Emergency Phone Numbers Pawlkhat

Emergency Phone Numbers Pawlkhat

Leitung khuahunte lah sia semsem, munkhempeuh lah gal leh sa haksatna tawh ki dim, natna lamdang pipi, thulamdang pipi hong piangpiang ahih manin, upmawhlohpi in thusia lasia khatpeuh atuak kha i om phial zongin, thu um mite i omna peuhpan ei leh ei Pasian thu a vaanglian Pasian kammal tawh i kihuut pak theihna ding, 2015 kumthak emergency telephone nambat pawlkhat hong khak ingh.

EMERGENCY A SAPTHEIH DING PASIAN’ TELEPHONE NUMBAT PAWLKHATTE (2015)

Pasian thu um Jesus Khrist nungzui khatin, haksatna thukin khatpeuhpeuh a tuahkhak leh 911(USA), 112(Norway),… cihte a sap maa a thu tawh kizui-a sap masak ding Pasian phone nambat anuai-a bang hi-a , manlang leh kician in vai teng vengbaih zaw hi.

Lungkhamna dahna thu khatpeuh na tuakkhak leh, phone John 14

Mawhna khatpeuh na bawlkhak leh, phone Late 51

Lauhuaina khatpeuh na tuahkhak leh, phone Late 91

Midang te’n na tungah hongmawh/khialhkhak leh, phone Late 27

Pasian nang tawh kigamla om dana na theihkhak leh, phone Late 139

Na upna khangkhan ding kisam na sak leh, phone Hebrews 11

Nang bek om a na lau leh, phone Late 23

Lungsim patauhna na neih leh, phone Matthew 8:19-34

Liamna thuakin sihtheih na dingkhop lauhuai dinmun ah na om leh, phone 1Corinthians 13

Khristian hihna ah uptheihlohkhopa lamdang sakna na neih leh, phone 2Corinthians 5:15-18

Mite’ nawlkhin paampaih-a om na kisak leh , phone Romans 8:31-39

Lungnop khamuanna a zong na hih leh, phone Matthew 11:25-30

Pasian sangin leitung lian zaw dana na ngaihsutkhak leh, phone Late 90

Khrist nang ii nuntakna insurance dinga na koihnop leh, phone Romans 8:1-30

Inn nusia in munkhatpeuh na zinkhiat ding leh, phone Late 121

Nangma a ding ngiat-a thunget hun na zat leh, phone Late 87

Sepding na khatpeuh ah lungkialo-a sepzawhna ding na kisap leh, phone Joshua 1

Van man khanna tawh kizui-a ameet/apuung ding lamen-a, lungsim huaihamna na neih leh,  phone Matthew 10:17-31

Dahna leh lungkhamna tawh maikhing thazawm-a na om leh, phone Late 27

Na bank account ah sum na neih kei leh, phone Late 37

Mihing mihinna ah na upna khahsuah ding dinmun na tunkhak leh, phone 1Corinthians 13

Kilawmtakpih theihding mi na muh mel kei leh, phone John 15

Lametna bei khakuun-a na om leh, phone Late 126

Nang dinmun pan leitung neu sakna lungsim na neihkhak leh, phone Late 19

Gah hoih na ngahkhiat nop leh, phone John 15

Paul ii lungdamna thusim na theihnop leh, phone Colossians 3:12-17

Hun manpha/hamphatna lianpi mi muhloh/ngahloh, na muh/ngah leh, phone Isaiah 55

Midangte mah banga na ngah na san nop leh, phone Romans 12

ANUAI-A NAMBAT PAWLKHAT ZONG KISAMTHEI VEVE HI. (ALTERNATE NUMBERS)

Lauhthanna leh kihtakna lam tawh kisai, sap theih ding Late 47

Nuntak bitna kihuutna lam tawh kisai, sap theih ding Late 121:3

A takpi hi cih theihnop thu tawh kisai, sap theih ding Mark 8:35

Kician zaw a theihbeh nop a om ciangin, sap theih ding Late 145:18

·         HIH PHONE-NUMBER TE DIRECT IN KISAMTHEI HI.

·         OPERATOR KI SAMLO A, LINE KHEMPEUH NAI 24-SUNG KINGAH HI.

* UPNA AN VAAK IN. UPLAH/MUANLAHNA A NEI TE II UPNA ANNGAWL IN SI THEI HI.

Pasian Gam leh minam a ding thungetna tawh,

Pastor Solomon Thawn