Guatemala gamsung ah meimual Volcano puakkhapna hangin misi 109 phatota

Guatemala gamsung ah meimual Volcano puakkhapna hangin misi 109 phatota

Central America, Guatemala gamsung Fuego Volcano akici meimual puakkhapna hangin misi bekbek 109 phatota hi ci’n Thursday ni in Officials te’n pulakkhia uhhi.

National Forensic Sciences Agency te genkhiatna ah misi kikepna Morgue ah misi hongkipuak aluanghawm bekbek pen 109 phatota hi. Abeisa in misi 99 ciang hi a, ahi zongin ki behlap totolai hi ci’n genkhia uhhi.

Hih apuakkham Fuego Volcano meimual pen Guatemala City panin 35 km khawngbek aomlakna ah aom ahihi. Meimual apuakkhapna Fuego Volcano mualpen 3,763 Meter (Pi 12,346-foot) asang hi a, abeisa kum 40 (four decades) sung apuakkhamna ah tutung apuakkham pen ahuaisia penpen, akhauhpenpen ahihi.

Meimual puakkhapna hangin misi 109 banah aliamzong tampimah omkawikawi hi. Tuaban ah meimual tawh akinai aom mi 12,000 te ki hemkhiasak in, tulaitak Shelters belhbuk te ah cimawh dongtuak in aomzong mi 3600 bang aomlaitak uh ahihi.

Zanni Thursday ni in meimual apuakkhapna tawh akinai Area sungteng ah guahtui tamlua mahmah, bekthamlo meimual panin aluangkhia vutsa tuinawng aluangkhiate samahmahlai in, meimual zong apuakkham ombeh laiding cih kipautau kawmkal ah leicim leitolh lauhuai omkawikawi ahih manin Rescue Operation pen ki khawlbawl sakphot hi. Sawltak #zomidaily

Central America, Guatemala gamsung ah meimual puakkham, mi 25 si in adang tampi cimawh

Central America, Guatemala gamsung ah zanni Sunday ni in meimual puakkham ahih manin misi 25 bang phakhinta cih AFP pan kiza hi. Tua apuakkham meimual pen Fuego Volcano kici a, Sunday ni in vutsa leh suangthem kithehkhia ziahziah in, vanlengtual Main Airport zong ki khakcipsak hi.

Volcano meimual asunglam panin vutsa honkhat kithehkhia in, tuahangin khuasung mite’n asihlawh uh ahihi. Asi te lakah naupang honkhatzong kihel hi ci’n Disaster Agency spokesman David de Leon in genkhia hi.

Sunday zanlam ciangin meivak hoihtak ki ngahthei nawnlo ahih manin, asi amangte zonna Search & Rescue Operation pen lauhuana tuamtuam hangtawh ki khawlbawl sakphot hi. Ahi zongin Moday zingsangtung in kizomkikding cihi.

Meimual apuakkhapna mualpen 3,763 Meter (Pi 12,346-foot) asang ahihi. Tua mualsangdawn panin meimual apuakkhap ciangin vutsa tepen akiim apaam Area tengah kithehsuk ziahziah hi. Gamsung singkung te puangkheukhau in, lamzik te, mawtaw leh mihing te mahmahzong vutkhu in tuamcipgawp hi.

Gamsung lokho mite zong vutkhu in atuamcipgawp ciangin patautek mahmah uh a, anuntakna asuahtaktheih nadingun taikek ngeingai uhhi. Civil Defense nasemte’n tua acimawh te kaikhawm kawikawi in, belhbukding Shelter vaihawmsak uh a, tua Shelter te ah kemphot uhhi.

National Coordinator for Disaster Reduction (Conred) chief Sergio Cabanas inzong hih meimual puakkhapna hangin mi 20 bang liamin, akigawm in mipi 1.7 Million bang nawikaisak mahmahhi ci’n pulakkhia hi.

Video: With wooden sticks and shovels, people search for their loved ones buried under tons on sand after Guatemala’s Fuego volcano erupted. The known death toll stands at 109, with nearly 200 missing. Most have yet to return since the catastrophic eruption. People are now putting their hopes in divine intervention and President Jimmy Morales. In El Rodeo, home to 8,500 people a kilometer away, locals say they are still spooked by the rumblings of the volcano as well as the threat of looters.

President Jimmy Morales inzong hihvai hangin Escuintla, Chimaltenango, Sacatepequez Area sungteng ah lauhuai hi ci’n Red Alert tangkosak a, tualo adang gambup ahzong Orange Alert tangkosak kawikawi hi.

Hih meimual pen tukumsung ahuaisia phadiak in nihvei apuakkhapna hita hi. Abeisa February khasung inzong meimual panin vutsa kiphitkhia in, vandawn ah 1.7 kilometer bang sangto in kiphit ziahziah hi.

More: US, Hawaii tuikulh ah meimual puakkham, mi 10,000 val ki hemkhiasak

2012 kumsung inzong hih meimual puakkhamngei in, mi 10,000 valbang cimawh in taikhia ngeingai uhhi. 2015 kumsung inzong khatveimah buaina piangleuleu in gamsung aom Main Airport zong ki khakcipsak ngeihi. Guatemala gamsung ah hih Fuego Valcono banah adang meimual ahinglai “Active Volcano” nihbang omlai hi. Tuate lakah Pacaya Volcano akicipen Guatemala City panin 20 kilometer bek kigamla sawnsawn hi. Sawltak #zomidaily