Gampua om Nute in tate koici pattah ding

Gampua om Nute in tate koici pattah ding

Naupang te bangci in’ Khoi leh Kepsiam ding
Naupang kepzia pattahzia atuamtuam in om ahih hang in Zomi sung naupang akeem siam ding pen anute atamzaw kisap na ahihi. Hih nau pang kepzia te ah adiak in Zogam sung om naupangte leh Gampua om Naupangte akepzia ki pattah na kibanglo hi.

Igamsung leh Igampua kibanglo thunih!

(1) Zogam leh Kawlgam huamsung om Naupangte adiak in Eipau kizatna leh meltheih tamna mun ah khangkhia ahih man in Pilna lam pattah ding leh siantho na lam pattah ding kisam pen hi.

(2) Gampua om Naupangte ahih leh Pilna leh Siamna pen minam tampi tawh sinkhawm uh ahih man in khang mahmah hi. Ahizong in Pasian thu leh Zopau , tawh pattah den kisam hi. Tua man in adiak in gampua ah naupang te pattah zia ding ( Youngster Fostering) ding pen Anu apian na nu in hun ngah pen ahihi.

Gampua om Zomi Nupi dinmun!
Gampua om Zomi nupite Zogam om nupi tesang in hunngah zaw uh hi. Vokan, Ak an tawh buailo hi. Lokuan Singpuak cih tawh buai lo hi. Innkuan khamkop anhuan bek atam pen nasep hi zaw a, Tualo nasep ding tamlua omlo hi. Nasep bulpi Naukepsiam ding kisam pen hi.

Bangci kep’ Bang ci pantah ding!
Pasianthu ah pantah ding, Pilna lam ah pantah ding, Siamna tuamtuam lam ah pantah ding, Cidamna lam ah pantah ding, Zopau tawh ki pantah ding, cite ahihi.

Koici pantah ding?
Gampua om nute in natate zingsang lol, thobaih kisin sak in, asangpai man in siangtho tak in kisilsiang sak in, Asangvan ding laibu laikung akimtak in naguansak khit ciang in, Sangpai madiak in tate ading Pasian kiang ah paaina, thungetna bawl sak den ding ihihi.

Nitak sang hongtuah ciang in dawn,in maimuak in nute itna tate mai ah maitaii siusiau sa in abaan pan len in ihdawn ding hi. Tua khit inntun khit ciang in tawm vei khawl, tawlngak pih in. Kimawlna tuamtuam kimawl pih leuleu ding hun pia kik ding ihihi. Nitak an neek khit ciang in laisin na sang ah asin te koimun koilai sin bangte sin cih dot kik na tawm vei neih pih khit ciang in Innkuan ading Pasian kiang ah paaina, thungetna neih pih in naupante paaina kisin sak ding hi.

Tua khit ciang in lupna tung ah a ihmut man un Pasian thu tawh kipawl tangthu tom nono Zopau tawh gen pih zelzel ding kisam hi.

Akhangto gam om hih nazui in TV, DVD te ah Zopau leh Zola tawh kibawl Pasian phatna late leh Lasakna te , Zolia Zotaang kidemna leh Zongeina tawh kizom laam leh Late ahon theih ding in koih sak den kisam hi.

Nisim Kaalsim, Kumsiim kizom in hihdan in naupangte innsung nupi te in hongpantah ciang im Pasian thu ah upna kip kho in, Zopau akhantawn in mangngilh nawn lo ding in namdang lak ah Zomi nam kipto sak semsem ding ahihi.

Lungdam, Pasian thupha!
Hau Thang