Egypt Christian biakinn sungah thautawi khatin mi 11 kaplum, mi 5 liam

Egypt Christian biakinn sungah thautawi khatin mi 11 kaplum, mi 5 liam

Egypt gamsung aom Coptic Orthodox Church sungah zanni Friday ni in thautawi khatin mi 11 kaplum cih Reuters pan kiza hi. Tua thautawh mi akaplumpa pen liamin kimanthei hi ci’n Egyptian Interior Ministry leh Church Officials te’n pulakkhia uhhi.

Hihpa ii gamtatna pen IS migilo te’n ko ii sawlkhiat hi, ka khutzat uhhi ci’n Statement khahkhia uh a, ahi zongin bangmah genthamding paulap “Evidence” kician omlo cihi.

Egypt gamsung aom Christian biakinn te ah Coptic Christmas Celebration anaizawh akipan Police te’n Security akhauhsak mahmah laitak uh ahihi. Christian te kikhopna, biakpiakna munte ii apualam ah Police Officers te Duty kidingsak in, biakinn alianzawdeuh te ah Metal Detector cihtezong thauhin Security limtak avaihawm uh ahihi.

Abeisa tawlkhatsung akipan Egypt gamsung aom Christian Minority te kibawlsia, Attack kibawlthei zelzel a, IS migilo te ko ii gamtatna hi ci’n mawhpuak pulakkhia pahpah uhhi. Abeisa April khasung inzong Palm Sunday ni in Bomb 2 vei puakkhamsak uh a, Cairo City sung aom alianpen Coptic Cathedral ahzong nungkum December khasung in Bomb puakkhamsak in mi 28 takin sihlawh uhhi.

Tutung buaina vaitawh kisai in Coptic Church te genkhiatna ah thautawi migilopa in ageinai aom Christian te neihsa vanzuakna khat thautawh kapmasa in, tualai ah mi 2 in sihlawh cihi. Tuakhit ciangin Cairo City huamsung aom Mar Mina Church kici biakinn sungah paisuak in tualai ah thautawh mi aphialkap leuleu cimawk hi.

Egypt Interior Ministry te genkhiatna ah tuapa pen biakinn asung lutlo in, amai kongkhak lutna Entrance panin thautawh kapphialgawp cihi. Tuakhit ciangin aphuakkhamthei “Explosive Device” khat lotpheisawm cihi.

Tua Coptic Church biakinn munah akigawm in mi 9 kaplumkha a, tualak ah Police Officer khatzong ki kaplumkha cihi. Tuaciang in Security Forces te’n amanlang in tua thautawipa mankhiapah uh a, thautawipa zong liam cih kiza hi.

Tua thautawipa pen thusitna akineih ciangin abeisakum akipan thautawh tuabangin muntuamtuam ah buaisak, Attack bawlkawikawi ngei cihi.

Asi mi 11 banah aliamzong akigawm in mi 5 bang pha uhhi. Asi te ii aluanghawm pen Friday nitaklam in Helwan khuasung aom Virgin Mary Church biakinn sungah sihvui hunbawlna nei uhhi.

Cairo’s State Prosecutor inzong hih buaina vaitawh kisai in hoihtak kancianding, Investigation bawlding kipan khinta hi ci’n genkhia hi.

More: USA, Texas State aom biakinn sungah kikhop laitak thautawh kikap in mi 27 si in tampi liam

Hih thau kikap laitak in amukha te ii genna ah zingsang 10:30am hunpawl in thaukikap akipan hi a, Minute 15 sungbang sawt cihi. Thau kikapna ah thautawi migilo pen mikhat sangin tamzawding ci uhhi. Biakinn sungah thautawipa alutsawm ciangin Police Officer khatin Gate kongkhak khakcipsawm a, tualaitak in thautawipa in tua Police Officer pa kaplum hi ci’n ageinai pan amukha khatin genkhia hi. Sawltak #zomidaily