Hong Kong ah dawlnih Bus golpikhat tuahsia in mi 19 sikhin, 10 val liam

Hong Kong ah dawlnih Bus golpikhat tuahsia in mi 19 sikhin, 10 val liam

Hong Kong gamsung ah tuni Saturday (Feb 10) nitaklam in Bus dawlnih aphate khat tuahsia ahih manin mi 19 sikhin a, adangzong aliam tampi om cih AFP pan kiza hi. Tua dawlnih apha “Double-decker Bus” pen atuahsiatna Photo zong Social Media ah ki khahkhia in, cikziat huai mahmah hi.

Hong Kong, Northern New Territories aom Tai Po Town sungah atuahsia hi a, Bus ii atunglam pen siagawp in, leilak ah apanglam in kiphahsuk zihziah hi.

Lamzikpi tungah atailaitak in apanglam ah talsuk in, tuakhit ciangin meikhuam “Lamp Post” khat amailam in nawkkha sawnsawn hi. Hih tuahsiatna apian ciangin ahuhding in Rescuers te’nzong delhpah uh a, Double-decker Bus sungah a awkcipte hotkhiattheih nadingin kapanpah ngeingai uhhi. Police te’n ahihleh hih atuahsia Bus sungah mi bangzah awkciplai cihpen pulakna neinailo uhhi.

Hih Bus tuahsiatna ahang taktakpen thunei te’n pulakna akician in neinailo uh a, ahi zongin Local Media te’n ahihleh Bus Driver in hat hawllua in tuapan in akibung ci uhhi.

Aliam Passenger khatin SCMP te kiangah agenna ah Bus adangdang te katuanngei sangin hih atuahsiatma ahawlzia pen hatlua mahmah hi ci’n genkhia hi.

Tuabang in ahat mahmah laitak in mawtaw apei Tyre kitam hidinghiam, hongtalgawp in, tuakhit ciangin Bus pen hongki lumlet hi. Asung ah atuang Passengers khempeuh pen alang khatpan alangkhatlam ah hong lumlet, honglawnzak gawpin kiphukha, kithuapkha gawp hi. Bus sungah Passengers te ki thehzak gawp uhhi ci’n genbeh hi.

Apple Daily te genna ah hih Bus pen Minute 10 ziakai ahih manin, ahawlpa Bus Driver kiangah aki Complain ciangin hat hawlgawp in, tuahangin akibung hi ci’n Passenger khatin genkhia cihi.

Democratic Party panin Lawmaker Lam Cheuk-ting inzong hih dawlnih apha Double-decker Bus tepen kumpi thunei te’n hoihtak in etcian phatding hi. Tuahsiatna omthei zelzel a, adiakdiak in atungdawl Upper Level ah atuang Passenger te’n liamthuakthei mahmah uhhi ci’n genkhia hi.

Southern Chinese City te’n amauzat Public Transport System tepen leitungah Infrastructure ahoihpen hi ci’n limgen mahmah uh a, ahi zongin tuahsiatna Accident pen piangthei zelzel hi.

More: Hong Kong atanu thatlum in asemnen nupinu in zatui zang hiding kici

Abeisa 2003 kumsung inzong Hong Kong ah Double-decker Bus khatleh vanpuakna Truck mawtawpi khat kiphukha in, lei tungpan in tuisuang ah kiasuk hi. Tua Accident hangin mi 21 takin sihlawh a, Hong Kong gamsung ah ahuaisiapen tuahsiatna “Hong Kong’s worst road traffic accident” in ki ciamteh hi.

2008 kumsung inzong Bus tuahsiatna hangin Hong Kong ah mi 18 takin sihlawh uhhi. Sawltak #zomidaily