taoism ah ka zong hi. Buddhism ah ka zong hi. Koi mah ah ka mu kei hi. Ahi zongin tunitak in Thuman thutak ka mu ta hi,” ci in testimony gen hi. Taylor bangzahtak in lungdam ding hiam.

A zingkhawng ciang, Papipa in Taylor zawn in Buddhist biakinnah paipih hi. Tualai ah zong teci pang hi. A teci panna tungtawn in a dangkhat hong piangthak leuleu hi. Tua bangin papipa tawh kithuah in Ningpo khua-ah lungdamna thu hong tangko kawikawi uh hi.

A lamdang mahmah pen hih ahi hi. Nitak khat Pasian thu kikumkum uh hi. Papipa in, “No Mikangte in hih lungdamna thu na zak uh a sawt ta hiam?”ci in dong hi. Taylor in, “A kum za-in paita mah ei,” cihsan huat hi. “Bang e Sia?” papipa in dong kik a, “Kum za tampi e, Sia?” a aw bang ling dedelh zawzen hi. “Ko gam-ah lah nong gen het kei uh a? Ka pu in za leh um mah ding hiven. Ka pa in zakha leh um mah ding hiven. Ki-awi taktak sam uh ciai! Bang dinga hong pai baih zawdeuh lo na hi uh hiam? “ Taylor in dawng thei hetlo a, anih un kikawi in kap ngekngek uh hi.

Fellowship News