Genvai Thupulakna: ZIUSA kipawlna in Lia Niang Sian It luangpha/vui ding

Zomi Innkuan USA
Executive Committee

ZIUSA Genvai Thupulakna
April 3, 2015

A Thu: Lia Niang Sian It Luangphamna/Kivuina

March 30, 2015 ni in, Texas Gamkee, Dallas khuapi a teng Pa Kam Ngaih Thang’ tanu, Lia Niang Sian It (kum 7) in lam-etlohpi in hong tuahsia a, mual hong liapsan hi. Lia Niang Sian It pen Zomi Innkuan USA Genvai Thukhun apom, Zomi Innkuan Dallas kipawlna Pawlmi kician khat ahih manin, Genvai Thukhun zui in Zomi Innkuan USA kipawlna in a luang kipham/kivui ding hi.

Pa Kam Ngaih Thang-te innkuan pen ZIUSA Genvai Thukhun apom, Zomi Innkuan Dallas kipawlna Pawlmi Innkuan kician khat a hihna uh Zomi Innkuan Dallas kipawlna Makaite in thu hong ko uh a, Genvai Tanupawl in a thu a la a kantel khitciang in ZIUSA EC pawl tung ah kipsakna hong puak uhhi.

Tua ahih manin, Lia Niang Sian It’ luang phamna/vuina dingin, Zomi Innkuan USA kipawlna in Genvai Thukhun zui in, Genvai Sum sung panin $10,000 (Dollar Tulsawm) kipiakhia ding hi. Hih sumte, Dallas Fort Worth khuapite a om ZIUSA EC panmunlen Makaite in tanu semin Zomi Innkuan USA kipawlna min tawh innteek bangkua tung ah piakhia ding uhhi.

ZIUSA kipawlna min tawh a kipuak ding Genvai Sumte pen tu ni, tu hun laitak a ZIUSA Genvai Thukhunpom Pawlmi khempeuh, numei naupang akua mahpeuh in itna tawh Lia Niang Sian It ih vuina, a luang ih phamna taktak ahi hi.

Hici bangin US gam sung a om Zomi-te in dahna sung pan ki-itna kikhualna tawh Lia Niang Sian It’ luang pham in ih vuibawl manin, adah akap a nu a pate leh a sanggamte a kipan, meeltheih tanau, khuapih tuipihte, Pawlpi mipihte leh Zomi Innkuan kipawlna Pawlmi pihte khempeuh in khalumna ngah in, anungta Pasian kiang pan hehnepna kicing angahna dingun thu ih ngen hi.