Hello Tedim (1) ~ Hau Za Cin

Hello Tedim (1) ~ Hau Za Cin

Leitung kiuli a om Zomi khempeuhte aw, a sawtlo in Tedim khuapi ah Zomi khangnote kikhoppi nasia takin kibawl ding ahih manin nang zong a pai dingin na kithawi kholta in. Kithawi khol bek hilo in na puanlom zial inla, Tedim khuapi lam zuan dingin na thungpi kuah in na dingkhia ta in. Banghang hiam cih leh tuni in kipan lecin April 23-26, 2015 cianga kibawl ding ZOSUAN TUAILAI KHAWMPI a 2veina na lap ciamciam ding hi. Na kithawi pah kei leh na ziakai kha dinga, na kisik hangin leitang bek na sikkha ding hi. Tua ahih manin Zomi khangno aw, tho in. Tho in.

Leitung gam tuamtuama a om Zomi khempeuhte aw, hong tung ding Zosuan Tuailai Khawmpi ah kihel kim ciat dingin nang leh kei Tedim Khuapi in hong sam hi. Na pumpi mahmah hong kihel dingin hong ngak ngeungau hi. Na lungsim khempeuh tawh hong kihel dingin hong zawn hi. Na ngaihsutna hoih khempeuh tawh Zomi leh Zogam puah ding zia kikum dingin hong lamen hi. Zomi momno, Zomi khangnote maban ding, a mi, a gam, a khua a tui a khantohna ding ngaihsun khawm, kikum khawm, thukimna lusu khawm dingin nguai ngeungau in hong ngak hi.

Zogam leh Zomi a paalna dingin na siamna, na pilna, na theihna, na hanciamna, na kuhkalna, na kipiakzawhna, na cihtakna khempeuh cil hetlo a na zat ziahziah ding hun hong ngaklah mahmah hi. Nawitep naungek in a nu lokuan a ciah ding kal a ngaklah bangin nang hong kingaklah a, nang hong kilunggulh in na awmsunga nuntakna tui ngo sitset ngaklah in dangkeu in na khuadakdakta hi. Tua sapna, tua dangkeuna awnghu dingin diangkhia mah lo ding na hiam? Bangtan ngak sawm lai na hiam?

Ka ngaihsun a, a hun hong tungta bangin ka tuat hi. Khawmpi a masa ni zingsang na hi a, Zogam mual leh guam a taanvak sitset dinga zingsang nisuak in Tedim khuapi hong kap tang singsengin akgil a akluite lungdam in lungdam la sa khawm liailiai uh a, akpi in a note tawh huankhang dai nawl ah kizui diamdiamin a pi thaikhiat ganhing leh lungnote ne in awng ciakciak uh hi. Huansak inn nupite anhuan kawma tuikeu kia ging valval in hong phawng himah leh aklui khuang ti-ti-ik-ik te mah in zaila sak zom toto uh a, ka maiphiat khin inkatau pan ka khuadak leh zing nisuak in Leilum, Lawibual, Sakollam leh Myoma veng khempeuh zong na kap taang singsengta hi. Ka mai nul kawmkawm in innsung ka lut leh Zogam huihkhi siangin hong zui zel a, vot hiauhiau in innkim a singteh hing sitset in zong lungdam in na lampih diamdiam uh hi.

Zing niangtui dawn kawma ka tutna Cingtutphah tung pan ka khuadak leh huandai kiu a Baibek nupa nisa lum awi zong a mei del vatvat in a tawsan hong dawk zauhzauh zel a, Zogam a om takpi hita in maw cih ka melh nawn kei hi. Inn kim ah anphui/sulbung kung leh singmehthuk, sapthei/mangthei kung zam dimdiam leh golkhadi/bisikut gui zam khempeuh in Zogam hoihna a kimsak hi a, mawtaw lam gei a kizui diamdiam Sial honte lah Zogam hihna a bukimsak nuntak migi ganhingte ahi hi. Zophualva leng diaidiai in mual leh guam kantan in khua khung pan khuataw lam zuan in sak leh khang ah kileh kawikawi mah le uh – suakta taka nuntak i cih hih bang hi a, utna lamlam ah lengin, vak in ann zong kawikawi, hiangkawm kawikawi thei cih mit muh in hong lak ahi hi. Lupna gei a Balpi leh Balke kisungte, kawlkai leh mai, maipuang kisial zeizaite in Zogam nek leh dawn ah a cidam penpente a nei gam i hihna hong lak toto lai hi.

Ka takpi lah hong bang dektak a! Zosuan Tuailai Khawmpi hong tung ding a ngaklah lua a mitkha ah bawl khol himawk veng e…

Hih hun ah nong kihel leh nang zong Zomi a it, a ngai, a zun, a puah, a khual tampi tawh kimu in na khantawna na mangngilh ngei nawnloh ding, na gengen ding, cik mah hun a na kisik hetloh ding thu tampi na ciahpih ding hi. Tua ahih manin na nuntak manpha semsem ding na deih leh nang zong na pumpi mahmah kihel pelmawh in. A kin, a it, a khual, sum ngam lianga kua sawlloh a a sem vanvante tawh:

• 1. Gam leh Nam kepna leh khantohna ding thu
• 2. Pilna Siamna zonzia ding
• 3. Nek leh dawn ah a kiningcing i neih den na ding
• 4. Cidamna lam thu tuamtuam
• 5. ….leh a tuamtuam…

tampi kikum khawm, kigenkhawm ding hi hang. Tua banga i kikup ciangin a theizaw leh a siam mahmahte mah in hong makaih dinga, telloh a om leh dotna hun om dinga, kuppihnop a om leh zong suakta taka kuppih theihna hun om ding hi. Zomite i hamphatna mahmah khat om a, tua pen hih bang hun thupi i neih ciangin hong makaih ding leitungbup in zong a hawmthawh hetloh leh leitungbup kikhoppite ah zong a kizang mipil, misiam honpi khat i nei hi. Amaute mah in hong makaih dinga, amaute mah in hong lamlak ding uh hi. A min uh genkhawl pak leng:

Rev. Dr. JM Ngul Khan Pau: India gama Tuiphum kipawlna lianpen ah kum 10 sung Khangnote Pasian thu tawh makaihna leh pattahna a neih khit ciangin kum 10 sung dang mah Laiatpi, makaipi a sep khit ciangin tu in leitungbup ah Christian Makaite Pattahna kipawlna khat ah Asia gambup adingin makaipi ahih banah tua kipawlna thudotpi khat zong a sem ahi hi. Leitungbup Christian te khawmpi lian khat ahi Lausanne Congress on World Evangelization ah zong thugenpi khat hingei hi. Zomi sung bek hilo, gam khat leh nih bek hilo in leitungbup ah a kizang Siapa ahi hi.

Pu Thang Za Muan Hauzel: India gam a sum zat ding khempeuh a bawl pawl Reserve Bank of India ah Senior Manager a sem Pu Muan pen mi citak leh hanciam, thuman a gamta ngiat, amah a theikha peuhmah in a etteh leh a zahtak uh Zomi ulian ahi hi. Mi lapsang ding leh mite pahtawi ding a hanciam khat hi a, ulian hinapi a kiniamkhiat leh Pasian a it mahmah khat ahi hi.

GZA Makaipite leh adangte thu a tomin mailam ah zomto zel lai ni.

Sum Bei Ding Zah: Thein 71 bang a bei dinga kituat hi. Zomi Innkuan Singapore in gam leh minam itna hang tawh a hanciam bek mah hi a, sum leh pai neihsa cih bang a om kilkello ahi hi. Eima ip sung ciat sawk in pek khat pek nih cih bang, ngap zahzah kidongin Zogam tuunnu pauh dingin a hanciam uh ahi hi. Kuamah a nei ki om tuanlo in nektawm zong vive, inn lam sum a khak vive mah kihi a, a val cih bang a kikhol zo hetlo ahih hangin kumlui pek panin phal zahzah, neih bangbang kipia khawm in a kihanciam hi a, a kisam zah ding a kingah dek nailo ahi hi. A huampi a sum bei ding ka tuatna uh (budget) hih bang hi.

Mipi lamet zah: 1000 (tul khat).

• 1. Annek man
• 2. Stage, Hall
• 3. Banner, etc
• 4. Video
• 5. Sound System
• 6. Niangtui
• 7. Laihawmna
• 8. A tuamtuam….

Mipi taangvak nuam Sialpi khat, Sialtal khat cih bang a pia nuam i om leh zong kingah ding hi. Sun niangtui khatvei dawn man ding kong si nuam a ci thei i om leh zong kingah hi. Ahih kei leh Banner man ding hong si ning, Stage bawl man hong si ning, Sound System man ding hong si ning…. cih bangin a kiphal mi i om leh lungdam takin kisang ding hi.

Tua banga kihel nuamte in kei kiangah ahi zongin Pa Khup Khawm Mung (Khawmlay, email: [email protected]) ah a tuamin email hong khak in hong zasak ta un cih kong zawn nuam hi. Pawl hi in, mimal hitaleh kihel thei tek hi. I gam i minam in nang leh kei hong ngak hi. Hong tung ding Zosuan Tuailai Khawmpi ah kimu ni maw! (zop lai ding) Hau Za Cin