Naungek kha 4 bek aphapan gei ah zakang atep mi 4 kiman

Naungek kha 4 bek aphapan gei ah zakang atep mi 4 kiman

Malaysia, Kuala Lumpur khuapi sungah khamtheih guihtheih Drug azang mi 4 te’n agei ah naungek ihmu zong khualzo nawnlo in, inndei sungkhatah zakang namkhat ahi “methamphetamine” tepmaita uhhi. Agei ah a ihmu kha 4 bekbek aphapan naungek zong khualzo nawnlo in, amau lunggulhna, silesa duhna bekbek ngaihsun in Drug azang uh ahihi.

Hih thupiangpen tuni Saturday (Feb 10) zingsanglam in Kuala Lumpur, Dang Wangi vengsung aom Hotel Room sungkhat ah thupiang cih theStar pan kiza hi.

Drug azang mi 4 te’n Hotel inndei sungah zakang ateplaitak un National Anti-Drug Agency (AADK) Officers te’n tuaklian uhhi.

Tua Drug azang mi 4 te lakah kum 29 aphakhin numei khatpen naungek ii anu hisawnsawn hi.

Naungek kha 4 bekbek aphapan khat agei ah a ihmusa in sial in, agei ah zakang ateptep mi 4 te amuhkhiat uhciangin Officers te’nzong lamdangsa in, lungkiat huai samahmah uhhi.

Hotel Room khatsung ah mi 4 in zakang atep uh ahih manin, inndei sungteng zakhu tawh ki tuamcip in, agei ah a ihmu naungek inzong zakhu pen dikkha ngelngelding hi.

Hih zatui zangte akimat khitciangin tua Budget Hotel apualam ah Press Conference kibawlpah hi. AADK director-general Datuk Dr Abd Halim Mohd Hussin in agenkhiatna ah hih Hotel Room sung aom mi 5 tepen National Anti-Drug Agency (AADK) ii Treatment Center ah kipuakding cihi. Anu pen Rehabilitation akibawl laitak in naungek pen atuam in ki kemding cihi.

Hihbangin National Anti-Drug Agency te’n Raid abawlpen “Ops Perdana” cihtawh Operasi abawl uh hi a, AADK anti-drug Operation ci’n ni 2 sung abawl uh ahihi.

More: Myanmar leh Thailand gamgi kikal ah gamgicing galkapte’n kisinna bawlkhawm

Tuabangin AADK anti-drug Operation abawlna sungah akigawm in mi 112 tak Drug zanghi cih Positive ki mukhia hi. Tua Drug zanghi cih akimukhia te lakah mi 13 pen kum 18 nuaisiah, kumcingnailo ahihi. Sawltak #zomidaily