Home Report ~ Lian Tuang

Home Report ~ Lian Tuang

Sangsiate in sangnaupangte khantoh theihna ding deihna tawh kha khat khatvei cih bangin a hunhun in naupangte thanemna thahatna le a gamtatzia thute nu le pate kiangah thu puak den uh hi. Tua pen Home report I ci hi.

Siate leh nu le pate kikop in naupangte pil nading siam nading khantoh nading gel khop theih ding deihna ahi dingin ka lamen hi.

Tua Home report amuh ciangin nu le pate gamtatzia khat le khat kibanglo hi.

1 ) Atate hangin a kipak mahmah om hi.

2 ) Banghang hizah in hai lawmlawm na hiam ci in a tate a taigawp zong om hi.

3 ) Report at na siate thuman kei ci in siate amawhsak zong om hi.

4 ) Hih zah a na hai lawmlawm pen na siate gina lo lua hi ding hi a ci zong om hi.

5 ) Report hoih in hoih takei leh bangmah a pau se lo zong om hi.

6 ) Mailam ah kipuahphat mahmah kul in teh a ci zong om hi.

7 ) Siate tawh kimu in hoih tak I hanciam mahmah kul in teh a ci zong om hi, cih bangin nam tuamtuam in khat le khat kibang hetlo hi.

Report a tun ni a thupiang pen hih sang zong tamzaw lai ding hi.

Tedim Tonzang Cikha survey

Nungdeuh sungin Tedim Tonzang Cikha huamsung survey vai khat tawh kigamlum pianpian hi. Kilunglut tek cihna ahih manin hoih ka sa mahmah hi.

Tua survey sungah mipite nisim nuntakzia thukhenmangte thukhen zia, thuneite gamtatzia, hausa upate le mipi kizopzia, thukhunbawlte nasepzia cih bangin phungpi nam 4 siksan in dotna nam 40 val kihel hi.

Tua dotna te sungah nungdeuh a kilimgen thuno khat tawm en kik pak leng.

MP te in Hluttaw innpi sungah bangsem hiam cih a theilo pen mipi 81 %pha cih ahi hi.

Hih tungtawnin ngaihsutna muhna tuamtuam kigen ciat hi. Ahuampi in gen ni cileng MP te tawh kisai mipite thutheihna niam mahmah hi cih thu hi ziau hi. Hih hangin thuneite le MP teng bek Direct a mawhsak theih taktak ding pen ong hi khin thei samlo kha ding hi. Thutuamtuam latuamtuam ban ah miipite I kisapna zongom veve kha ding hi.

Mipite thutheihna tualniamna ahang nam khat ( kipawlna khat, party khat, mi pawlkhat ) bek hi loin nam tampi akigawmna hi zaw ding hi.

Tua ahih manin hih dotna dawnna Data te hangin khat le khat I kimawhsak sangin mailam ah koi cileng gamvai mipite thutheihna khangto thei ding hiam cih kikup diamdiam huai mahmah zaw ka sa hi.

Hih survey pen sang saite home report bang ahih lian loh hangin zang theileng mipi ading phattuamna nengno khat om teitei dingin ka lamen hi. Ahi zongin I thusim nop keileh zong eima thu hi lel a ahi ding mah ahi hi.

Hih survey laibu pen tam kibawl zo loin thuneite, kipawlna tuamtuam makaite, biakna makaite, MP te le hih dan vaite alunglut mi pawl khat bek in kingah zo pan hi.

(Hih survey pen British Council Myanma nasemte le Kumpilam, NGO, INGO (UNICEF, UNDP) te ading Research, survey tuamtuam abawl GDI te in zong survey kician khat in ong ciaptehsak uh hi.) Lian Tuang