Happy Sweet December ih kicih lanlan hangin

Happy Sweet December ih kicih lanlan hangin

Happy Sweet December ih kicih lanlan hangin lungleng het lo in a dawn thei mi a tam mawk diam! A lungleng theite aa ding panin lunglen hun hong tung zel hi ta mah ei guaite! Hunlui ngai a lunglen inlah khiatna nei nawn lo, mual hong liamsansa it leh ngaih ngaih teng ngai in kapkap ta lehang lah sul hong hekik ding hi nawn lo a maw. Cikciang lungzuan a theng ngei diam aw cici ingh e. Mangngilh sawm ta lehang lungsim sung leh mitkha ah hong suak teitei om a, mangngilh nuam kei ta lehang ih mangngilh veve om zel mawk! Leitung pianzia lamdang asa hikeng, mihingte lungsim ngaihsutna paizia mah tel hak sa penpen ingh.

Phawk loh ding tengin lungsim va bang hong phawng uh a, phawk dinga kilawm tengin lah mual hong liamsan vangvang mawk mete guaite! A lehtat tat mihingte lungsim, na khempeuh a kilehbulhna hi leitung bel bangzah takin ih cimtaak phial zongin Pasian in hun ta acih mateng a nusia thei lo himawk hang ei. Bangbang ahita zongin ih lungsim puakzia tek tawh ut in ut takei lehang Pasian hehpihna tawh ih dam naak leh Sweet December a dawnzo suak ih hihman in Pasian tungah lungdamna lianpi pulaak ni.

Itna icih a bei thei diam ?

Bei thei lo, mihing ih nuntaak lai teng Itna in bei hun nei ngei lo, kiam thei cih thu hibek hi. Ngaihna leh deihna ahileh bei thei ci uh hi. Hih thu bel kenzong um ingh, bang hang hiam cileh ih neu laiin ih deih mahmah van khat hong kileisak leh a sawt lo in kicimtaak a, ih deihna bei hi. Tuamah bangin ngaihna ih cih zong ih ngaih mahmah uino khat in hong pet leh ih ngaihna teng bei hiau thei hi. Ahizongin tua ih ngaih mahmah uino pen hong khan ciangin hong kigawhsak in hileh ih khitui taak datdat veve hi. Ngaihna icih a bei thei tawh kibang napi beisiang thei tuan lo hi.

Tua ahihman in kei mimal muhna ah Itna mah lian pen a, Ngaihna in nungzuih pah in, Deihna in a nungdal hi. Hiteng thum kigawm khawm tawh ih It ih Ngaih leh Ih Deih khat ih muh ciangin a ki It , a ki Ngai leh a ki Deih takpi mah a hihi. Tua teng thum tawh lungsim khensat a ih teel khit khat tawh ih kikhen ciangin Sihna sangin na zaw a, nuntaakna in manphatna nei nawn lo liang leh kilawm hi. Ahizongin…..

Vantunggam ka tun ciangin Pasian ka dot masak pen ding thu nam 4 te:

1) Bang hangin a ki It a ki Ngaite pawl khat kiteeng sak a, pawlkhat te khitui naptui tawh kikhensak mawk na hiam?

2) Bang hangin hih leitungah mi dikte sangin mi zuautat thei leh mi diklote’n thupha sang zaw mawk uh ahiam?

3) Bang hangin mipil misiam tampi takin amau tawh akituak ding dinmun thupi ngah zo lo uh a, amau pilna siamna kham zo lo mawk uh hiam?

4) Bang hangin Christian kici lakah hizah takin kikhen thaangna piang mawk ahi hiam?

Lungsim natna leh Lunggimna !!

Mihing khat na hih nak leh lungsim natna leh lunggimna cihte pen na thuak ding khat ahihi. Na nuntaakna ah hibang natna hong tunte pen midang hi lo uh a, na kinaipihte leh na lawm na gualte banah na lawmnu na lawmpate leh na it na ngaihpente hi hamtang uh hi. Bang hang hiam cileh amaute’n na lungsim sungah mun luah khin uh a, kikhenna mun hih leitungah a ki It a ki ngaipen te zong kikhen veve uh hi. Tua kikhenna hangin lungsim natna leh lunggimna hong om a, lunglen khuangaihna tawh hong kigawm uh ciangin a thuakdan hong nuam pha het lo hi. A lel tampi ki om a, a zawngkhal lawh tampi ki om hi.

Ahizongin lungneu ken maw, hibang na thuak ciangin Itna anei mihing picing na hihna hizaw a, nang hong it zong mi na om hi cihna a hihi.Lungsim natna leh lunggimna a thuak khalo te min leh puam kigelhna laibupi na sim lecin hibangin na kigelh ding hi. Suahni—–, Sihni—–, R. I . P. Na kici hamtang ding hi. Na eng hiam? Lungsim natna leh lunggimna anei lote pen khualak ah puan zong silh lo a vakvakte hi uh a, phatmawhsak anei lo mihaite hi uh hi. Na eng hiam? Francis Lamthang (Zomi Quavadis)