Gengen sasa gelhgelh piakpiaklai dingmah hizaw – 1

Gengen sasa gelhgelh piakpiaklai dingmah hizaw – 1

Mi pawlkha te’n gam leh minam itna thu hong gelh hong gen hong sak uhteh pawlkhat te’n nang’ bangciang semta na hiam, bilam lel gennawn gelhnawn sanawn dah in zak thadah huailel tuni ciang I gam ading bangmah zong semngap keiteh cih sanziau thei uh hi. Ahih naciang zong omthei mah ding hi. Ahi zongin tulai I gam leh I minam itna pen I din mun enleng I gengen I saksak, I gelhgelhlai dingmah in ka ngaihsun hi. Sawltak Paul in mikim tungah Pasian hong piak Letsong ki bang khinlo a, tuate amun leh amual tawh ki tuak in zangni, a cihte phawkhuai kasa hi.

Mipi ki muhkhopna khat aom a, hun alem leh I gam leh I minam itna thu leh a puahhuaizia, thugen siamten genpih in lasa siamten la tawh hongsa-in laigelh thei ten hong gelh in Internet leh mun tuamtuam ah hong suahkhia un. Sum le pai zongten hong piakhia ziahziah un. Gam leh minam itna lungtang a neikhempeuh thugensiam khinlo, lasak siamkhinlo, laigelhsiam khinlo, sum le pai haukhinlo uh hi.

Mi khat in Internet hong khoih theihteh minam itna hong neihtheih minam itdan ding hong theih lawh a, hong gelhkhiat pen manpha kasa hi. Internet khoih theikei leh minam itdan leh bang minam taktak kahi hiam, cih a theilo, a tello a, a sicip ding himawk hi. Internet khoihtheih khempeuh zong minam itna anei hihkhit tuaklo hi. Tulai gamdang tung pawlkhatte zong gam leh minam itna hong neihtheih pen amau ading in gamdang tuntak kasa hi.

Gamdang tung khempeuh minam it hi khinlo khading hi. Inn lam a, a nu le pa nangawn a hopih ngeilo om tuaklai hi. Muntuam gamtuam a tunteh gam leh minam itdan hong theih a mit hong ki hon bek zong ama ading leh a mipihta dingin tuntak kasa hi. Bang hang hiam cih leh khualam ah om leh gam leitang I neih I pu I pa satsa ahih lam zong theilo in Kawl galkap ukna nuai-ah omcip in sukhoi tohoi khathei maidinga gam leh minam a ding, nasemte a khaktan pawl a, apan mel zong kitheilo hi. Gamdang a tunteh haksatna tuamtuam a thuakteh, lai pawlkhat a simteh, Internet a khoihteh a mit hong keuhlawh hikha dinga, lungdamhuai peuhmah hi.

I gam leh I minam pen Kawl kumpite leh India kumpite hangin a khanding zahin khangto thei loin asung aom agam mite bek hilo in van manpha tampi singkunglopa a kipan beilawh, gimlawh, thuaklawh, sihlawh uh hi. Tua hi-a, na sunga om gam leh minam na itna, na itdan, na puahnop na sepnop dan itsit hetlo tak-in hong gengen, hong sasa, hong gelhgelh in.

Topa Zeisu zong a suahding thu a kigen kum zatampi khitciangin hong suakpan hong piangkhia pan hi. Tulaitak a, na lungsim sunga om gam leh minam itna pen mikim tungah om hikhin zenzenlo hi. Gengen, sasa, gelhgelh lecin nikhat ni ciangin Kawlgam Missionary Judson lai hawmkhiatte aki paikhat kawl nupi vanlei a paikhat in a nalei tunna dingin nei-a, inn a tunteh asim leh pianthaklawh tawh pawlkhat hong kibang ding hi.

Na lunggulhna, na ngimna natup nate pen nang tung panin a gahkhia pawlkhat om dinga, mi dang tung panin zong a gahkhia, hong ki semkhia omthei ding hi. Tua ahih manin gam le minam itna na neihte hong gengen hong sasa, hong gelhgelhlai in. Tua hileh piakkhiatna leh sepkhiatna in a zuih hun hong omding hi. Khaibawi