GZA: Taang kona (Affirmation)

GZA: Taang kona (Affirmation)

KAWLGAM nitumna lam Zomite lakah kum zakhat val (1899-2018) hong tualbual khin lungdamnathu (gospel) in thuzui masate mimal nuntakna nakhelin Zomibup nuntakzia le pupa ngeina hoihlo khempeuh zong hong kikhel sak hi. Lungdamna thu i hong puak Khristian biakna in kikhelna biakna (Conversion and Transformation) ahi hi. Ahi zongin kum zaval hong cin ciangin hunlap dingin tua Gospel thu gil ih let kawmmah in Khristian biakna zong athak in bulhtuah ding kisamta hi.

Tua ahih manin 2018 kum November kha (26-29) sungin Roman Catholic Church, Protestant leh Pentecostal pawlte pan a hunbit Pasian nasemte Kalaymyo, Sayadaw huangah a kibawl kimuhkhopna panin a nuai-a thute thuzui mi khempeuh in theihtuak zuihtuak hi, ci-in kong taangko khia uh hi.

1. A beisa hunin Khristian pawl tuamtuam (RC, Protestant, Pentecostal)te i kimuh ciangin i kibatnate genlo-in i kibatlohna, i kilamdanna nengnengte i gen zaw hi. Tu-in Khristian Pawlpi a kitelkhial sak thei kilamdannate gengen nawnlo-in a thupi mahmah i kibatnate genzaw in, Khrist Pumpi a kipumkhatna dingin ih vekpi-in i hanciam ding hi.

2. Khristian a suakmasate in lungdamnathu (gospel) citak takin a na nuntakpih cinten mah bangun tukhangin zong amin bekin “Khristian te” hi lo-in lungdamnathu a nuntakpih taktak Khristiante ihihna dingin i pawlpi tekah i hanciam ding hi. Upna (Belief) leh zuihna (action) i kituak sak ta ding hi.

3. A beisa kum zakhat sungin lungdamna thupen mimal gupkhiatna (personal and individual) bek i bulphuh hi. Topa Jesuh hong puak lungdamna thu pen mimal gupkhiatna (individual salvation) ahihmah bangin (Luka 19:1-10, Johan 3: 1-16), Johan 4:1-18) taangpi gupkhiatna (social salvation) zong ahi hi (Luka 4:18-19, Isaiah 61:1). Tua ahih manin lungdamnathu pen mimal gupkhiatna bek tawh khawl lo-in taangpi lungdamnathu (social gospel) dongah i sem ding hi.

4. Tuma kum zakhat sung teng gupkhiatnathu i gen pen mihingte kha hotkhiatna thu bekbek i gen hi (human salvation). Ahi zongin Khrist hong ken lungdamnathu in piansaknate vaannuai gupkhiatnathu ahi hi (ecological salvation). Banghang hiam cih leh Pasian in tua a piang na khempeuh a cing a keem a vaan dingin mihingte hong bawl hong piang sak hi (Piancil 1:26).

Mihing te’n mawhna bawlin samsiatna a thuak uh ciangin piansak nate khempeuh in zong tua samsiatna mihingte tawh thuak khawm hi (co-victim of the curse). Tua ahihmanin gupkhiatna ni lamenin ngaklah a, thuum-in tau-in om uh hi (Rom 8:18-25). Tua hi-a, i mission nasep na-ah, kha hotkhiatna I gen ban ah singkung lopa, ganhing namcin, tui, huihte a kipan kiim leh paam cingin, cimang saklo a puahna zuunna (ecological mission) nasep te i vekpi-in khut kilenin i semkhawm ding hi.

Hih a tunga thute pawlpi khatbek in semlo-in Zomi Khristian Pawl khempeuh leh Pawlpi khempeuh in semkhawm liailiai in kumzalom 21 ading ZOMI KHRISTIAN BIAKNA kilangkhiasak dingin Khristian Pawlpi khempeuh in i hanciam ding hi.