Gammi te a itlo kumpi ~ Deih Tung

Gammi te a itlo kumpi ~ Deih Tung

Ih neu lai a ihnu leh ihpa ih it dan leh ih golkhit ciang a ih it dan ki bang lo hi. Ih neu lai in a hih leh pen ihnu leh ihpa in moh peuh hong leisak in, ih ki sap hong lei sak zawh man un aki it a hihi. Nu leh pa te in tate hongnusia in tate kisap na lah tavuan hongla kei mawk le uh tate in nuleh pa te pen koi ci it theih ding ih hihiam? It thei lo bek tham lo in ka neu lai in hong nusia, hong bawl sia ka nu leh ka pa hi ci in nuleh pa mawh sak pel mawh ding hi. Mawhsak ciang bek hi lo in khantawntung ki mangngilh thei lo ki lem loh na hong piang ding hi.

Ih gam ah ih neu lai in ih kumpi te ih muang mah mah hi. A hi zong ih ih kumpi te in ih neu lai siah siah pen bang mah hong huh lo uh a, hong en lo uh hi. Hong pan tah lo, hong pan pih lo khat pen pa in a nei kha ih hi mawk hi. Thu ih theih ma in a hih leh bel a mau ih muan ding ahi mah hi. Tu in a hih leh ih kum zong hong tam to ta a, ei leh ei in thu ih ngaih sun thei hi.

Ihkum pi in ei Zomi te hong it tak tak hi le uh ih gam ah tuinek hoih tak in hong bawl sak ding uh a, mei hoih takin hong bawl sak ding uhhi. Gamdang a om Zomi tam pi tak in tuni dong in khua a ding, tui lak na ding, mei bawl na ding,lam pi bawl na ding.. ci in sum ih kidong a, inn a om te zong innlusik in sum ki dong in tui ngah na ding, mei ngah na ding… in ki han ciam hi. Hih dan ih han ciam na te pen hoih lo hi ka ci kei hi. Hoih mah hi a hi zong in tuingah lo, mei ngah lo cih pen ei gammi te in ei leh ei a han ciam ding hi lo a, ih kum pi in hong bawlsak ding uh a hihi. Ih kumpi in bangmahhong huh vet lo a hihleh ei pen Kawlgam kumpi ukna nuai a hi lo maw? ci leng lah kumpi thu khunkhauhpai sak mahmah uh a, bangmah ih gam tang thei tuan kei zel hi.

Sang ih kah ciang in laibu man ding sum ki nei lo a, kumpi in laibu a mawk na in hong pia tuan lo hi. Kumpi na sem te khasum kham sak zo tuan lo uh a hih man in kumpi nasem te in sangnau pang te tung pan in sum hong don beh lai uh hi. Sangpuan ki lei zo lo a, kumpi in lah sangpuan nei lo te sang ah sangsia te nisim in saatsak den pong uh hi. A saatsaksak sang in sangpuan leisak ziau le uh a hi ding kim lai Kumpi te a thei lo ki neih lel uh hi. Pilna sin na lam a makai pi te leh ih kum pi te in kawlgam ah mikhem peuh in tan 4 ciang a mawk na in pilna ki sin sak a, sin loh phamawh, pel mawh hi ci in mun khem peuh ah lai ki suang zihziah pong hi. A hizong in sum leh paai, laibu, laikung, sangpuan tawh cik mah hun in ih kumpi te in hong huh ngei lo hi.

Lampi te hoih lo lua a, vuikhui,buannawi tawh ki dim hi. Ulian te hong pai ding ciang in a pai na ding uh lampi pen taakteh ki phah sak a, lam pi a hoih lo te mu na pi taakteh tung ah maizum het lo tak in pai hual hual lel uh hi. A khe tawh pai nuam lo lai a, Kumpi mawtaw tawh a pai na ding mun dong pai hi. Mipi in hunngah lo pi pi, manlo pi pi in a dawn uh pen alung sim vuah kei mipi in hong deih mah mah uh a, hong muak ziahziah uh hi ci in MRTV ah suak sak lai lai uh hi.Tua mun ah tua U lian pa in niangteh kung tua zah a mawk na in pia hi ci in minthang mahmah dep uh hi. Tua U lian pa in tua sang ading in computer tua zah pia hi ci in a min pen mitheih ding ut sese uh hi. A hi zong in a computer piak te kizangh thei tuan lo hi. A set hoih lo zong thu khat hi a, mei ki ngah lo a hih man in bangmah ki hih thei lo hi.

Lokho mi te in vaimim cing uh a, ekleiza ki samin lei zo lo uh a hih manin an hoih lo hi. Be tuam tuam, an kam tuam tuam, meh teh meh gah te zong pen lampi hoih loh na hang in mundang ah ki puak zo lo a, innzang ah mawk muat lel hi. Muat lel a hih manin sum suak lo a, mipi in sum nei lo hi. A zenzen in lampi hoih hen la hi leh ni khat ni nih sung in gamdang tungman mah mah lel ding a, muat man lo in sum suak ding hi. Mei ki ngah lo ahih man in an gawiset ki zangh thei lo a, zingsang sim nitak sim in an ki susu mai a, tha teng bei siang hi. . Ih khua ki zop na te lampi a hoih thei pen in hong bawl sak ding uh ki lawm buang hi. Lampi hoih in kizop na hoih leh ih khawhsa khat peuh peuh pen man nei lo in buak kul lo ding a, ih neih sa khat pen kawlgam sung ah a ki gaihzawh kei a, a bei zawh kei leh gamdang ah ki puak sak thei lua hi.An a hoih na ding ekleiza hong pia thei lua uh a, lokho mi te hong thupi sim ding uh ki lawm hi.

Gan ih khawi sunsun te zongpen ganbangzah khawi na hi uh hiam ci in sazian hong la uh a, sialkhat ciang sum tuazah, bawng khat ciang sum tua zah ci in gan ih khawi man sum ki pia zaw sop hi. A tak tak in cileng gankhawi te ading in ganhing siavuan, satui ki sam te hong piak ding ki lawm buang hi. Gan a si a om ciang sum tua zah liau ding ci lai uh a, a go te bang pen sum tam pi tak liau sak nuam uh hi.Lo gam bangzah nei, lokhawhna koi cia lian hiam? ci uh a, ekleiza hong pia ding ih sak leh lo ih khawh man sum kipia hi. Niangteh ciingding ci uh a, nisim phial in ki buai pih den hi. Niangteh teng tawm khat hong khan khiat khit teh kawlsathau ciingding ci leu leu uh a, niangteh lak ah kawlsathau ki suan hi. Azenzen in niangteh, kawlsathau ih ciing’ a hoih mahmah zong in ihzuak na ding om lo lel ding a, ih gam sung a muat in uih lel ding hi.

Khua ta tuam tuam ah palik,galkap te gal a om hiam cih na tawh gamvan ding in vak thei zelzel uh a, khuata a te in akleh vok, zubilhsa teng bei lel hi. Zu huan a om leh man uh a, sum tam pi liausak uh hi. A hizong in amau zu dawn veve uh a, aksa tawh meh nuam lai uh hi. Ulian te pen khual zin dah uh hen la hi leh hoih kasa zaw hi.Ulian khat khual a zin ciang a lamsap teng, a nek adawn teng pen a khuanung ah kum khat sung bang innlusik in sum ki dong ngek ngek a, tua lengla do na ah tavuan nei te nek ding tawh ki dong khawm lai ahih manin gammi in ki thuak lawh dikdek lel hi.

Kawlgam bup biakna tawh ki sai a tavuan nei te khual azin ciang kawlbiakna bek a khantoh na ding in nasem uh hi. Hih khua ah kawlbiak na a zui nuam a om zenzen leh antang ip khat leh na khua gei vuah taattung khat hong lam sak ding hi ung, taattung hong lamsak le ung na khua uh leh khuapi ki zop na lampi zong kong sial sak ding uh a, na lam pi te uh hong hoih mah mah ding hi hong ci lai uh hi. A tak tak in kawlbiak na aom ciang bek in lampi hong bawl sak sawm pan uh a hi ta zen hi. Tua zong upna kai tuan lo lai lai hi.

Khuatakhat ah mi tul val bang a om hang in cidam tawh kisai kumpi nasem om sak tuan lo uh hi. A om na sunsun te zong pen zatui om lo, kumpi nasem om lo, kumpi nasem om sunsunleh zong lokuan, khual zin…cih bang peuhhi tazen a zatui ne man lo a, a si tam pi tak ki om hi. Pawlkhat te bang pen a ki pat tung in zatang tangkhat neleh adam zo kik ding kimlai, a huai siat mahmah ciang kumpi zato pi ki puak pan pan a hih manin bangmah ki ci thei nawn lo hi. Cina in zatui ih ki sap ciang zatui om lo a, a om sun sun te zong a hunbei, ani bei ta hi a, lau huai mahmah lai hi. Khua sung ah zatui a thei zaw deuh te in deihsakna tawh zatui zuak in a om sun sun te zong pen kumpi te in phalna ngah lo pi a zatui zuak ci in man nuam lai uh a, a mau lah zatui leh nasem ding hong koih sak zo tuan lo uh hi.

Ih kumpi te in gammi te a ding in bang mah hong sem lo uh a, hong thu sim lo uh hi. Hih bang a hong huh lo, hong pan pih lo, ih ki sap hun, ih haksat hun a hong pah pih lo kumpi pen Cikmah hun in kumpi ding in ka deih ngei ngei kei hi. Hun khat teitei ciang in Zogam leh Zomi a it, a vei gammakai hong om ding cih ka deih kaih khol hi. Tua hun ding ngak kawm sa in huih ka na diik diik lai ding hi. Deih Tung