Hahding kisam ~ Rev. Fr. Damian Dal

Hahding kisam ~ Rev. Fr. Damian Dal

Upna in zuihna leh theih na tepanpih na tawh khangcing theibek hi. Zuihna cih ciangin upna tawh kituak a, upna hanga ih sepding, ihbawlding ahi, upna hongsawl na te sepna ahi hi.

Tua upna i hongsawl thute pawlkhat en leng:

1. Ngen un nangah ding uh hi…( Mt 7:7-8)….Upna in thungen in hongsawl hi.

2. Zongun namuding uhhi..(Mt 7:7-8)….Upna in Pasian thu le Pasian la te zongin, kanin hongsawl hi.

3. Nangtungah hongmawh te sawmsagih mun sagih namai sak in (Lk 17:3-4; Mt 18: 21-23) ..Upna in, mawhmai sak ding nang le kei hongsawl hi.

4. Na Topa Pasian nalungsim khempeuh, nahatna khempeuh , napilna khempeuh tawh na it in, midang tezong nangmah na ki it bangmah in na it in (Deut 6: 5, Deut 10; 12,Mk 12: 29-32)…sepna bawlna, nekna , dawnna, zonna vaina, ciahna kuanna, tutna khawlna, ngaihsut na, ih hihna khempeuh tawh Pasian it ding le, midang te ih it nang, Upna in ei te hongsawl hi.

Anih na ah, “theihna” ih cih ciangin Misiangtho Anselm of Canterbury in: “Upna in theihna lamah hongmapi hi,” acih mahbang in, theihman in, Pasian a um ihhi kei a, upman in, Pasian athei te ih hi hi. Tua ahih manin, ih upthu ih theihsemsem nangin, sinin, zongin, kanin, upna thu ah ihlungvak den ding kisam hi. Napil nakhempeuh tawh na Topa na Pasian na it in (Mk 12: 30).

Upna in zuih na leh theihna tawh aton khawmkei leh, mengkhia zo lo in, zungthak khazo nawn lo a, amah kia si lah nungta in, huihnung guahzu thuakin, vulningniangin, gampawl lah ah ding ngiungeu hi. Alunglengleng in, abukna’ng nilim te zong hi. Huih hatluasa ahihmanin, abelhding munmuanhuai zong hi.

Amah le amah a, animdildial ding hi na pi in, selkhazo nawnlo, hiangle tehte neizo nawnlo ahih manin muallai ah, mite nawksuk nawktoh thuakin, kanuntakna, ka upna mannei nawn kei ci in, thum ta hi. Laisiangtho sungah upna in “Ankamtang tawh kibangin, hongpo khiat ciang in, huihlakvasa te belh dingin, kunglianpi hongsuak a, ahiang, ateh nimdildial hi (Mt 13: 31-32) agahhunin gahden hi ( Late 1: 1-5) ci hi.

Tua ahih manin, thungetna, lasakna, Pasian thu le la kanna, Pasian phawkden zawhnang hanciamna, Laisiangtho simna, thu ummi, thuzuimi tetawh kikhawlkhop na te ah hanciam in, khat le khat khutki len kawm in, ih upna te hahsiam ding kisam phamahmah ta hi.

Judah Iscariot le Petru bang kilamdang i sahiam? Nungzui pi tuak hi in, Topa nasep te, mukhawm, apiak ante nekhawm, a nalamdang bawlte phatkhawmin, kumthum sung aki bangin nungta khawm hi. Petru in Topa thumvei nial hi. Judah in Topa dangka sawmthumtawh zuak hi. Bangkilamdang hiam hi mihing tegel?

Akilamdan na in, Petru in Topa pen anungta Pasian tapa hi cih upnalian pi nei a, agamtat nakhempeuh ah, leitungkhuak ii telzawh loh, upna hangbek in atelsak Topa’ thu nalen tentan hi. Topa aw, nangkianglo kuakiangah paiding kahi uhhiam? Nangmah in nuntak tawntungna thu na nei hi (Jn 6:68) na ci hi. Atel lohhangin Topa in, nuntak na thu hi cih umtentan hi.

Judah ahih leh, leitungvai bek in, Topa na um kha hi cileng ihkhial kei ding hi. Leitungah vangliatna alakziahziah ding, amah le amah agalte khutsungpan aki honkhia ziauzaiu dingin, Judah in Topa na umkhial hi. A umlo hi loin, a umkhial ahi hi. A up thu theilo ahih manin, sih pih kha hi. Rev Fr Damian Dal