Hauhna nacih banghiam?

Hauhna nacih banghiam?

Nang a’ding aa na deih hauhna (hauhna na cihdan lian) mah hih laibu in hong gen ding hi. Hauhna cihpen mipawlkhat a’dingin sumtampi neihna hi thei hi. Midang khat a’dingin kumpi nasem milian, sumbawlsiam mi, cidamna ahizongin a tuamtuam hi thei hi. Bangbang na ci zong in a hoih vive a hihi. Tua na deih hauhna banglian na sungah nungta sak in. Hih laibu in tua na deihte na ngah theih nadingin hong hilh toto ding hi.

Hauhna na cihpen makai hoih khat, gamthu ah makai, company ah makai, sumbawl na tuamtuam te ah makai zongh hi thei hi. Hihbang ngimna te ahizongin hih laibu in a taktak na suahsak nading hong panpih thei ding hi. Na theihding khat ah lungngulh cih ciangbek tawh na lawhcing zo kei ding hi. Deih cih ciangbek tawh na kalsuan leh koi mah hong tunpih lo ding hi.

Hauhna kei ii muhdan tawm ki kum khawm ni. Hauhna kei muh dan

Khatvei ka lawmpa Edel te kiangah ka va hawh hi. Ka lawmpa inn pen a neumahmah hangin vanzat hoihte vive tawh kidim sak hi. A hoihpen vanzat te vive a hihi. Sum leiba neilo in a innkuan nuntak nading khom kicing mahmah hi. Na semkawl in pension a lak ciangin zongh a nuntak nading uh lungkham ding omlo hi. A inn sunguh aa a zatnate man pen a tawmpen $12,000 nuai hilo ding hi.

Tuabangin ka kiho laitak un a zi in ‘Ih khuasungah a haupen dingin ka kingaihsun uh hi. Sum vaiah lung himawhna omlo bek hilo in ka innkuansung mahmah uh zongh ki it in nuam kasa mahmah uh hi’ ci in kipak tak in hong gen hi. Hih inn kuante bang na hihnai kei leh zongh lunghimawh kei in. Hih laibu na simna hangin na nuntakna hong ki lamdanglai ding hi.

Hauhna na cih sungpan na lamet penpen bang a hihiam? Bank ah sumtampi neih ding, inn hoih te sungah teng zo ding, duh bangbang ne ding, utna gam peuhpeuh ah pai zo ding, mi dangte in thupi hongsa in hong eng ding cihte pen hauhna na cihte sungah kihel kha ding hi.

Hihte khempeuh pen sumtawh a kilei thei hiaa hiteng bek tawh na lung a kim leh pilna tawh hauhna thu a thei nai lo na hihi. Hauhna ii deihna leh hauhna a khiatna taktak pen lungdamna a hihi. Lungdam nadingin a ki hau nuam a hihi. Lungdamna in hauhna khempeuh, zawhna khempeuh ahihi. Gualzawhna leh hauhna i deihna pen ih lungsimkha a lungkim nadingin a kisem a hihi. Tua ih deih gualzawhna hangin hauhna a ngah ding i hihi.

Ka gennop na a kitel zawkna dingin tawm hong genbeh nuam lai ingh. New England ah mihau mahmah khat om hi. Sumzatna ah a demzo ding omlo ding hi. Deih khempeuh a ciin na lo (farm) lian mahmah zongh nei hi. Tua mihau pa in a lo ah kumsim in naupangte sam in anlim pen, singgah lim pen te tawh vak in puanhoih pen te pia in a ut bangbangin kimawl sak in lungdamsak hi.

Ni tak ciangin tua naupangte ngaihsun in, naupangte lungdamnate ngaihsun in a lung nuam mahmah hi. Tuabang gamtatna in a lungdam sak aa tuabang hunlaitakpen a hauhpen hun in ciamteh hi. Lungdamna le lungnopna hong pialo sumlepai leh neihlelam te hauhna kici theilo hi.

Na bekbek sem in kimawl hun, suahtak hun a omkei leh a mawkna ahihmahbangin sum tawh a kileithei nate bekbek nei in lungdamna i ngahkei leh a mawkna mah a hihi. Na sem vetlo in nisim in om khongden lecin zonglah na ciimtak pah veve ding hi. Tawlgakhna pen nasepna tawh kihel sak lecin tawlngakh nuam nasa ding hi. Tua mahbangin nasep hun sungah tawlngakh hun koih lecin nasep nuam nasa ding hi. Lungnopna ding zongin vakkhiat den na in lungnopna hong pia thei taktak tuanlo hi. Ki mawlhun omlo nasep a lungngulh huailoh mahtawh kibanglel hi. Tua mahbangin na nasep laitak in laisim hunding nei in. Midangte tawh ki ho hithiat hun ding ngaihsun in. Tuabanglo tawh lungdamna na muhding haksa hi. Tuabangin lungdam nading na zon leh sumtawh a kileithei lo hauhna a ngah na hihi.

Na hauhna tawh bangsem ding na hi hiam?

Mi khempeuh hong dawnna kibang kim theilo hi. Set lam khutsiamna a neikhat ka dotleh ‘ka nasep khawl in, ka inn zuakin, bangmah sem nawnlo in ka ut na gamtuamtuam ah ka vak kawikawi ding hi’ ci in hong dawng hi. A taktak in hi mipa hau in a ut bang a sem zongin lungdamna taktak mulo dingin ka um hi. Hunkhat lai in company boss pa khat zongh tuabangmah in gamta hi. Hun tawmvei khit ciangin khualzin ciimtak lua mahmah in a khua mah ah hong ciah kik lel hi. Inn thak khat a lei kik khitciangin nasep khat zong kik veve hi.

Office Manager khat in hauleng ‘hih company lei in kei a’ ka suaksak ding hi’ hong ci leuleu hi. A taktak in tua mipa in tua company a lei zongin manager bek mah a sem ding hilel hi. Ahizongin company neipa hileh boss dan a semthei pan dingin ki ngaihsun hi. Na sepna sungah ut banglian in boss a sem thei kua mah omlo hi. Company nei te in zongh boss mah na neilai aa tua te pen vanlei te (customers) a hihi. Company van a zangh mite a lungkim sak ding kisam lai veve hi. Company nei pa hihna sangin company sungah a lian pen (manager) hihpen a nopzawkna tampi a omlam a theilo mitampi om hi.

Hau le cin bang sem ding na hiam ci in nupi khat ka dong leuleu hi. Hongdawnna hoih kasa hi. ‘A deih bangbang uh a neilo lawm leh meltheih tampi ka nei hi. Tua tengkhempeuh a deih bangbang huhin ka lungdam sak nuam hi. Puan sai ah pai pih in puan hoihnono te ka leipih nuam hi.

A leiba teng lohsak in na sephoih a septheih nadingin ka panpih nuam hi’ ci in hong dawng hi. Hong dawnna tengpen a ma a’ding himasa lo in midangte a’ding vive a hihna ka thei hi. A maitang mahmah zongh hau leh a dik dingin kilawm kasa mahmah hi. A taktak in cileng tua nupi nu in lungdamna piakhia leng lungdamna mah ki ngahkik cih a thei mi a hihi.

Khangno khat kiangah tua dotna mah ki dong leuleu hi. ‘A masa pen in kapa in a deih mahmah a leizawhloh mawtaw ka leisak masa nuam hi. Tua ciangin anhuanbuk sung aa ding leh inn sung vanzat hoih tuamtuam ka lei ding hi. Tua hileh ka nu nasep tawllo tuam ding hi. Kei ka hihleh electronic tawh kisai college lianpi khat ah sang ka kah nuam lai hi’ ci in dawngkik hi. Hauhna a pia thei hileng a kipia nuampah hi lel lo hiam? Hauhna thu a theilo te in a hihleh zingsang in ka duh bangbang ne den in sun in ka utut na ah pai pai nuam ingh. Leiba neilo in ka lawmteng tawh suntawh zantawh ka ki khawlkhawm nuam hi ci uh hi.

Banghang in hau nuam?

Hih laibu a pat pan a tawpna dong na sim khitma in hauhna a ngahthei mi na hihlam na ki thei ding hi. Na utbanglian in na piangthei hi. Sumlepai, inn, vanzat tuamtuam a hizongin pumpi leh kha a’dingin a kibangin hauhna sungah na khangto thei ding hi. Vangneihna, ma kaih siamna, lawm hauhna cihte zongh na ngah ding hi. Tu in tua nadeihbanglian in hau lecin nalung hong damsak taktak dinghiam cih hoihtak in ngaihsun in.

Hauhna pen lungsim ngaihsutna dandan aa piang hi cih na phawk kha hiam? Napoleon Hill in a laibu ‘Think and Grow Rich’ sungah ‘na lungsim in a ngaihsutzawh nakleh na lungsim in na ngah nadingin semthei hi’ ci hi. Na lungsimmit tawh sumhau pa leh deih bangbang a nei pa in nanglenang ki mu in. Tuabangin na lungsim mittawh kimu in na lungsim sungah na up taktak leh, sanggam! A lampi tungah a kalsuanta na hihi.

Na lungsim mittawh hoihtak in na kimuhtheih aa tuabangin na upleh W. Clement Stone bangmah in $100 pan in $100,000,000 dongin a khangto thei na hihi. W. Clement Stone zongh bangmah neilopan hongkipan hiaa a lawhcing mahmah mi hong suak hi. Napoleon Hill tawh Think and Grow Rich laibu hong at khawm uh hi. Tua laibu sungah thusim khat at aa tua pen ‘na lungsim in mu in a up zahzah ciang na ngahthei hi’ cih a hihi.

Na ihmut khawmin hauhna sungah

Ih mailam thu ding khempeuh- i hau aa i zawngzongin a piangbangbang i sungtawng pan in a kibawl hiaa a diakdiak in i ihmutlaitak in sunglam nasepna thahat penpen hi.

Laibu hoihtampi ki nei khin aa a hizongin tuate in mihinglungsim sungah a kician lim (picture) hongpia zo taktak lo thei hi. Nate tungah Lungsim om cih thei in. A gualzo dingin na ki ngaihsut leh na gualzo pah ding hi. Hihpen thuman a hihi. A hizongin hihthu na tel mahmah ding kisam lai hi.

Nupi khat hongpai in hih lungsim thu hong dongh hi. Gualzawhna i ngahma in a gualzo bangin ki ngaihsun ding cih thu hongdongh hi. A gualzo bangaa ki ngaihsut ding pen haksa mahmah hi.

Ih ngaihsutna i kepcing dingleh a taktak aa hongpian dong lungsim kepcing dingpen a haksa mahmah thu hi ci in hong gen hi. Ih ngeina upna sungah a thak upna khat koihding a haksa mah a hihi. Mitampi in hibang nasep pen keitawh kituak kei ci in gualzawhna taktak a ngahma in khawlkik zel uh hi.

A gualzo mi in na ki ngaihsut phot limlim nakleh na sunglam pan in na hauhna ding, na gualzawhna ding hong ki hilh ding hi. Thudang bangmah ngaihsun nawnkei in. Tua na piannop bang lungsim ngaihsutna kemcing in. A taktak in na piansaknop thu ngaihsun in. Ihmut kawmsa aa hauding cihpen ciamnuihna tawh kibang hi. A hizongin sunglam nasepna pen ihmut hunlaitak in thupi mahmah hi. Tua pen ngeinakip khat a hihi.

I gensa mahbangin mihingte in ngaihsut theihna nam (2) a kinei ahihi. Pualam pilna in ih ngaihsutna, lungngelna te leh i muh nate thu a ngaihsut laitak in ih sunglam pilna in ih pumpi sungah a kisam tuamtuam: huihdikna, sisan te leh sivui sazangte a pilna tawh na uk hi.Tua ahihmanin sunglampilna in a pualam aa i tuahkhak te tawh nasem khawmlo cih honglak hi. Pualam pilna in na khat peuhpeuh a hanciam mahmah laitakin subconcious mind (sunglam pilna) a dang munkhatah thudangkhat tawh na buai thei hi.

Na khatpeuhpeuh nasep dingciangin ‘sem kei leng hoihzaw ding hi ve aw’ ci in na ngaihsut hun om thei hi. Pai nading khat na neihciangin zongh khat veivei ‘pai naikei zaw leng’ ci in na ngaihsut hun om thei hi. Tuabang ngaisutna te koipan hongpai cih na thei hiam? Huih lak, nguahlak pan in hongpai in na lungsim sungah hong tung hilo hi.

Na sungtawng pan in hong phulkhia a hihi. A hoihlo lam, a thadah huailam bekbek hong om leh na sunglammi tuabang a deih huailo thu te tawh anvak na hih man a hihi. A hoihlam, a deih huailam in nasunglam mi an vak lecin a hoih ngaihsutna bekbek hong piangsak ding hi.

Lungdam maitai lo in zingtho mi leh thanemna tawh zingsang a kipan mi pen a khial mahmah mi a hihi. Tuabangte khempeuh hong kipat khiatna pen mihingte ii sungtawng pan a hihi. Nitak na ihmut ma aa na ngaihsut bangin zing a tho na hihi.

Nitak na lup ciangin ‘tuni pen a kaamsia hi hing, zingciang a ban zom ding cileng ol kei si in teh maw’ cihbang ngaihsutna te tawh na ihmu kha thei hi. Tua ngaihsutna te in zing na thawh ciangin hong thanem sak, hong thadah sak hi. Ahizongin ‘zingciang tuni aa kasep khempeuh zo siangding, zing ciangpen tuni sang nuamzaw ding hi, zingthobaih in nalianpi ka semding hi’ cih ngaihsutna te tawh na ihmut leh zingsang ciangin lawpna leh tawldamna tawh lupna tungpan na thokhia thei ding hi. Na ihmut laitak in nalianpi a sem khat om cih na thei hiam?

Ihmut a nop theih nading

Ihmut kawmsa aa sumbawlna thu i ki kuplaitakin lungnuamtak leh tawldamtak aa i ihmut theih nading thu i genloh phamawh hi. Mi pawlkhat te a lupkhit phet in ihmusuk pah hi. Ahizongin a sawtlo in khuaphawk kik pah uhaa ihmu kik pah thei nawnlo uh hi. Nai khat nai nih sungbang ihmu thei nawnlo a hihmanin ihmut ciimtheilo uh hi.

Mihingte sunglampilna in ihmut laitak (pualam pilna a tawlgak laitak) in na sem hi i cihmahbangin tua sunglampilna in na hong septheih nadingin i ihmut hithiat theihding kisam hi. Zan tawntung nuamtak in ihmut theihding kisam hi. Zan aa nuamtak i ihmut theihna ding ki kum masa ding hi hang.

Ihmut theihlohna pen ihmut hun a hoihlohman zongh hi thei hi. Lupna tungah ihmut theihlohna pen a tamzaw pumpi sung nate hang hiloin lungsim sung ngaihsutnate hang hizaw thei hi. Ahizongin lupna tungah na ihmut theih mahmah keileh siavuante kiangah kilak masa in. Na pumtung nate hangin a ihmu theilo na hihleh siavuante in hong bawl thei ding uh hi. Tuabang aa nuamtak in ihmut theihna manpha mahmah hi.

Lungsim leh ihmut theihna a kizopna thu tampi i gennawn kei ding hi. Ihmu a cih bang hiaa ihmutna tawh tawldamna koibangin kingah cihte theih huai mahmah hi. A masa in ihmut theihlohna te tawm ki kum masa ding hi hang.

Lunghihmawhna. Ihmutnuam i ngahtheih nadingin hong khaktan ih gal masa penpen in lunghihmawhna a hihi. Sumlepai vai in i lunghimawh khathei hi. Ih cidamna, inn kuansung vai, i nasepna vai tuamtuam te hangin ki lunghimawh thei hi.

Gal le sa thu te hangin zongh ki lunghimawh thei hi. Mi khat peuhpeuh tawh na kiho, kizopna te hangin zan ciangin na lunghimawh thei hi. Tuabang lunghimawhna tuamtuam te hangin ihmutnuam ki ngahthei nawnlo hi. Lunghihmawhna khat i neihkhit nakleh a dang thu tuamtuam, thu neunono te hangin lunghihmawhna ki ngah baih mahmah hi.

Lunghihmawhna in bangmah phattuamna hong piakloh lam theitel in. Hong ihmusak lo, hong lungkhamsak in na thuakzawhna zongh hong guk sak hi. Lunghihmawhna a tamzawpen ‘zuau’ a hihi. Ahizongin tua na lunghihmawhna te a taktak hongsuak kik thei lai hi. A beisa hunah na lunghihmawhna tuamtuam te ngaihsun kik inla na lunghihmawhna bangin hong piang takpi bangzah om hiam cih sim kik in.

Lunghihmawh ding hilo hi. Tua ih haksatna te pen i mailam khantohna dingin kahleihoihte hi zaw hi. Ih haksatna te i phisian theih nading hizaw hi. Tunitak mahmah (zan na lupdingsim) in ngaihsut hoih tawh ihmut sawm in. ‘Tuzan ka ihmut laitak in ka sunglam pilna tawh ka haksatna khempeuh ii a hang ka thei dingaa zingsang ka thawhciangin ka sep ka bawl ding khempeuh a theisa in ka thoto ding hi. Lungkham nading bangmah omnawnlo aa ka haksatna teng tuzan in a zo ding ka hihi’ ci in lum in.

Na lunghihmawh ciangin na lungsim sungah na deihloh thuteng a koih na hihi. Na lungsim mittawh na deihte mulo in na deihloh teng na muhpen lunghihmawhna a hihi. Tua ahihmanin zan na ihmut ding ciangin na utdan, na nisim nuntakna sungah na piannop dante hoihtak in en in. Na hihna bangin ki en lo in na deihte en in. Na ihmut madongin na sunglam ah na deihdan kidimsak lecin zan sungtawntung na sunglammi in tua tawh kituak in na hongsem ding hi.

Nasep tawh buailuat na: Sun thapai nasep teng na lupna tung tunpih kei in. Mi pawlkhat in a sepsa teng uh ngaihsunsun uh aa mailamah a hoihzaw a sep ding ngaihsun ngeilo uh hi. Bangsem leng hoihding cih ngaihsun lo in ‘tua bangin ka sep khakloh’ ci in ngaihsunsun zaw uh hi. A beisa hun aa tengtawh a ihmut theihloh khitciangin mailam ah a sepnop loh teng ngaihsun beh lai uh hi. Tua bangteng in ihmut theihlohna piangsak hi.

Tuabang dan na tuahkhak leh nikhat sungaa nasep teng hun (minute) tawmno sung ngaihsun kik pak in. Na sepna sungah nalung hong nuamlo sak khat na theihleh zingciang a hihkeileh mailam ah bangcih ding cih ngaihsun in. Tua thu na sunglam dong hong tung ding aa thu hoih tampi hong hilh ding hi. Nuamtak in na ihmut theihna in zingsang ciangin thadim sa in hongtho kik sak dingaa a nuam mahmah ni khat a zangthei dingin lawpna hongpia ding hi.

Hazatna: Hih hazatna pen i theihloh kal aa hong susia mahmah hoihlohna khat a hihi. Hong ihmu theilo sak bek hiloin ih ma hong khak hi. Tuabang lungsim hoihlo tawh i ihmutna pen kaamsiatna a hihi. Lupna tungah ki heisuk ki heito in midang khat in a lungdamna leh a nopna a guk sak bangin ki ngaihsun uh hi. Mi dangte hamphatna te i zakciangin ki lunghimawh thei hi. Midangte in mawtaw hong neihciang, inn thak hong neihciang, na sephoih hong ngahciang na ihmut theih kei leh tua pen hazatna a hihi.

Hih hazatna lungsim hong piankhiatna pen ei ma angsung ding bek khual tentanna leh ei leh ei ki muangamlohna hang a hihi. Ihmut nuamtak in na ihmut theih ciangin mi tawh kidemna lungsim hong kiam ding hi. Nang le nang na kimuang dingaa mi dangte zongh na muanggam ding hi.

Mi dangte na muangam na tungtawn in nang zongh mihoih na suak zaw ding hi. Haza cihpen tua na hazat mi bangin a ngahzolo dingin ki um na hihman a hihi. (Kumpi te in khutdawh gente ii summuhna haza ngeilo ding uh hi.) Hihlaibu in tua midangte neihsangin a hoihzaw, a tamzaw na neihtheih nading lampi hong lak ding hi.

Mawhkisakna: Mawh kisakna cihpen mikhat in gamthukham ahizongin a hoihlo nakhat a sepmanin mawhkisa cih zongh hipah lo hi. I hihna khatpeuhpeuh ah lungsim nuammawh in ki om thei hi. Lungsim kisuanna ki nei thei kha mawkmawk hi. A beisa, a piangkhinsa thute in hong lungnuamlosak hi. A beisa hun aa na sepkhak khempeuh te a’ding nangmah le nangmah na mawhna kimai sak in.

Na sepkhialh, na paukhialhnate kimaisak in. Mailam ah tuabang hoihlohna te na sepkhak nawnloh nadingin kidawm in. Nitak na lupciangin lungsim suakta tak in lum in. Ki maisak inla lungnuam in. Na mailam ding bek lungngai zaw in.

Thadahna: Thadahna hangin ihmut theihlohna namnih hong piangthei hi. A thadah manin a suplawhsa hunhoih te lungngai kikkik hi. Mailam ah hongpai laiding nasep tuamtuam te a thadah manin a mulo bangin om hi. Tua te hangin ihmut ding a kilawmzah val in hong ihmu leuleu hi. Ihmut loh ding hun in nuamtak in ihmu thei aa ihmut hun ding ciangin ihmulo in om thei hi. Nasep ding lungngulh zolo ahihmanin tuabangin a om a hihi.

Pumpi tungnate thadah cihbang om ngeilo hi. Thadahna khempeuh lungsim thadahna a hihi. Na khat peuhpeuh i sepnoplohna pen i lunglutloh man zongh a hihi. Cimtakhuai i sa mahmah hi. Tua ahihmanin na sepnop, na lunglut mahmah khat theihsawm photphot in. A beisa hunte sangin a hoihzaw in sepding lungngai in. A thadahthei mikhat na hihleh nanglenang kamciam kipia in. Mailam ah na nakpi in kasem ding aa kasep peuhpeuh ahoihpen leh a deihhuaipen dingin lunglut takin ka sem ding hi ci in.

Muhdahna: Ihmutna leh ihmut theihlohna thu i genlaitak in a thupi mahmah thukhat om hi. Muhdahna leh lungkimlohna a nei mite pen lungsim siangtho in mitawh a kilemthei mite zahin ihmut nuam theingeilo uh hi. Muhdahna tawh lupna tung a zuante a ihmu thei uhzongin tawldam hithiat thei tuanlo uh hi.

Muhdahna cihpen pumpi sungleh lungsim sungah gu tawh kibang hi. Muhdahna ii hongpiak siatnate thei lecin kuamah na mudah ngam nawnkei ding hi. Muhdahna in midangte tungah siatna tungsak lo hi. Mi a muhdah mi in a mah tungah siatna a bawl hi lel hi. Tua a hihleh muhdahna in zan in khua hong phawksak hiam? Mi khat na muhdah ciangin tua in hong ihmusak theilo mah a hihi. Tuabang muhdahna ding thu hong om ciangin lasa in ki lungsim nuamsak phot aa tua khitciangin lupna tung zot pan ding a hihi. Tua in nuamtak hong ihmusak thei bekhilo in zingsang ciangin i muhdah mi tungah i hehna ding tampi kiamsak hi.

Mailamthuding tampi gelkholhna: Hih thu in zongh ihmut theilohna hong piangsak thei hi. Mailamthu ding a lung gel kholkhol mite in ihmut hun ding teng thungaihsuthun dingin zangthei uh hi. A hoihmahmah tawh a kibanhangin hunsawt ciangin pumpi in zolo a hihmanin a ngelsa bangin sempah thei tuanlo uh hi.

Ih mailamthu ding i ngel laitak in banghangin ih sunglam pilna zanglo in koih mawkmawk ding i hi hiam? Hibang ngaihsutna tawh nitak tawlga in. ‘Ka ihmutlaitak in ka sunglam pan in a beisa hun ah ka tuahkhaksa pilna te hong hilh ding hi. Tua thutampi te tawh ka mailam ding hoihtak in ka ngelkhol thei ding hi. Ka muhlai ding a lianzaw gualzawhna te hangin ka lung a dam mahmah hi.’

Na mailam thu ding na ut leh nadeih zahzah in a kicianzaw, a kitel zaw in na bawl thei hi. A kician mahmah ngimna na neihleh na ihmut ding ciangin na sungtawng dong a tung dingin pulak in.

‘Ka ihmut laitak in ka sunglam pilna in a hoihzaw ka sepding nate hong hilh bek hiloin ka sep taktak ciangin zongh a kisam bangin pilna tawh hong hilhding hi’ ci in.

Nathak ngaihsutna: Na thak ngaihsutna pen a hoih a hihi. Design khat bawlding, lai hoih khat at ding, tangthu khat phuak tawm ding, ahizongin tampi om hi. Tuabang nathak te lupkuan ciangin ngaihsun in lungngel leng tampi kingah thei hi. A hizongin ihmutna hong sum sak hi.

Nathak i ngaihsut ding ciangin lungkim tak in ihmu in sunglam pilna zatding kisam zawlai hi. Kei mahmah in zongh ka laiat te a tamzaw zingsang vive aa ka at ahihi. ‘Ka ihmut kal in ka sunglampilna in newspaper a ding, article ding ahizong in thuhoih tampi ka khuakbu sungah hong theisak ding hi. Zingsang ciangin huntomno sungin a hoihpen in ka at khia theiding hi’ ka ki ci zel hi. Zingsang laiat ka ki pat ding ciangin bangthu at ding cih ka thei kei hi. A hizongin hun tawmno khit ciangin ka at ding laimai dim mah lai ka ngah veve hi.

Sihding launa: A tawpna leh mihingte lau mahmah theih khat pen sihna a hihi. Ih ci a dam phatloh ciangin sihding ki lau thei hi. Tuabang ahihkeileh zongh vanlengtung, mawtawtung, meilengtung ahizongin lam ii pailaitak nangawn in accident khat peuhpeuh i tuahkhak ding kilau thei hi. Zankhua hong mial ciangin khat nguak omding a lau zongh ki om hi.

Nuntakna it ding hiaa sihna pen lauding hilo hi. Sihding launa in sihna dingmah piangsak thei hi. Natna khat peuhpeuh i ngahciangin bangcileng damthei lai cih sangin natna ii a lauhuaina teng peuh ki ngaihsunsun zaw thei hi. A taktak in kum 125 a nungta ding bangin i ki ngaihsut ding a hihi. Tu laitak in kum bangzah bangzah na pha khinzongin na mailam kum ding tammahmah lai hi cih lungngai in.

Mipawlkhat pen a ihmu theilo dingin kithawi khol uh hi. Lupna tung a tunma un ‘lupding thadah si e, ka ihmutpah theihloh dinglam ka theihsa hi ven’ ci in thumkhol uh hi. Tuabang gamtatna tawh na sunglam ah ihmut theihloh nadingin thu a pia na hita hi. Na thupiak mahbangin a ihmutheilo na hipah hi.

Lupna tung na tun limlim ciangin tawldamtak in a tawlnga dingin ki ngaihsun pah in. Nuam hithiat tak in ihmu in thathak a ngah dingin kilamen in.

Coffee dawnna pen ki ihmu theilo hi a ci mitampi om ahizongin hipah samlo hi. Coffee i dawnzawh nai nih a cinkhitciangin coffee ii nasepna beita hi kici hi. Nitak nai 6 in coffee na dawnleh nitak nai 8 khitpen tua coffee in nasungah nasem nawnlo hi. A hizongin mipawlkhat te coffee a dawnciangin zanthapai ihmuthei nawnlo uh hi. Coffee in hong ihmutheilo sak dinghi cih a lungsimsungah ngaihsun khin a hihman a hihi. Hih ihmut theihlohna pen lungsim sungpan hizaw aa i dawn niangtui leh coffee tuamtuam hang hilo zaw hi.

Nuamtak na ihmut theihna ding in: Nalupna tungah a pualam mei hong lut lohna ding in bawl in. A siangtholo, a etlawmlo na mun ah lupna koih kei in. Ihmut theihloh ding zah in a gamlum hong om thei hi. Tua bangciangin na ngaihsutna laih in. Lamkim lampam pan in gamlumna tuamtuam om thei hi.

Tuabang gamlumna te nazak ciangin heh ding leh lungkimloh dingin ngaihsun lo zaw in a za nuammahmah dan in hoihtak ngai lecin a sawtlo in na ihmu baihzaw ding hi. Ka khangno lai in nikhat nai 24 sung anngawina setpi ngeiah a lum ka hihi. A tawpna ah tua setpi ngingtawh ka kilawmta aa setpi nging hoih kasa mai hi. Tua pankipan setpi nging hangin ihmut theihloh hun ka nei kei hi. Nging kei leh hong khanglo sak zawlai hi.

Ihmutnuam sungah

Ihmut theihna dingin a kizangthei mahmah leh ka theihna ciangah a hoihpen khat konggen ding hi. Khialvetlo in ihmulian ding cihna hilo aa ka tuahkhak leh ka theihna khempeuhsungpan in a hoihpenpen a hihi.

1. Na lupna tungah suaktatak, tawldamtak (omdan, tutdan- lupna neulua, cihbang tuamtuamte omlo) in om masa in. Na silh puanzate hamlua, a gimnam lianlua cihbang ahizongin suahtak lohna omsak kei in.

2. Na sunglamtha nakhat sawl in. ‘Tuin nuamtak in a

ihmuding ka hita hi. Ka theihna leh kasepna khempeuh tawlga in ka sunglampilna in na hongsem ding hita hi. Ka ihmutlaitak in ka theihnop thu leh pilna hong ki gen ding hi. Kei kahihleh ihmutnuam leh manghoihsungah a lutding ka hita hi. Ka mangsungah ka muhlim te leh sepna te theithei in zingsangciangin a gualzo dingin a lungdamsa in ka thoto ding hi’ ci in.

Nuamtak in na ihmut laitak in na sunglampilna in na haksatna tuamtuamte tungah na hongsem hi. Pilna leh theihna lianpi tawh na hong sepsak hi. Na ngaihsutna sungah hong hilh hi. Hihpen naupang ki khemna tawh kibang nasa thei mah ding hi. A taktak in mihing lungsim in thunih ngaihsutkhat in ngaihsun thei ngeilo hi. Thuhoih leh na deih khat hoihtak in na ngaihsut theihnak leh lungkhamna leh lunghihmawhna hongpia ngaihsutna dang khempeuh a beisiangloh a phamawh hipah hi.

Na sungtawng ah thukhat na koih nakleh a hun a cin ciangin dawnkikna na ngah limlim ding hi. Ihmut theihlohna na neihleh lung himawh kei in. Nitak khuamial sungah na muh lim tuamtuamte hoihtak lungluttak in en lecin a sawtlo in mang na manpah lel ding hi. Hihlaibu honghilh bangin mitampi in noptuamna ngah uh hi. Nang le nang mahmah in nitak nuamtak na ihmut hithiat theihna ding hanciam in. Ihmut laitak a thupi mahmah nakhat kisem den a hihman a hihi.

Haksatna tuamtuam na nei phialzongin na sunglam hatna in sepzawhloh neilo aa na theihnop khempeuh hong hilh thei hi. Na lungngulhna khempeuh a takpi hong suah nadingin hong panpih thei hi. Leiba tampi na neizongin na sunglam vangliatna in na suahtak nading hong zonsak thei hi. Leitungah na vangliatna na zat zahzah a gualzo ding na hilel hi. Mawtaw tawh kibang hi. A hatna ding accelerator sik semsem lecin nawhtai semsem ding cih tawh kibang hi. Ih Mutna leh Hauhna