Gibang khen zawh kum sawm ~ Peter Suumpi

Gibang khen zawh kum sawm ~ Peter Suumpi

“Azenzen in hun te hong kileh kik thei hileh …” Cing Cing le kei pen zinkhen maw siankhen thei zo keng. Cing Cing pen nungak khat hi. A kam lah siam in gamtat luhek pauban na om hetlo hi. Cing Cing tawh kikhen zenzen leng mi te in hai taktak ei maw ci in hong hawmtawh ding uh ka theihsa ahi hi. Cing Cing pen ka khen nop hetloh hang kikhen nading thu kei mah in ka khensat hi.

Kikhen zawh ni khat ni

Cing Cing pen zingsang thohak hi. Sawm nei nu in a lupna a et leh Cing Cing pen puan sung ah kikhuh cip hi. Lupna tung ah Cing Cing kual ngieu-ngeu hi. Sawm nei nu zong khat vei husan hong sang hi. Tua khit teh Cing Cing lupna kongkhak damdam in khaksak kik in nusia kik hi. Sun nai 11 hun in Cing Cing zingtho pan hi. Tu ni Cing Cing bel sangkah lo ding hi. Siangthona khan sung aa limlang sung ah Cing Cing maimial takin kimu thei hi. A mit te ahileh khitui tawh kidim hi. Tua ni pen Cing Cing a ann ka lim hetlo hi.

Kikhen zawh ni 2 ni

Amai teng maiza atawk mahmah in nuh in zu sai lam zuan in Cing Cing hong pai hi. Zusai sung munkhat ah hong tu in amin ka theih loh zu tamman te hong vaikha hi. Hai khat khit hai khat, asawt lo in Cing Cing sabuai tungah zu hai ahawm hong tam mahmah hi. Itna dan akimu lo maitang apua pasal khat in Cing Cing kiang ah “hoih hong sa sing e” hong ci hi. A pa gual ahi tua pasal pa pen Cing Cing in mitzeu cyiecyai sa in hong en hi.

“Nungak nu aw kham lua ta na hia? Inn dong kong kha dia?” “A hoih pah ei vele”

Tua mipa pau Cing Cing adawn kawm in tua mipa maitang adawn laitak azu tawh hong theh hi.

Upmawh loh laitak ammlo savat atuak tua mipa zong heh lua in Cing Cing pang beng ding in akithawi laitak Cing Cing’ lawmte hong tung bilbel uh hi. Alawm te ahihleh Cing Cing zong in abuai laitak uh ahi hi.

“Cing Cing khawl sin aw. Nang hi bang in na khasiat ka muh uhteh ko zong ka khasiat uh suak hiven”

A lawm te hopihna te Cing Cing in a thu don kei hi. A tawpna ciang in a lawm te in Cing Cing zusai pan hong kaikhia in hong ciah pih uh hi.

Tua zusai aa thupiang teng avekin ka thei gai hi. Tua hun laitak in khuazinna akawm khat ah kei ka om hi. Cing Cing zusai hong lut aa kipan atai khat dong ka en gige hi.

Kikhen zawh ni 4 ni

Zato sung aa lupna tung ah Cing Cing alup zawh ni nih pha ta hi. A zu kham nitak aa kipan Cing Cing in khua hoihtak phawk nailo hi. A kam pan lah amumang pau kawm in ka min hong lo lo hi.

Kikhen zawh ni 6 ni

Zato ah kei ka paisim khian khian hi. Cing Cing lupna gei ah ding in lupna delhpha te bang aa akang dikdek Cing Cing maitang ka en hi. Tua ni zan thapai daitak in Cing Cing gei ah ka tu hi. Cing Cing khuaphawk ding hong kipat ciang in daitak in ka taisan kik hi.

Kikhen zawh ni 7 ni

Cing Cing zato pan hong tuakta hi. Zato atuak zawh Cing Cing ii sep masak pen ahileh amah guak siangthona khan sung ah kikalh cip hi. Hun asawt sim pian khit ciang Cing Cing hong pusuak hi. Cing Cing lawm te in siangthona khan a va et uh leh a na siangtho sitset a mu uh hi. Cing Cing in lunglut takin siangthona khan sung ahah siang ahi hi.

A tawntung aa maitai in akamcim mawhlo Cing Cing pen tu in ahileh kam tawm in amai mial den ta hi. Kei hitaleh kei tawh kisai abeisa hun khempeuh Cing Cing in phawk hi cih pen amit pan kimu thei hi. Hipen alawm te in zong thei uh hi.

Kei hong phawkna lungsim teng tawh Cing Cing in lai hong hahsim hi. A hun awng neihsun na ngawn in laibu bekbek simsim hi.

Kikhen zawh kum nih

Kum khatna te ii sangnaupang makai ding in Cing Cing kitel hi. Hibang in kitel ding pen athu baih hilo cih pen ka thei hi. Makai khat aading vaipuak pen neu hetlo cih pen Cing Cing in thei hi. Tua ahihman in Cing Cing in hamciam kisin hi.

Kum thumna atung ciang in qualified alut zawh nading in Cing Cing in hanciam hi. Tuabang in ahanciamna hangin Cing Cing pen mau ii Major ah a ettehtak sangnaupang pahtawina zong hong ngah hi. Sang aman ciangin a nasep nading Company te in Cing Cing asang man ma in kham khol uh hi.

Kikhen zawh kum 3

A minthang university khat ah qualify tawh Cing Cing in sang hong zom thei hi. Cing Cing gei ah kei sang a mipi suahzaw pasal tampi om hi. Ahihang in “Sing Khan Piang” akici pa simlo kua mah in thudon lo hi. Sing Khan Piang zong a u bang in Cing Cing in a ngaihsut ahi hi.

Kikhen zawh kum 9

Cing Cing zuthawl kipian khin cih thu kaza hi. A lawmpa ding SingKhanPiang.

Kikhen zawh kum 10

Cing Cing in pasal neita ding. Mopawi ding kha lang in akisap lai in innthak ii sualpeek tung ah Cing Cing tu in misapna laite tung ah min agelh hi. A maitang tung ah maitaina le lungdamna lim te kimu hi. Kei sim loh mi tampi te in hih sapna ngah ding uh cih pen ka theihsa ahi hi.

Sapna lai te bang hoih lua si. Lai tung ah mopa le monu te min mun ah Cing Cing in min te gelh gelh hi. Sapna lai a (12)na ah min agelh laitak in Cing Cing thakhat in hong khawl hi. A gelhsa laite hong en in hong lungngai hi. Asawtlo in Cing Cing hong kap hi. Khasia tak in Cing Cing hong kap hi.

Kei zong amai lam nehphei in sapna lai ka et leh mopa ii min mun ah kei min akigelh ka mu hi.

Cing Cing in agelh khial maw. A lungsim sung ah hong phawk luatman aa agelh khialh maw. Ka biang ah ka khitui hong luang hi. Cing Cing tawh ka kikhen zawh kum 10 sungin amasa pen ka khitui luan ni ahi hi. Ahizong in midang te le CingCing in ka kahlam hong mu lo ding uh hi. Sikha te in khitui aneih loh pi uh.

A zenzen in hunte hong kileh kik thei hileh lamkan ding ngaklah lo mah ding hi veng. Abeisa kum 10 lai Cing Cing suahni in Cing Cing ka piak ding letsong lei in ka pai hi. Lamka bom pan in hong paiphei mawtawh khat tawh … Lailet – Peter Suumpi

P.S CingCing le Sing Khan Piang te tangthu aading kazak ahi hi. Kuamah ka cihna hilo hi. Peter Suumpi (Dec 17, 2017) Source: Nine Nine Sanay