Hello Tedim (4) ~ Hau Za Cin

Hello Tedim (4) ~ Hau Za Cin

Lungdam thu: Pu Pau Khan Khup, Singapore te innkuan in Zosuan Tuailai Khawmpi a sim Zomi khangno khempeuh nek dingin Sial khat hong pia ahih manin kam tawh a kigen zolo lungdamna kong tangko masa hi. Banghang in lungdam lua mahmah i hi hiam cih leh Pu Khup te innkuan in a neih val uh hilo, amau khawi zong hilo, a mipih Zomi khangnote khangto nuam in tuhun khantohna thu kigen dingte za nuam ngai nuam a khual gamla pipi pan hong pai ding uh cih a ngaihsut uh ciang itna tawh khoppi siim khempeuh ankuang umpih le ung ciin phal takin hong piakhia uh ahi hi.

Ama’n, “Kei pen kam tawh a gen siam zong hikeng, thu tawh a suut siam zong hikeng, la tawh a phuak siam zong hikei ing. Ahi zongin ka Zomi pihte ka itna bel midang asangin neuzaw hetlo hi cih ka lah theihna hih bek hi. Khoppi sim khempeuh in lungdam takin hong neksak ciat un,” ci hi. Lungdam ung Pu Khup. Topa in na Zomi pihte adingin na piakkhiatna tungtawn in a bei theilo thupha tampi tawh nang leh na innkuan sung thupha tawh hong phungvuh kikta hen.

Zomi khangnote in a tunga hong kipia Sial te a ngaihsut uh ciangin amau a it, amau a khual takpi om hi cih hong phawk ding uh hi. A phawk kei uh leh bel a kisam khat om hi hamtang ding hi. Banghang hiam cih leh thuhkik ding a lametna tawh a kipia hi hetlo, makaite hi in, mipi in hitaleh ngetpi in a kinget ciangin a kisuanlah man un a piak cih zong hilo a, Zogam leh Zomi itna tawh a piakkhiat ngiat uh ahi hi.

Tua banga itna kicing nasepna pen pulpit tung pana kam tawh a kigen sangin mite lungsim bun zaw mai dingin ka um hi. Zomi sungah pasal etteh tak khat a nei hi hang cih hong phawksak a, mipi ankuang lui, taangvak nuam cih limlim pen itna tangzai mahmah lungsim pan hong pai hi hamtang ding hi.

Tua bang lungsim siangtho leh lungsim tangzai tawh a kalsuante khua leh tui hampha kasa a, a innsung, a beh sung adingin namtui in etlawm ngaungau kasa hi.

Zolengthe naipi kim ah a kileh naunau Zolia Zotaangte in zong tua itna banzal in na ban dinga, itna sinthu a kigen uh ciangin sum leh pai tawh a kilei theilo lungsim tawng pana hong luangkhia itna bek in a gahkhiat itna takpi tawh hong ki it ding uh hi. Tua bang itna tampi Zolengthe naipi kim pan hong piangkhia dinga, tuate in Zogam sak leh khang hong kizel in i gam i lei ah itna siangtho hong khang pelmawh ding hi. (zop lai ding) Hau Za Cin