Gathuk tawh kihuan an nete cidam thahat mahmah ~ Dr. Sian Za Kham

Gathuk tawh kihuan an nete cidam thahat mahmah ~ Dr. Sian Za Kham

Thupatna: Gataam thuk tawh kizom in article at mun lua kahih manin, khat vei, Yangon ka inn sungah kei guak ka om laitakin, innkong ong kikiu a, ka hon leh, eimi pasal thum ong dak a, “Na min kua,?” ong ci uh hi. “Sian Za Kham” ka cih leh, “Tua gataam thu at at pa maw,” ong cii, “Hee.” ci-in ka kiho masakna uh ong suak hi.

Kum 2010, January kha sungin Thupha Puak sungah, “Gataam thuktawh kihuan an a nete cidam le thatang hatthuah uhhi” cih​​ thulu tawh GATHUK hoihna ka gelh khin hi. Tua ma in zong gelh ngei zelzel ing. Tutung a pen, ka mel theih mi pawlkhat in, GATAAM THUK HOIHNA thu ong gelh in, cin ong gen zelzel uh a, kong suak kik sak hi.

Gataam ihcih banghiam?

Be a gap gol mahmah tong tan a pha phial, a tang khutmee cia a pha, a kang, be nam khat hi. Mangkang ten SULPHUR BEAN, cii (KAAT BE), Kawl ten AUNGLAUH ci hi. Hih gataam pen, leitung buppi ah i ZOGAM lo ngal ah om ken teh cin um ing. Cambodia gamah kum khat val ka va om kha a, GATAAM cih bang be nam om vet lo hi. Gam dang mun tuamtuamah zong hih be nam om het lo hih tuak hi. Ih Zogam pen Kawlgam in suahtakna i ngah manin Mangkang ten, “Chin Special Division” ong cih pen kituak gige hi. Tu dong mah i Zogam pen na khempeuh ah tuam vilvel in om hi cileng kikhial lo kha ding hi.

Banghang hiam cih leh Kawlgam mun tuamtuam te ah Gataam ne kua mah om lo hi. Midang te tawh i kibat lohna khatah, Ngeisok pak (Rhododendron) zong Kawlgam sung koi mahah om lo, ei Zogam bek ah om hi cin, kigen hi. Gataam pen ei Zogam ta dinga Pasian in ong piak hinteh cileng kikhial lo phial ding hi. Zogam ngallak ah Gaciim ci-in, Ga bekbek ciing leng nak gah mahmah hi. Kawlgam ah zong tuh leng a gui hoih mahmah na pi gah het lo mawk hi. Tua ahih manin hih Gataam pen limtak a, i ciin ding leh i khangnote in a nek theih nadingun limtakin han thawn huai sa ing.

Gataam ne te cidam thahat ahihna tangthu

Kum 1914 – 1918 sung Mangkangte le Germany te gal kido uh a Leitung Galpi khatna piang hi. Labour Corps kici Mangkang galkapte huh dingin Mangkang kumpi ten Kamhau Ukpipa Pu Hau Cin Khup kiangah a nget ciangin Tedim mi tangval sinsen tul khat pia hi. Tuate pen Piantit Pai Te cin kiciamteh hi. Tedim khua panin May 27, 1917 nin ding khia uh a, Piantit (France) gam va tung uh hi. 1918 , August kha sungin ong tung kik uh hi.

Hih Piantit paite Paris khuapi a tun khit uh ciangin, Mangkang ten leitung mi nam kim kihelna THATANG KIDEMNA kibuan nei sak hi. Tua kibuanna ah Tedim mi ten a khatna ngah hi. Tonzang khua pan a pai Pu Lian Za Kham in hih bang la khat na phuak hi.

• (a) Namcih tuibang a gawmna pan, zaithan gual leel aw e.
• (b) Tung Pasian le Pu von vang in gual ong siing zo om lo e.

Ah khiatna: Leitung mi nam cih thatang a, kidemna ong kinei sak hi. Pasian hehpihna le i pu i pa vang in kua man ong zo lo hi.

Kibuanna pen a gual zawh khit uh teh BAWHLUNG suih kidem sak leuleu uh hi. Cikmah hun a sui ngei lo, bawlung tualpi zong a nei lo, Tedim mi ten leitung mi khempeuh thalpaih leuleu uh hi. Pu Lian Za Kham in hih la na phuak hi.

• (a) Lawi bang than nuan, khang vaimang in, pheiphung in leel aw ci e.
• (b) Pheiphung a leel belbang sit nan, phualva bang tuang lei ung e.

A khiatna: Kibuan ka zawh khit uh teh Kumpi ten bawhlung suihna tawh ong kidem sak leuleu uh hi. Tua lai ah zong kua man ong dem zo lo hi.

Kibuanna, bawhlung suihna ah Tedim te kuan man a zawhloh teh Paris khuapi pan a kipan France gam mi khempeuh in, hih bang a gual zo, tha-hat mite kuakua suan mite a hiam cih lamdang sa uh hi. Tua pen Pu Lian Za Kham in hih bang la na phuah leuleu hi.

• (a) Piantui a zal mi za tam ten, kua von tawi bel hiam ci e.
• (b) Hau von tawi cin, khau bang sut e, Pu von ngosai bang lang e.

A khiatna: Piantit a om mi khempeuh in, kua tu kua ta hiam, hih zah a gual zo cin a kan uh teh, Kam Hau mite hi ci-in kigen a, ih pu Kam Hau min pen ong thang mahmah hi.

Hih Piantit paite tangthu i theih ciangin ngaihsut huai khatah banghangin leitung mi: mangvom, mangkang a kipan ei mi lo peuh in ei Zomi te nek Gataam thuk ne lo uh hi. Amau, an lim nono, sa nam kim, bawngnawi, cheese, butter cih bang zang nisuah sim a nete uh hi. Tedim pan a pai Zomi ten amau nekte mu kha lo, ciam kha lo, zang nisuah simin, Gathuk tawh kihuan VAIMIM CIIM, ci le zasan, zing an, sun an, nitak an in a neite uh hi. Tua ahih leh cidam, thahat mahmah leitung mi kua maa tan dem zolo ci leng, banghang ahi tam, cih ngaihsut huai hi. Hih pen GATAAM THUK sungah CIDAM NANG le THAHAT nang a pia DAT nam khat a om hang hi cileng kikhial lo ding hi. Tua thu a nuai-a bangin kikum ni.

GATAAM pen thuk sak kei leng thahatna le cidamna pia lo hi. Tham lo be dangte bangin a hawng kheh khia in, huan in ne lehang kigui-in, kisi thei lai ding hi. A tua cih loh nadingin, a hawng pi kheh khit teh, belpi khat sungah, a min dipdep dong kihuan hi. Tuikuang laizang kivut khat sungah kisung, tui a dim nih, nisim in a tui khit khia, nipi kal khat bang a tawm penin diah ding.

Tua ahih kei leh lui luang khat ah, ga siat nang to kuak, ga minsa sung, nahpaa khuh, suang tawh a tung siin, nipi khat khit teh la khia, a hawng tool, tui siang tawh sop, phelpi khat ah sung, tui nih lo, a tawm pen ni thum khit teh tui nih, mei gei ah koih in limtak sin cip. A hunhunin a thuk nai hiam, cih ciam zel ding, a thuk teh vaimim, tang, kawlkai tong buhtang cih bang khat peuh tawh kihuan khawm thei hi.

Gataam i bilh ciangin, FERMENTATION kici dat kisuktuahna piang a, tua panin VITAMIN B-COMPLEX sung aa, a thupi cidam nang le thatang neih nading a kisam ANEURINE Le NIACIN piang khia hi. Hih thu pen a kimawk gen hi lo-in i Zogam a siavuan lian pen ahi masa Dr. R. Ni Khawi in Falam Zato pi a, a sep sungin, Tedim mite nek GATAAM thuk sungah bang DAT om hiam cih teltak a, thei nuam ahih manin, Yangon khuapi Research ah na puak hi. Result ong khak kik uh teh hih VITAMIN namnih om hi ci-in lai tawh Research Centre panin Falam T.M.O I zumah Dr. R. Ni Khawi minin lai tung hi.

Hih siavuan lian pa khut nuai-ah kum 1962 November 26 ni pan kipan C.A.S (Civil Assistant Surgeon) ka sem kha a, tua hun lai in, Falam pen District Headquarters hi a, Tedim le Khaka pan T.M.O (Township Medical Officer) te a hunhunin ko kiangah meeting ong pai zel uh hi. I Zogam ah annek tui dawn, cidam nang tawh kizui a zat theih ding thute zong kakikum uh hi. Tua lai-ah Dr. R. Ni Khawi in, Tedim te​​ GATAAM THUK​​ nek tawh kizomin lunglawp takin ong gen khia a, Rangoon Central Research a, a puakna thu zong ong lim gen thei mahmah hi.

A man a genna-ah, “Tedim mite, nidang hun lai a, ka sang kahpihte a kipan, kei muhna-ah a tha uh hoih, gol, cidam uh hi. Phalam, Khaka le a dangte pen in Tedim ta bangin​​ GATAAM​​ thuk sak lo uh a, a hawng a tol khit uh teh, a keu in beem sungah koihin, pawi bawl khawng teh​​ ULSUL​​ tawh huanin, a hul in ne uh hi. Tua ahih manin, a tha uh gol lo, mel zong hoih lo ci-in Dr. R. Ni Khawi in gen hi.

Hih siavuanpi pa in, siavuan te bek hi lo, H.A (Health Assistant), Zato siama, le a dang cidamna lam a semte tungah meeting kaneih simun hih Tedim mite GATAAM thuk nek tawh kizomin, Zomi peuhmah in i zat nang nakpi-in hanthawn hi. Amau omna mun tek uah a hilh ciat dingun zong limtakin vaikhak lai hi.

Ga tui thuk pen nau nawi pia nupite bangin a nawi a gau kei leh limtakin tangcim tawh ahi zongin, buhcim tawh ahi zongin, huanin ne leh a nawi gau-in naungek in zong gai zo lo phial hi ci-in ong gen mi om ngei hi. Khualzin a tawl mahmah mi khat in zong GA TUI THUK le kawltu tui helin sial dawn leng i thahat pah lian cin ong gen mi om hi. Tu hunin khangno ten buhsih bek​​ an-in ngaihsun kha uh hi. Buh sih sungah vitamin tawm cik khat bek om hi. Meh lim lopi tawh buhsih i nek sangin, vaimim le gatam thuk limtak ne leng, cidam thahat zaw ding hi hang.

Thukhupna

Tu hun ciangin GATAAM ciin ding kua man awlmawh nawn lo-in sum ngah nading ngimna tawh beeng ciin ding bekbek kihanciam hi. Tua pen Pasian deihna tawh kilehbulh hi. Mai lam hunah GATAAM ciin ding nakpi-in kihanthawt ding thupi hi. Tu laitak linlianin Tedim khuapi sungah GATAAM bung khat in Ks. 3000/- (Kyats tul thum) man ta hi. Ga lei limtak zuan lehang sum muhna hoih ngel khat hi ding hi.​​ A topna-ah, ihki vaikhaknop in Gataam Thuk ne, Ga lei zuanding cih thu hi. Hanciam ciat ni. Dr. Sian Za Kham, M.B., B.S., D.A., M.A. (Theo)