Gul bangin pil, Vakhu bangin migi ~ Tdkhen

1. Na zeekkhop pih dingte ahih kei buangleh na thuphate gengen kei inla, na thuakkhop pih dingte ahihkei buangleh na haksat-nate gengen kei in.

2. Na zatpih loh ding khat in na thuphate hong dotleh, hong dem’nop man hi thei-a, na thuakpih loh ding khat in na haksat-nate hong dotleh, a ki hehnep nading hi thei hi.

3. Na ut bangbang na genleh, a ut bangbang hong kigenpih dinga, thuhoih bek na genleh thuhoih bek hong ki genpih ding hi.

4. An na nek ciangin na kam-ah na guanga, na valh ciangin na sungah tumin, na nek tawh kizui-in na pumpi ah hong kilang khia hi. Tua mah bangin thu na gen ciangin na kam-ah na pau a, na lungsim-ah a tum ciangin na thugen tawh kizui-in na kilamdang ding hi.

5. An hoih pen an pha hi-a, na nek ciangin na pumpi in a hatlawh mah bangin, thuhoih zong thupha hi-in na ngaihsut ciangin na pumpi in thahat-lawh ding hi.

6. Mite’ hoihloh-nate na gengenleh, a dawndawn, a valhvalh na hi-a, tua teng mah hong gai-in, na mangngilh khit pekpek ciangin hong suak khia dinga na gen’gen’te tawh lawmta na hi ding hi.

7. Na gen ding a tam loh hangin thuhoih bek mah gen lecin, na lungsim nuamin na pumpi a cidam dinga, na khan zong a sau ding hi.

8. Pau khialh ding na lauleh thucin thutang gente’ kiangah om kei inla, neek khialh ding na lauleh nektheih nekmawh ne-te kiangah om kei in.

9. Lo kigi veengkhat-a an kiciingte a kilawh mah bangin, na een’ simsimte tawh kikhawlkhawl lecin amau mah na bang lel ding hi.

10. Khaici kipawi-in a mun-ah a po suak pah ding pawlkhat om a, ki po sak photin a kisuan khia ding pawlkhat a om mah bangin, na talent tawh kizui-in po suak lecin meet zaw ding maw, kisuankhia lecin meet zaw ding!

Khaikhopna:-
(1) Kampau-na pen kamtai hi-a;
(2) Lungsim pen thuzeek hi-in;
(3) Pumpi pen sawltak ahi hi.

Hih thum(3) teng pen pumkhat ahi hi.

Tua pumkhat tunga thu-zeek ding pen Lungsim ahi hi. Kam in a gen’ bangbang Pumpi in zui ahihmanin,, Pumpi’ a’dingin a hoihlo khempeuh Lungsim in a theih ding a ki sam hi. Pumpi thanemleh Kam zong thanem-in, Lungsim zong a zawng khal hi.

Tua ahihmanin Pumpi’ a’dingin a hoihlo khempeuh a paukhiat ma-in, Lungsim in Kam pen a na thu-zawh ding ahi hi. I siat nading hong buk den, i kampau-na tawh thang hong siah den, i galpa’ ngian zat pen Lungsim in hong theih mahmah ding a ki sam hi.

Tdkhen Tuuno Huang