Global Zomi Alliance pan Thu Zaksakna

Global Zomi Alliance pan Thu Zaksakna

Leitung Mun Tuamtuam aa Om Zomi Khempeuh,
Kum 2010 November kha sung aa Tedim khuapi ah ih neih Cope Centennial Jubilee Celebration khawmpi sung in Zomite mailam khantoh nading leh kalsuan ziading hong makaih dingin a nuai aa makai 5 te kiteel hi:

Rev. Simon Pau Khan En, Ph.D.
President
Bishop Felix Lian Khen Thang, J.C.D.
Vice President
Rev. Chin Do Kham, D.Min., Ph.D.
General Secretary
Rev. Do Suan Mung, D.D.
Assistant Secretary
Rev. Gin Khan Khual, Ph.D.
Member

Makai 5 te gelna a om bangmah in Singapore ah April 27-29, 2011 (ni 3) sung Trinity Theological College huangsung ah thu kikupna kinei hi. Ih gelna te Pasian in hong thukim pih a hih man in makai 5 teng zong kimtak in kihel thei aa, haksatna leh buai na om hetlo in April 29 nitak lam nai 4:30pm in meeting hialbawl uh hi.

Tutung pen meeting masa a hih bangmah in kipawlna min, tup leh ngimte leh sepziading cih te ngaihsut khopna hipi pen aa kikup ding aa hong ki pulak thu khempeuh kikum khin kim manlo uh hi.

Tutung makai 5 te meeting ding tawh kisai aa innteek hongsem, sum leh pai tampi a bei lawh aa a gim a tawl Singapore aa om Zomi khempeuh tungah ih Topa Pasian in thupha hong piaksak nading thu ih ngetsak kawm in lungdam na thu kong pulak uh hi.

Tua ban ah, leitung mun tuamtuam pan thu hong ngetsak leh sum leh pai tawh ma hong panpih kipawlna tuamtuam leh mimal khempeuh tung ah lungdamna thu kong pulak uh hi. Huhna hongpia te list zong a sawtlo in internet pan kong taangko ding uh hi.

Tutung makai 5 te kikupna sung aa aa khensat nate bulpi zawhdeuh te hih a nuai aa bang a hihi.

I. Kipawlna Min:
· Hih kipawlna min in “Global Zomi Alliance” kici dinghi.

II. Kipawlna Huam:
· Hih kipawlna in leitungbup aa om Zomi khempeuh a huam a hihi.

III. Minam Min:
· “Chin” cih min pen midangte hong piak min hi aa, tangtawng aa kipan ih pu ih pa te “Zomi” ci in na kilo uh a hih man in, ih minam min pen “Zomi” mah ki ciden ding hi.

IV. Vision (Tup leh Ngim):
· Hih kipawlna in Pasian bulphuh in Leitungbup Zomite ki pumkhat aa, a bucing khantoh nading ki pawlna a hihi.

V. Makai 5 te pen Central Committee kici ding hi. Tu laitak aa makai 5 te term pen kum 5 sung hiding aa, tua sungin GZA ii “Constitution and by-law” ding hong bawl ding uh hi.

VI. A tung aa makai 5 teng ban ah, India gamsung Zomite sungpan Rev. JM Ngul Khan Pau leh Evangelical Baptist Convention aa General Secretary (designated) te ki behlap hi. Dr. JM Ngul Khan Pau tungpan in sanna thu kiza khin ta aa, tu laitak aa EBC general secretary sem Rev. Luai Chin Thang tungpan san na kammal kingak lai hi. Mailam ah Global Zomi Alliance Central Committee in member 7 nei tading hi.

VII. Mailam ah Zomite leh Zogam khantoh nading in na lianpi sepsawm ih hih man in, committee 15 kiphut khia aa tua committee minte a nuai aa bang a hihi. Committee khat ciat aa makai te leh member te list zong a sawtlo in kong taangko ding uh hi. Zomite leh Zogam a khantoh nading in leitungbup aa om Zomi a kici khempeuh ii tavuan/mawh puakna a hihi.

A. UNITY: Hih Section (A) nuai aa vai teng pen leitungbup huam in ki vaihawm khawm
dinghi.
1. Unity & Fellowship Committee
2. History, Culture & Literature Committee
3. Zomi Linguistic Committee
4. Public Relations Committee

B. DEVELOPMENT: Hih Section (B) nuai aa teng pen a mun a gam (e.g.Kawlgam, India)zui in
ki vaihawm ding hi
5). Education Committee
6). Public Healthcare Committee
7). Agriculture and Livelihood Committee
8). Media & Communication Committee
9). Community Development Committee
10). Women Committee
11). Youth Committee
12). Music Committee
13). Sports Committee

C. FINANCE
14). Fundraising Committee
15). Treasury & Auditing Committee

VIII. December 7-11, 2011 sung Kawlpi (Kalaymyo) ah GZA Central Committee te, Committee tuamtuam aa member khempeuh leh Zomi sung pan a kisam makai tuamtuamte a kigawm 150 te in ki muhkhopna, ki lawmtakna leh thu kikupna “conference” neiding uh hi.

Thu kikupna leh khensatna tuamtuam te a hunzui in hong ki zasak toto ding hi. Hih ih kipawlna hong picing to semsem aa, ih tup leh ih ngim nate ih lawcin nading in ih mun ih mual ciat pan khat leh khat tha kipia in thungen in ma pangkhawm ciat ni. Zomi te omna khempeuh ah a nungta Pasian in thupha hong pia ciat hen!

Singapore aa Hunneih dan
Singapore aa om Zomi te makaih na leh innteek na tawh April 27-May 1 sung nitaksim in mipi tawh biakpiak kikhop na om aa tuasung ah Stephen Vocal Band te leh ECT-Trio te zong lasakna tawh hong kihel thei uh a hih man in Pasian ompihna tawh hunte nuam thei mahmah hi. Nitak sim in makai 5 te sungpan khat ta in thugenna nei uh hi.

Malaysia ah Vazinding
Makai 5 te sungpan a hithei teng May 2 in Kuala Lumpur, Malaysia ah va zinsuak ding uh aa, May 3-5 (nitak 3) sung Malaysia aa om Zomi mipi hong paithei zahzah tawh biakpiakna hun kinei ding hi. Tua bang a pian nading in Malaysia aa om Zomi sung aa kipawlna khempeuh ma pangkhawm aa vaihawm uh a hih man in, ngaihsutna picing tak aa Pasian itna leh minam khantoh nading lunggulh natawh mapang khawm khempeuh tung ah Topan thupha hong piaksak ta hen. Tua sungah Stephen Vocal Band te leh ECT-Trio te zong hong kihel theiding a hih man in mipi te lawp thei mahmah uh hi cih thu kiza hi. May 4 (Wednesday) sun hunsung in GZA makai te leh mipi te holim na hun kinei ding hi.

Ih mailam maban tampi te ah ih Pasian in hong makaih tohtoh nading in thu ngen in mapang khawm ciat ni!

Central Committee te taang in,

Chin Do Kham, D.Min., Ph.D.
General Secretary
Global Zomi Alliance