Hong Kong ah phalbi khuavot huihlak ah Cable Car tuanlaitak mi 210 awkcip

Hong Kong ah phalbi khuavot huihlak ah Cable Car tuanlaitak mi 210 awkcip

Hong Kong ii Southern District sung aom Ocean Park kicihna ah akituangthei vandawn huihlak kikawmna “Cable Car” te awkcip cih SCMP pan kiza hi. Tua Cable Car pen Saturday zanlam in vandawn huihlak ah nailang sungbang a awkcip hi a, phalbi khuavot mahmah laitak hisawnsawn hi.

Southern District Amusement Park panin thunei ahi Spokeswoman khatin agenna Cable Cay System ah akizang Ropeways nihte lakah khatpen asetsia, Mechanical Issue omhi ci’n genkhia hi. Nitak 7:43pm hunpawl in kikhawlsak a, Park Staff te’n hoihtak encian, Inspection bawl uh cihi.

Huih hatlua ahih manin Platform tung aom Station Railing leh Cabin khat kinawkkha in, adang tengzong aomna mannawnlo, Misalignment ahih manin Cable Car Cabin khempeuh a awkcipsak cihi.

Hihbuaina apianni sese leh khuahun avot mahmah laitak tawh kituak citciat hi. Saturday sunlam in Hong Kong Observatory te’n khuahun votmahmah dinghi ci’n Weather Warning apulakkhiat uh hi a, tuazan lianin hih buaina apiang ahihi.

Vandawn huihlak Cable Car sungah akigawm in mi 210 atuan laitak uh hi a, tuateng avekin nailang sungbang a awkcip uh ahihi.

Nitaklam 8:16pm hunciang in asiacip Ropeway pen kizangkikthei a, tuaciang in Cable Car sungah a awkcip tezong pusuak theipan uhhi. Hih Cable Car buaina hangin asi aliam kuamah omsamlo uhhi.

Nitaklam 8.52pm hunciang in Cable Car sungah a awkcip khempeuh avek un suaktathei uhhi ci’n thunei te’n pulakkhia uhhi.

More: Hong Kong meileng lampi tungah numei khat asawnkhiapa kimanta

Hih Cable Car pen abeisa 2007 August khasung inzong tawmvei awkcip ngei hi. Tuahunlai in Passenger mi 280 atuan laitak hi a, Conveyor Belt kitat ahih manin Minute 8 sung vandawn ah awkcip ngeihi. Sawltak #zomidaily